Staŭ viadomy pamier myta, jakoje Jeŭrakamisija prapanuje ŭvieści na sielhaspradukcyju i azotnyja ŭhnajeńni ź Biełarusi i Rasii
Ad vartych davieru krynic u Bruseli «Radyjo Svaboda» stała viadoma, jakoje myta Jeŭrakamisija prapanuje ŭvieści na šerah tavaraŭ sielskahaspadarčaj pradukcyi i azotnyja ŭhnajeńni ź Biełarusi i Rasii. Pryniaćcie novych abmiežavańniaŭ čakajecca ŭ najbližejšyja tydni.
28 studzienia Jeŭrakamisija zaćvierdziła prapanovu ab uviadzieńni myta na šerah sielskahaspadarčych tavaraŭ ź Biełarusi i Rasii, a taksama na niekatoryja azotnyja ŭhnajeńni. Meta prapanovy — źnizić zaležnaść ad impartu z Rasii i Biełarusi. Taki impart, asabliva ŭhnajeńniaŭ, robić ES uraźlivym dla patencyjnych prymusovych dziejańniaŭ z boku Rasii i, takim čynam, stvaraje pahrozu dla charčovaj biaśpieki ES, havaryłasia ŭ pres-relizie.
Pavodle infarmacyi «Radyjo Svaboda», płanujecca pavyšeńnie myta na sielskahaspadarčyja tavary z 0% abo nizkich stavak da 50%.
U pieralik sielskahaspadarčaj pradukcyi, na jakuju budzie nakładacca myta, siarod inšaha trapili miasa i miasnyja subpradukty, małočnaja pradukcyja, zbožža, sadavina, harodnina, alei (aliŭkavy, słaniečnikavy, kakosavy, kunžutny i inš.), tłuščy, kava, harbata, kakava, cukar, kandytarskija vyraby i inš.
Azotnyja ŭhnajeńni, akramia ciapierašniaha myta ŭ pamiery 6,5%, buduć abkładacca dadatkovym mytam, jakoje budzie pastupova pavialičvacca, pačynajučy z 40 ci 45 jeŭra za tonu ŭ zaležnaści ad typu ŭhnajeńnia (što adpaviadaje prykładna 13%), da zabaronnaha ŭzroŭniu ŭ 315 abo 430 jeŭra za tonu adpaviedna — heta prykładna 100%, što pavinna faktyčna spynić impart biełaruskich i rasijskich uhnajeńniaŭ u ES.
Čakajecca, što pastupovy rost myta na ŭhnajeńni pavinien zaviaršycca za try hady, da 2028 hoda.
Taksama płanujecca, što biełaruskaja i rasijskaja pradukcyja budzie vyklučanaja z mytnych kvot Jeŭrasajuza. Heta vyklučyć mahčymaść pastavak ź nižejšymi taryfami.
Abmiežavańni ŭvodziacca, zhodna z prapanovaj Jeŭrakamisii, tamu, što ŭ 2023 hodzie zaležnaść ad rasijskich uhnajeńniaŭ u ES pieravyšała 25%, a heta «stvaraje pahrozu dla stabilnaści rynku ES».
«Biełaruski ekspart sielskahaspadarčaj pradukcyi i ŭhnajeńniaŭ choć i mienš značny (ahulny abjom €92 młn i €29,6 młn adpaviedna), ale ŭklučany ŭ sankcyjny miechanizm, kab praduchilić nielehalny tranzit rasijskaj pradukcyi praź Biełaruś», — havorycca ŭ dakumiencie.
Novyja abmiežavańni — častka šyrejšaj palityki ekanamičnaha cisku na Rasiju i Biełaruś za padtrymku vajny suprać Ukrainy.
Čakajecca, što ŭ vyniku ŭviadzieńnia novaha myta impart biełaruskich i rasijskich tavaraŭ, achoplenych rehłamientam, praktyčna spynicca.
Jeŭrasajuz płanuje zamiaścić pastaŭki za košt ułasnaj vytvorčaści abo alternatyŭnych pastaŭščykoŭ. Dla ŭhnajeńniaŭ heta mohuć być, naprykład, Ałžyr i Jehipiet.
Čakajecca, što myta ŭviaduć praz čatyry tydni paśla publikacyi rehłamientu.
Kamientary