Cichanoŭskaja ŭ Miunchienie: Patrabujem, kab rasijskija vojski byli vyviedzienyja nie tolki z Ukrainy, ale i z našaj ziamli
Śviatłana Cichanoŭskaja pačała ŭdzieł u Miunchienskaj kanfierencyi pa biaśpiecy. Jana vystupała ŭ dyskusii «Biełaruś paśla vybaraŭ 2025: katalizatar pieramienaŭ abo pieška ŭ čužoj hulni?».
Dyskusija sabrała jeŭrapiejskich palitykaŭ, dypłamataŭ i ekśpiertaŭ, jakija analizavali budučyniu Biełarusi ŭ źmienlivym hieapalityčnym kantekście, paviedamlaje Ofis Cichanoŭskaj.
Padymalisia pytańni, ci varta razhladać Biełaruś praz pryzmu rehijanalnaj biaśpieki, jak apošnija «vybary» ŭpłyvajuć na adnosiny Biełarusi z Rasijaj i Zachadam, jakim moža być šlach da demakratyčnych pieramienaŭ i jak Zachad moža dapamahčy.
Padčas finalnaj pramovy Cichanoŭskaja zajaviła:
«Jakija našyja intaresy? Jany jasnyja. Nam patrebny stabilny i spraviadlivy śviet. Heta mahčyma tolki tady, kali Biełaruś stanie suvierennaj i demakratyčnaj krainaj. Dla hetaha my pavinny asłabić upłyŭ Rasii i jaje chvatku na našaj terytoryi. My patrabujem, kab rasijskija vojski byli vyviedzienyja nie tolki z Ukrainy, ale i z našaj ziamli.
Biełaruś pavinna demakratyzavacca. Pakul dyktatar niepadspravazdačny svajmu narodu, jon budzie praciahvać słužyć Pucinu i raźmieńvać biełaruski suvierenitet na palityčnaje vyžyvańnie. Tolki sapraŭdny palityčny pierachod, praz svabodnyja i sumlennyja vybary, moža harantavać zachavańnie biełaruskaha suvierenitetu i tryvałaści miru».
Cichanoŭskaja padkreśliła: biełarusy pavinny zmahacca za prava na samastojnaje vyznačeńnie budučyni, i adznačyła važnaść mižnarodnaj padtrymki ŭ hetym pracesie. Jana zaklikała da aktyŭnaha ŭdziełu Zachadu ŭ padtrymańni demakratyčnych pieramienaŭ u Biełarusi i zabieśpiačeńni biaśpieki ŭ rehijonie.
Kamientary