Kiraŭnik «Biełmiedtechniki», u haražy jakoha KDB znajšoŭ $620 tysiač chabaru, vyzvaliŭsia z kałonii i ŭładkavaŭsia na novuju pracu

Zhodna z atrymanaj vydańniem infarmacyjaj, Šarak adbyvaŭ pakarańnie ŭ PK №3 «Vićba» (tudy časta nakiroŭvajuć byłych siłavikoŭ, sudździaŭ, biznesmienaŭ, a ciapier i palitviaźniaŭ).

Pavodle danych rejestraŭ, Šarak vyzvaliŭsia ŭ 2021 abo 2022 hodzie. Sa śniežnia 2022 hoda jon pačaŭ pracavać u TAA «Biełełtyka». Na jakoj mienavita pasadzie — nieviadoma. Pa rašeńni suda, na praciahu piaci hadoŭ jamu zabaroniena zajmać kiraŭničyja pasady.

«Biełełtyka» — heta biełaruskaja kampanija, jakaja zajmajecca vytvorčaściu i pastaŭkami elektratechničnaha abstalavańnia. Siarod jaje klijentaŭ — «Dyrekcyja pa budaŭnictvie Minskaha mietrapalitena», šmatfunkcyjanalny kompleks Minsk World.

Žurnalistka «Lusterka» patelefanavała ŭ pryjomnuju kampanii jak fizičnaja asoba. Tam paćvierdzili, što Šarak sapraŭdy tam pracuje. Na momant zvanka jon znachodziŭsia «na vytvorčaści».

Šaraka zatrymali 15 červienia 2018 hoda. Padčas zatrymańnia jon byŭ dyrektaram «Biełmiedtechniki» — pradpryjemstva, praź jakoje prachodziła bolš za 90% biudžetnych zakupak u śfiery achovy zdaroŭja. KDB zajaviŭ, što jon sistematyčna atrymlivaŭ chabar. U haražy mužčyny znajšli 620 tysiač dalaraŭ u tajniku.

U lipieni 2018 hoda Šarak pajšoŭ na papiaredniaje pahadnieńnie z uładami: pryznaŭ vinu, paviedamiŭ pra inšych fihurantaŭ i viarnuŭ niezakonnyja hrošy. Sud prachodziŭ u zakrytym režymie. Pryčyna — «asablivaja składanaść spravy» i «kamiercyjnaja tajna».

U vyniku hramadskaści dahetul nieviadomyja padrabiaznaści abvinavačańnia. Sud nie raskryŭ dakładnuju sumu chabaru. Dziaržavie pieradali 427 tysiač dołaraŭ i 75 tysiač jeŭra, kanfiskavanych padčas pieratrusu.

Prysud Alaksandr Šaraku abviaścili 11 maja 2020 hoda — 6,5 hoda pazbaŭleńnia voli.

Da suda jon amal dva hady znachodziŭsia pad vartaj, što «paskoryła» jahony termin. A ŭ 2021 hodzie pačała dziejničać novaja sistema zaliku: adzin dzień u SIZA ličycca jak paŭtara dnia ŭ kałonii ahulnaha abo ŭzmocnienaha režymu.

Akramia taho, da Šaraka mahło być prymieniena ŭmoŭna-daterminovaje vyzvaleńnie (UDV). Jaho asudzili pavodle č. 3 art. 430 KK (Atrymańnie chabaru). Heta asabliva ciažkaje złačynstva, tamu na UDV možna raźličvać paśla adbyćcia nie mienš za ¾ terminu.

Pavodle raźlikaŭ «Lusterka», Šarak moh źviarnucca pa UDV užo ŭ traŭni 2022 hoda. Kali b jon adbyŭ uvieś termin, vyzvaliŭsia b u śniežni 2023 hoda.

Uvohule ž pa toj spravie, pa jakoj sudzili Alaksandra Šaraka, jak zajaŭlaŭ KDB, fihurantami stali bolš za 60 čałaviek.

Siarod vysokapastaŭlenych abvinavačany byli namieśnik ministra achovy zdaroŭja Ihar Łasicki, dyrektar RNPC traŭmatałohii i artapiedyi Alaksandr Bialecki, dyrektar Centra ekśpiertyz i vyprabavańniaŭ u achovie zdaroŭja Alaksandr Stalaroŭ, kiraŭnik hałoŭnaha ŭpraŭleńnia achovy zdaroŭja Hrodzienskaha abłvykankama Andrej Stryžak, kiraŭnik vajskova-miedycynskaha ŭpraŭleńnia Ministerstva abarony Alaksiej Jaśkoŭ.

• 3
• 0
• 3
• 7
• 3
• 1
• 0
• 0