KDB vyjaviŭ maštabnuju karupcyjnuju schiemu ŭ śfiery achovy zdaroŭja Biełarusi. Pra heta siońnia žurnalistam paviedamiŭ staršynia KDB Valeryj Vakulčyk, pieradaje BiełTA.
Za sistematyčnaje atrymańnie chabaraŭ zatrymanyja šerah tak zvanych miedycynskich funkcyjanieraŭ. U ich liku dyrektar centra ekśpiertyz i vyprabavańniaŭ u achovie zdaroŭja Alaksandr Stalaroŭ, za vyrašeńnie pytańniaŭ pa dziaržaŭnaj rehistracyi lekaŭ, dyrektar pradpryjemstva «Biełmiedtechnika» Alaksandr Šarak za arhanizacyju zaklučeńnia i vykanańnie dahavoraŭ, zabieśpiačeńnie svoječasovaj apłaty i realizacyi zakupak.
«Darečy, pry vobšuku ŭ jaho haražy ŭ tajniku znojdziena bolš za $620 tysiač u ekvivalencie», — prainfarmavaŭ Valeryj Vakulčyk.
Siarod fihurantaŭ taksama načalnik hałoŭnaha ŭpraŭleńnia achovy zdaroŭja Hrodzienskaha abłvykankama Andrej Stryžak i načalnik vajskova-miedycynskaha ŭpraŭleńnia Ministerstva abarony Alaksiej Jaśkoŭ. Pieršy zatrymany za arhanizacyju praviadzieńnia techničnaha absłuhoŭvańnia i ramontu miedycynskaha abstalavańnia, jakoje znachodzicca va ŭstanovach achovy zdaroŭja Hrodna. Druhi — za składańnie dahavoraŭ pa pastaŭcy miedycynskaj techniki i vyrabaŭ miedycynskaha pryznačeńnia ŭ adras vajskova-miedycynskaha ŭpraŭleńnia Ministerstva abarony, a taksama arhanizacyju i kantrol apłat pastaŭlenaj miedycynskaj techniki i vyrabaŭ miedycynskaha pryznačeńnia. Akramia taho, zatrymanyja šerah słužbovych asobaŭ «Biełmiedtechniki», jakija ŭdzielničali ŭ arhanizacyi pracy kamisii Ministerstva achovy zdaroŭja pa zakupcy abstalavańnia i zabieśpiačeńni svoječasovaj apłaty pastavak.
Słužbovyja asoby sistemy achovy zdaroŭja atrymlivali chabar za vyrašeńnie pytańniaŭ, jakija ŭvachodzili ŭ ich kampietencyju. Razavyja niezakonnyja ŭznaharodžańni dachodzili da $10 tysiač, a asobnym słužbovym asobam — da $350 tysiač za raz.
Kamientary