FBR papiaredžvała ŭłady Kalifornii pra mahčymyja ataki iranskich dronaŭ na ŭźbiarežža
FBR u apošnija dni papiaredziła palicejskija departamienty ŭ Kalifornii, što Iran moža adpomścić za amierykanskija ataki, zapuściŭšy bieśpiłotniki pa zachodnim uźbiarežžy ZŠA. Pra heta havorycca ŭ paviedamleńni, ź jakim aznajomiłasia ABC News.
«Niadaŭna my atrymali infarmacyju, što na pačatak lutaha 2026 hoda Iran nibyta razhladaŭ mahčymaść pravieści raptoŭnuju ataku z vykarystańniem bieśpiłotnych latalnych aparataŭ ź nieŭstanoŭlenaha sudna la ŭźbiarežža terytoryi ZŠA, u pryvatnaści pa nieŭdakładnienych metach u Kalifornii, u vypadku kali ZŠA naniasuć udary pa Iranie», — havorycca ŭ paviedamleńni, raspaŭsiudžanym naprykancy lutaha.
«U nas niama dadatkovaj infarmacyi pra čas, sposab, mety abo vykanaŭcaŭ hetaj mierkavanaj ataki».
Papiaredžańnie źjaviłasia jakraz u toj čas, kali administracyja Donalda Trampa pačała svaju apieracyju suprać Isłamskaj Respubliki. Iran u adkaz nanosić udary bieśpiłotnikami pa metach pa ŭsim Blizkim Uschodzie.
Infarmacyja pra mahčymyja płany Irana ździejśnić raptoŭnuju ataku bieśpiłotnikami pa zachodnim uźbiarežžy źjaviłasia jašče da taho, jak ZŠA i Izrail nanieśli ŭdary pa Iranie. Pavodle vysokapastaŭlenaha pradstaŭnika pravaachoŭnych orhanaŭ, ličycca, što 12‑dzionnyja bambardziroŭki surjozna asłabili mahčymaści Irana pravieści takuju ataku.
Pradstaŭnica ofisa FBR u Łos-Andželesie admoviłasia kamientavać situacyju. U Biełym domie taksama adrazu nie adkazali na zapyt ab kamientary, paviedamili ABC News: «Upraŭleńnie pa nadzvyčajnych situacyjach hubiernatara aktyŭna supracoŭničaje ź dziaržaŭnymi, miascovymi i fiederalnymi strukturami biaśpieki, kab abaranić našy supolnaści».
U šeryfskim departamiencie Łos-Andželesa taksama zajavili, što «ŭ śviatle ciapierašnich hłabalnych padziej» padtrymlivajuć «pavyšany ŭzrovień hatoŭnaści».
«Ź mierkavańniaŭ maksimalnaj aściarožnaści i z ulikam ciapierašnich relihijnych abradaŭ departamient praciahvaje ŭzmocnienyja patruli vakoł miescaŭ nabaženstvaŭ, kulturnych ustanoŭ i inšych značnych miescaŭ pa ŭsim akruzie», — havorycca ŭ zajavie viedamstva.
«My zahadzia pierahledzieli płany raźmiaščeńnia sił, uzmacnili kaardynacyju z patrulnymi stancyjami i zabiaśpiečyli najaŭnaść dadatkovych resursaŭ na vypadak nieabchodnaści».
Kamientatar ABC News Džon Koen, były kiraŭnik raźviedki Ministerstva ŭnutranaj biaśpieki ZŠA, zajaviŭ, što jaho turbuje mahčymaść źjaŭleńnia dronavaj vajny jak z boku Cichaha akijana, tak i z terytoryi Mieksiki.
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary