Što za zahadkavyja drony rajami lotajuć nad ZŠA?

Temaj burnych dyskusij u ZŠA staŭ nievytłumačalny rost kolkaści bieśpiłotnikaŭ u niebie nad niekalkimi štatami ZŠA na ŭschodnim uźbiarežžy.

Dzie bačyli drony

Jak piša BBC, paviedamleńni ab bieśpiłotnikach pastupali z roznych štataŭ, siarod ich Ńju-Jork, Masačusets i Piensilvanija.

Pavodle danych Fiederalnaha ŭpraŭleńnia hramadzianskaj avijacyi, upieršyniu hrupy dronaŭ byli zafiksavanyja 18 listapada ŭ Ńju-Džersi. Tam na praciahu niekalkich dzion jany łunali pablizu «Arsienała Pikacini» — sakretnaha vajskova-daśledčaha centra, a taksama pobač z polem dla holfa, jaki naležyć abranamu prezidentu Donaldu Trampu ŭ horadzie Biedminster.

U Ahajo vyjaŭleńnie bieśpiłotnikaŭ pryviało da zakryćcia prykładna na hadzinu ŭ piatnicu ŭviečary 13 śniežnia bazy VPS «Rajt-Patersan».

U Kanektykucie sistemy vyjaŭleńnia bieśpiłotnikaŭ byli aktyvavanyja ŭ rajonie haradoŭ Hrotan i Ńju-Łondan, dzie raźmieščany, siarod inšaha, baza amierykanskich padvodnych łodak i zavod, jaki zajmajecca vytvorčaściu submaryn.

Besides the drone sightings, people are also reporting seeing mysterious orbs in New Jersey and other parts of the East Coast.#Orbs #Drones #NewJerseyUFO #UFO pic.twitter.com/nGiasEz9Yn

— ∼Marietta (@MariettaDaviz) December 14, 2024

Adno ź videa, na jakim zafiksavany tajamničy palot drona. Krynica: MariettaDaviz /Ch

Što ŭłady kažuć pra drony

Jak piša CNN, pradstaŭnik Fiederalnaha biuro rasśledavańniaŭ na bryfinhu ŭ subotu 14 śniežnia raskazaŭ, što na ich liniju davieru pastupiła bolš za 5000 zvarotaŭ. Adnak mienš za sotniu pryviali da začepak, jakija «ličacca hodnymi dalejšaha rasśledavańnia».

Pa jaho słovach, zaraz va ŭładaŭ niama nijakich dokazaŭ, jakija b paćviardžali «bujnamaštabnuju dziejnaść» dronaŭ. Pradstaŭnik FBR padkreśliŭ, što reakcyja na paviedamleńni ab bieśpiłotnikach akazałasia «krychu praźmiernaj», ale ihnaravać ich nielha.

Jak piša The Wall Street Journal, fiederalnaje biuro rasśledavańniaŭ i Ministerstva ŭnutranaj biaśpieki ŭ sumiesnaj zajavie paviedamili, što niama dokazaŭ pahrozy dla nacyjanalnaj abo hramadskaj biaśpieki. A šmat z abjektaŭ, jakija nasielnictva identyfikavała jak bieśpiłotniki, na samoj spravie źjaŭlajucca piłatavanymi latalnymi aparatami.

Jakija praviły adnosna dronaŭ u ZŠA

Pa infarmacyi CNN, u Fiederalnaj avijacyjnaj administracyi ZŠA zarehistravana kala 792 tysiač bieśpiłotnikaŭ. Heta kolkaść amal paroŭnu padzialajecca na aparaty kamiercyjnaha i amatarskaha vykarystańnia.

Jak tłumačyć WSJ, u ZŠA paloty dronaŭ na vyšyni nižejšaj za 120 mietraŭ dazvoleny ŭ bolšaści miescaŭ. Dla amataraŭ palotaŭ patrabujecca prajści bazavy test pa biaśpiecy i vykonvać prostyja praviły, takija jak paźbiahańnie kantralavanych pavietranych prastor vakoł aeraportaŭ dy inšych pavietranych sudoŭ.

U niekatorych miescach, naprykład, u Ńju-Jorku, dla palotaŭ unačy apieratar pavinien mieć siertyfikat piłota dronaŭ, a sam aparat pavinien być abstalavany śpiecyjalnymi ahniami.

U niadzielu 15 śniežnia ministr unutranaj biaśpieki ZŠA Alechandra Majorkas zajaviŭ, što rost kolkaści paviedamleńniaŭ ab bieśpiłotnikach moža być źviazany z tym, što ŭ minułym hodzie fiederalnyja zakony pačali dazvalać ich paloty ŭ načny čas.

Jak adznačajuć žurnalisty, choć Fiederalnaja avijacyjnaja administracyja patrabuje papiaredniaha dazvołu na palot pablizu aeraportaŭ, nie ŭsie apieratary bieśpiłotnikaŭ prytrymlivajucca hetych pravił.

Čamu drony nie źbivajuć?

Šerah kanhresmienaŭ miarkujuć, što za zapuskam bieśpiłotnikaŭ stajać Kitaj, Rasija ci Iran i prapanujuć źbivać i analizavać hetyja BPŁA, kab vyznačyć ich pachodžańnie i namiery.

Pientahon i Bieły dom nastojvajuć na tym, što hetyja abjekty nie zamiežnaha pachodžańnia. Tak, ministr unutranaj biaśpieki paviedamiŭ, što jamu nieviadoma «pra datyčnaść inšych dziaržaŭ da dronaŭ, vyjaŭlenych na paŭnočnym uschodzie». «My pilna rasśledujem hetaje pytańnie», — skazaŭ jon.

Abrany prezident Donald Tramp vykazaŭ mierkavańnie, što bieśpiłotniki nie mahli lotać bieź viedama ŭrada. «Niachaj hramadskaść daviedajecca, i nieadkładna, — napisaŭ jon u svajoj sacyjalnaj płatformie Truth Social. — U advarotnym vypadku ich treba źbivać».

Majk Uołc, pryznačany Trampam daradcam pa nacyjanalnaj biaśpiecy, prapanavaŭ stvaryć amierykanski anałah izrailskaj sistemy «Žalezny kupał» dla abarony ad pahroz z pavietra. Adnak fiederalnyja ŭłady papiaredžvajuć, što źniščeńnie dronaŭ moža być niebiaśpiečnym dla hramadzian i vyklikać ceły šerah jurydyčnych uskładnieńniaŭ.

«Chaču zapeŭnić amierykanskuju hramadskaść, što fiederalny ŭrad nakiravaŭ dadatkovyja resursy, piersanał i technałohii, kab dapamahčy palicyi štata Ńju-Džersi ŭ rasśledavańni vypadkaŭ ź bieśpiłotnikami», — cytuje WSJ słovy ministra ŭnutranaj biaśpieki.

U svaju čarhu hubiernatar štata Ńju-Jork Ketlin Chokuł paviedamiła, što fiederalnyja ŭłady nakiroŭvajuć u Ńju-Jork «sučasnuju sistemu vyjaŭleńnia bieśpiłotnikaŭ» dla sadziejničańnia pracy pravaachoŭnych orhanaŭ štata i fiederalnych uładaŭ.

Pa infarmacyi CNN, sistemy vyjaŭleńnia i sačeńnia za bieśpiłotnikami ministerstva abarony ZŠA nakiruje na svaje vajskovyja abjekty ŭ Ńju-Džersi — vajenna-marskuju bazu Erł i «Arsienał Pikacini».

Ekśpierty paviedamlajuć, što ZŠA raspracoŭvajuć płany na vypadak realnaj pahrozy, ale hetyja miery pakul razhladajucca jak «krajniaja nieabchodnaść». U toj ža čas ułady zapeŭnivajuć, što zaraz niama padstaŭ dla taho, kab pierachodzić da bolš žorstkich dziejańniaŭ.

• 1
• 0
• 7
• 7
• 0
• 0
• 0
• 0