U Karakasie amierykanskija śpiecnazaŭcy «bačyli» praź ścieny. Što heta za supiertechnałohija?
Technałohii, zdolnyja vyjaŭlać ludziej unutry budynkaŭ na adlehłaści, sapraŭdy isnujuć i vykarystoŭvajucca amierykanskimi siłavikami.
Nievialičkaja hrupka ahientaŭ CRU, pavodle paviedamleńniaŭ The New York Times, pačała tajemna pracavać u Vieniesuele jašče ŭ žniŭni 2025 hoda. Vydańnie piša, što ahienty zmahli sabrać padrabiaznyja źviestki pra ład žyćcia i pieramiaščeńni Nikałasa Madura. A padčas apieracyi pa jaho zachopie amierykanskija śpiecpadraździaleńni, jak śćviardžajecca, atrymlivali infarmacyju pra situacyju ŭnutry budynkaŭ — byccam by «bačyli» praź ścieny.
Techničnyja padrabiaznaści apieracyi aficyjna nie raskryvajucca, tamu dakładna nieviadoma, jakija prybory mahli vykarystoŭvacca. Adna z najbolš viadomych amierykanskich sistem hetaha typu — raspracoŭka Łabaratoryi Linkalna Masačusieckaha technałahičnaha instytuta (MIT Lincoln Laboratory) pad nazvaj DePLife (Detection of Presence of Life — «Detektar najaŭnaści žyćcia»).
Jak paviedamlajecca na sajcie Ministerstva ŭnutranaj biaśpieki ZŠA (DHS), pieršaje pakaleńnie hetaj technałohii ŭžo pastupova ŭkaraniajecca ŭ pracu palicejskich departamientaŭ pa ŭsioj krainie. Jaje taksama zakupiła Fiederalnaje biuro rasśledavańniaŭ.
Asnoŭnaja pieravaha DePLife — mahčymaść atrymać kaštoŭnuju infarmacyju pra situacyju ŭnutry budynka, nie padychodziačy ŭprytyk i nie ryzykujučy žyćciom. Radar zdolny «zazirnuć» praz unutranyja pieraharodki i źniešnija ścieny typovych žyłych damoŭ. Dla palicyi heta moža mieć vyrašalnaje značeńnie pry zatrymańni ŭzbrojenych złačyncaŭ abo vyzvaleńni zakładnikaŭ.
Paviedamlajecca, što raspracoŭščyki zdoleli ŭdaskanalić svaje pryłady. Raniejšyja viersii padobnych skanaraŭ patrabavali poŭnaj nieruchomaści — apieratar pavinien stajać nieparušna abo pryciskać pryładu da ściany. Novyja ałharytmy kampiensacyi mikraruchaŭ dazvalajuć technałohii pracavać efiektyŭna navat tady, kali prybor znachodzicca ŭ rukach čałavieka, jaki dychaje abo źlohku pahojdvajecca.
Hety ž ałharytm vykarystoŭvajecca i ŭ kampaktnym radary Tinyrad, jaki ŭstaloŭvajecca na drony. Sistema aŭtamatyčna adymaje vibracyju matoraŭ i vahańni ad vietru, pakidajučy tolki karysny sihnał.
Kab dabicca takoj dakładnaści, navukoŭcy navučyli ałharytm adsiakać iłžyvyja sihnały. Pryłady pratestavali z dapamohaj mietaličnych makietaŭ-prymanak, jakija adlustroŭvajuć radarnyja chvali hetak ža mocna, jak chaładzilniki ci inšaja bytavaja technika. Radar navučyŭsia ihnaravać hety «miortvy» mietał i bačyć tolki žyvyja abjekty.
Paviedamlajecca, što bieśpiłotnik z radaram moža zavisać kala budynka i amal imhnienna vyznačać, ci jość niechta ŭnutry. Heta žyćciova važna nie tolki padčas pierastrełak, ale i dla pažarnikaŭ, jakim treba znajści paciarpiełych u zadymlenych pamiaškańniach, dzie zvyčajnyja kamiery biaśsilnyja.
Na dasiahnutym raspracoŭščyki spyniacca nie źbirajucca. Nastupnym krokam stanie stvareńnie ałharytmaŭ dla kampiensacyi «vialikich ruchaŭ». Heta dazvolić radaru vydavać jasnuju karcinku navat tady, kali dron chutka lacić vakoł abjekta, a apieratar biažyć da budynka.
Ciapier čytajuć
Advakat Dźmitryj Lepretar raskazaŭ pra biełyja plamy ŭ spravie ab terakcie ŭ mietro1
Kamientary
[Zredahavana]