Novaje daśledavańnie amierykanskich vučonych nie vyjaviła suviazi pamiž užyvańniem bulby i chvarobami serca ci hipiertanijaj. Praŭda, šmat smažanaj bulby lepš nie jeści.
Chvaroby sistemy krovazvarotu źjaŭlajucca adnoj z samych aktualnych prablem miedycyny i praktyčnaj achovy zdaroŭja pačatku XXI stahodździa, a taksama asnoŭnaj pryčynaj śmierci va ŭsim śviecie. A raspaŭsiudžanaść hipiertanii ŭ Biełarusi składaje 40-45%.
Śpiecyjalisty adznačajuć, što zdarovaja dyjeta adyhryvaje klučavuju rolu ŭ prafiłaktycy hetych zachvorvańniaŭ. Jak piša News-Medical, vučonyja z Harvardskaha ŭniviersiteta vyrašyli vyśvietlić suviaź pamiž ahulnym spažyvańniem bulby i vierahodnaściu raźvićcia hipiertanii i chvarob serca na asnovie danych siami bujnych amierykanskich kahortnych daśledavańniaŭ.
Vučonyja asobna razhledzieli smažanuju, varanuju, zapiečanuju bulbu i piure. Kab vyniki byli dakładnymi, udzielnikaŭ z užo isnujučymi zachvorvańniami abo niapoŭnymi danymi pra spažyvańnie bulby vyklučyli z analizu.
Spažyvańnie bulby vymiarałasia z dapamohaj ankiet charčavańnia, jakija fiksavali pamiery porcyj i častatu pryjomu ježy za apošni hod. Ahulnaja kolkaść raźličvałasia ŭ porcyjach za tydzień. Pry hetym bulba varanaja, zapiečanaja i piure hrupavalisia razam. Danyja pra bulbianyja čypsy nie ŭličvalisia.
Byli sabranyja startavyja źviestki pra ŭzrost, poł, rasu, indeks masy cieła, ład žyćcia i racyjon. Dla raźliku kaeficyjentaŭ ryzyki vykarystoŭvali rehresiju Koksa, skarektavanuju na demahrafičnyja, žyćciovyja i miedycynskija faktary. Atrymanyja vyniki byli apracavany z dapamohaj mieta-analizu z vykarystańniem statystyčnych madelaŭ.
Daśledavańniem było achoplena bolš za 110 tysiač čałaviek, ale dla analizu ryzyki hipiertanii vykarystali źviestki tolki 67 tysiač z-za niedachopu danych u dvuch kahortnych daśledavańniach ź siami. Uzrost udzielnikaŭ vahaŭsia ad 25 da 72 hadoŭ, a siaredniaje spažyvańnie bulby składała ad 1,9 da 4,2 porcyi na tydzień.
Vyvady, jakija apublikavany ŭ časopisie Nutrients, nie vyjavili nijakaj istotnaj suviazi pamiž ahulnym spažyvańniem bulby i ryzykaj chvarob serca, navat paśla ŭliku ŭzrostu, dyjety i ładu žyćcia. Taksama nie znajšłosia dokazaŭ taho, što roznyja vidy pryhatavanaj bulby — smažanaja, varanaja, zapiečanaja abo piure — upłyvajuć na hetuju ryzyku.
Što da hipiertanii, to ahulnaje spažyvańnie bulby nie mieła značeńnia. Ale smažanaja bulba ŭsio ž akazałasia faktaram, jaki moža pavialičyć ryzyku: tyja, chto jeŭ jaje bolš za adnu porcyju na tydzień, mieli na 10% vyšejšuju ryzyku raźvićcia hipiertanii ŭ paraŭnańni z tymi, chto ŭvohule jaje nie jeŭ.
Aŭtary adznačajuć, što vyniki ich daśledavańnia supadajuć z vynikami papiarednich daśledavańniaŭ, praviedzienych u Šviecyi i ZŠA. U ich taksama nie było vyjaŭlena suviazi pamiž ahulnym spažyvańniem bulby i ryzykaj raźvićcia chvarob serca, insultu abo infarktu mijakarda.
Nahadajem, što raniej narviežskija daśledčyki vyjavili, što ŭsiaho dźvie varanyja bulbiny na dzień mohuć dapamahčy žyć daŭžej. A na kožnyja 100 hramaŭ bolš vysokaha spažyvańnia varanaj bulby ryzyka śmiarotnaści ad sardečna-sasudzistych zachvorvańniaŭ źnižajecca na 4%.
Kamientary
Heta jak z daśledavańniami pra telefony… pieršyja pakazyvali što vielmi škodnyja dla zdaroŭja, a paśla praviali samaje sapraŭdnaje, hruntoŭniejšaje i najčaśniejšaje daśledavańnie i … telefon staŭ biasškodny…