Sud u ZŠA pryznaŭ niezakonnym rašeńnie administracyi Donalda Trampa zakryć radyjokampaniju «Hołas Amieryki» i zahadaŭ adnavić jaje pracu. Pavodle rašeńnia suda, amierykanskija ŭłady pavinny viarnuć na pracu 1042 supracoŭnikaŭ i adnavić viaščańnie na praciahu tydnia.
Nieŭzabavie paśla pačatku svajho prezidenckaha terminu ŭ 2025 hodzie Tramp rasparadziŭsia zakryć hetaje miedyja, abvinavaciŭšy jaho ŭ praduziataści. Taksama płanavałasia značna skaracić dziejnaść inšych ŚMI, jakija finansujucca ź biudžetu ZŠA. Paśla taho bolš za tysiaču supracoŭnikaŭ «Hołasa Amieryki» adpravili ŭ apłačany adpačynak da dalejšaha paviedamleńnia.
Žurnalisty padali ŭ sud, zajaviŭšy, što heta parušaje ich prava na svabodu słova. Jašče raniej sud častkova prypyniŭ zakryćcio i zabaraniŭ zvalnieńni, ale faktyčna bolšaść žurnalistaŭ usio adno nie pracavała.
Ciapier sudździa Rojs Łambiert pastanaviŭ, što zvalnieńni byli nieabhruntavanymi i samavolnymi. Jon taksama adznačyŭ, što pryznačanaja kiraŭnica Ahienctva ZŠA pa hłobalnych miedyja (USAGM) Kery Łejk nie mieła poŭnych paŭnamoctvaŭ prymać takija rašeńni, bo jaje pryznačeńnie nie było zaćvierdžana Sienatam. Akramia taho, urad nie ŭličyŭ zakony, jakija rehulujuć pracu «Hołasa Amieryki» i jaho mižnarodnaje viaščańnie (jakoje raniej viałosia amal na 50 movach).
Pradstaŭniki redakcyi vitali rašeńnie suda i vykazali nadzieju praciahvać svaju misiju — zajmacca žurnalistykaj, a nie prapahandaj. Ale pakul nieviadoma, ci budzie hetaje rašeńnie abskardžana.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?1414
Kamientary