U 19-hadovaj dziaŭčyny hrudzi pavialičylisia z druhoha pamieru da siomaha. Mahčyma, pryčynaj stała pryščepka ad karanavirusa
Paśla pieršaj dozy Pfizer pacyjenta adčuła pakołvańnie ŭ hrudziach, a paśla zaŭvažyła ich imklivy rost. Druhaja pryščepka paskoryła praces.
U časopisie Journal of the American Society of Plastic Surgeons vučonyja apisali redki vypadak hihantamastyi, jaki sama pacyjentka źviazvaje z uviadzieńniem vakcyny Pfizer suprać COVID-19.
Hihantamastyja — heta patałahičny stan, pry jakim adbyvajecca praźmierny rost małočnych załoz. Patałohija moža raźvicca bieź jakich-niebudź vidavočnych pryčyn u pieryjad pałavoha paśpiavańnia abo padčas ciažarnaści. Jaje moža spravakavać pryjom lekaŭ abo narkotykaŭ. Isnuje i idyjapatyčnaja hihantamastyja, kali pryčyna nieviadomaja.
Śpiecyjalisty taksama źviartajuć uvahu, što ŭ vielmi redkich vypadkach hihantamastyja moža być vyklikana takim redkim zachvorvańniem jak psieŭdaanhiamatoznaja (što aznačaje «padobnaja da kryvianosnych sasudaŭ») hipierpłazija stromy (PASH) — dabrajakasnym novaŭtvareńniem małočnaj załozy.
Hety stan charaktaryzujecca zališnim razrastańniem fibroznaj (złučalnaj) tkanki ŭ małočnych załozach. Zvyčajna heta źviazana z pavyšanym uzroŭniem harmonaŭ estrahienu i prahiesteronu.
U bolšaści pacyjentak PASH nie vyklikaje nijakich simptomaŭ i čaściej za ŭsio vyjaŭlajecca vypadkova, naprykład, pry daśledavańni inšych zachvorvańniaŭ małočnych załoz. Adnak viadoma kala 20 vypadkaŭ, kali PASH pryviała da dvuchbakovaj hihantamastyi.
Aŭtary artykuła adznačajuć, što vypadak, jaki adbyŭsia z 19-hadovaj dziaŭčynaj, prymušaje zadumacca ab mahčymaj suviazi pamiž vakcynaj Pfizer, hihantamastyjaj i PASH.
Jak paviedamlajecca, dziaŭčyna, jakaja nikoli nie naradžała, u vieraśni 2022 hoda atrymała pieršuju dozu vakcyny Pfizer. U jaje miedycynskaj historyi nie było vyjaŭlena nijakich adchileńniaŭ, a analizy kryvi nie pakazali harmanalnych parušeńniaŭ.
Praz tydzień paśla vakcynacyi pacyjentka adčuła pakołvańnie ŭ hrudziach, a paśla zaŭvažyła ich imklivy rost. Druhaja pryščepka paskoryła praces. U vyniku za 6 miesiacaŭ pamier jaje hrudziej pavialičyŭsia z 2 (V) da 7 (GGG).
Padčas miedycynskaha ahladu hrudziej nie było vyjaŭlena nijakich prykmiet puchlin abo raspaŭsiudžvańnia zachvorvańnia na limfatyčnyja vuzły. Ultrahukavaja dyjahnostyka i kampjutarnaja tamahrafija hrudnoj kletki paćvierdzili značnaje dvuchbakovaje pavieličeńnie hrudziej, a bijapsija pakazała na fibraepitelnyja źmieny (dabrajakasny zališni rost tkanak). Daktary pasprabavali lačeńnie steroidami i antybijotykami, ale heta nie dapamahło.
Praz 11 miesiacaŭ paśla vakcynacyi, kali na praciahu 5 miesiacaŭ nie nazirałasia dalejšaha rostu hrudziej, pacyjentcy zrabili apieracyju pa ich pamianšeńni.
Paśla apieracyi patołahi paćvierdzili, što tkanka małočnych załoz była hipiertrafiravanaja i ŭtrymlivała vyrazna akreślenyja ŭčastki PASH u abiedźviuch hrudziach. Masa vydalenaj tkanki ź levaj hrudzi skłała 1906 hramaŭ, z pravaj — 1664 hrama.
Praź piać miesiacaŭ paśla apieracyi ŭ pacyjentki nazirałasia asimietryja hrudziej i praźmiernaja pihmientacyja areoł. Rost małočnych załoz bolš nie adnaŭlaŭsia. Paviedamlajecca, što abmiarkoŭvajecca mahčymaść paŭtornaha pamianšeńnia hrudziej, kab prybrać asimietryju i viarnuć pacyjentcy jaje raniejšy pamier.
Aŭtary artykuła adznačajuć nieabchodnaść dadatkovych daśledavańniaŭ dla taho, kab lepš zrazumieć pryčyny PASH, udakładnić kłasifikacyju hihantamastyi i razabracca ŭ mahčymych jaje suviaziach z vakcynacyjaj.
Na abiedzie Łukašenki i Si Czińpina prysutničała i adzinaja dačka kitajskaha lidara11
Kamientary