Biełaruski IT-pradprymalnik Machaniok raskazaŭ, čamu vybraŭ dla žyćcia darahi Ńju-Jork
Biełaruski ajcišnik i vienčurny inviestar Ihar Machaniok u novym vypusku tok-šou «Žyćcio-malina» raskazaŭ, jak stavicca da hrošaj i što dumaje pra budučyniu Biełarusi.
Pra hrošy i žyćcio ŭ Ńju-Jorku
«Zhadvajecca piramida Masłou. Kali ty možaš sabie dazvolić padarožničać, navat ekanom-kłasam samalotami i prosta chadzić u restarany, to hrošy pavinny pierastać być asnoŭnaj matyvacyjaj.
Ty ŭžo možaš sabie dazvolić šmat jakija z uzroŭniaŭ hetaj piramidy Masłou. I davaj užo šukać niešta inšaje. (…) Ty ŭžo dumaješ, jak mieć niejki pazityŭny ŭpłyŭ na śviet, hramadstva».
Pa słovach Machańka, kapitalizm — taja sistema, jakaja dazvalaje praz pośpiech i hrošy realizavać svaje mety.
«Viadoma, kali ŭ mianie budzie bolš finansavaha pośpiechu, heta mnie dazvolić mieć bolš mahčymaściej zrabić śviet lepiej».
Ciapier Ihar Machaniok ź siamjoj žyvie ŭ Ńju-Jorku, dzie košt žyćcia vielmi vysoki. Jon tłumačyć svoj vybar nastupnym čynam:
«Ja zaŭvažyŭ, što ludzi zvyčajna pavyšajuć svaje vydatki zhodna z tym, što jany zarablajuć. (…)
Kab my ź siamjoj pierajechali ŭ niejkaje miesca ź nizkim koštam žyćcia, to, napeŭna, nam by chapiła hrošaj na šmat hadoŭ. Ale heta budzie niecikava. Tamu što heta i pra pracu, i pra ŭsio astatniaje vakoł pracy. Naprykład, ludzi, razmovy… Heta ŭsio ŭ cikavych miescach — jak Ńju-Jork. Čamu ŭ Ńju-Jorku doraha žyć? Adna z pryčyn — tamu što tam žyvuć cikavyja ludzi».
Jak sabraŭ vienčurny fond na $23 miljony
Vienčurnaja kampanija Geek Ventures Ihara Machańka, zapuščanaja ŭ minułym hodzie, inviestuje ŭ startapy mihrantaŭ, jakija pierajazdžajuć u ZŠA.
Takuju aryjentacyju pradprymalnik tłumačyć asablivaściami mihrantaŭ.
«Toj, chto kudyści pierajechaŭ, vyrašyŭ pakinuć usio, što ŭ jaho było, i pajechać u inšy bok, prajšoŭ praź ciažkaści, dakazvaje, što jon moža pieraadoleć ciažkaści i prajści praź pieraškody i dajści da svajho punktu pryznačeńnia.
U ludziej, jakija hetaha nie rabili, značna mienš jość dakazanaha ŭmieńnia chastlić. My bačym paśpiachovyja kampanii, u jakich jość emihranty-suzasnavalniki.
Emihranty majuć bolšy statystyčny pośpiech, čym narodžanyja ŭ Amierycy ludzi».
Jak tłumačyć Machaniok, hrošy dla Geek Ventures jon źbiraŭ pa svaich znajomych, bo pa zakonie vienčurnyja fondy nie majuć prava abviaščać pra zbor inviestycyj.
Spačatku płanavałasia sabrać $10 miljonaŭ. Ale cikavaść vyjaviłasia vyšejšaj za čakanuju, i ŭrešcie atrymałasia sabrać $23 miljony.
«Z kožnym inviestaram, jakich u nas niekalki dziasiatkaŭ, u mianie vielmi piersanalnyja adnosiny. Ja źjaŭlajusia ściuardam ich hrošaj — rablu ŭsio, kab jany atrymali prybytak na svaje hrošy, a nie zhubili ich», — kaža Machaniok.
Pra pracu i płany na staraść
Machaniok rady, što znajšoŭ pracu, jakaja źjaŭlajecca jaho «ŭłasnym enierdžajzieram».
«Ja spadziajusia, što bolš i bolš ludziej buduć mieć takuju pracu, jakaja daje im enierhiju, a nie adbiraje», — havoryć pradprymalnik i adznačaje, što ŭ jaho praca «ciažkaja, ale dobraja».
«Ciažkaja ŭ tym sensie, što dobra było b bolš hadzin paspać. Ale dakładna jana nie nudnaja i nie drennaja».
Adnosna płanaŭ na staraść pradprymalnik zaŭvažaje:
«Ja adnošusia da toj vialikaj kolkaści ludziej, jakim chaciełasia b mieć niejkaje svajo fizičnaje miesca nakštałt svajho bara. Mnie padabajecca ŭsio, što źviazana z historyjaj. I kali b była mahčymaść mieć niejki svoj muziej ci niejki histaryčny zamak — voś było b prykolna.
Ale heta mary, jakija zastanucca marami, bo na samoj spravie mianie enierdžajzić toje, što prynosić vielmi dakładny impakt, tam, dzie ja mahu vykarystoŭvać svaje zdolnaści i vopyt. Ja dumaju, jašče na dziasiatki hadoŭ heta budzie inviestavańnie».
Biełaruś — heta junikorn, jaki da siońnia žyvie
Pradprymalnik pahadžajecca, što los Biełarusi padobny da startapu, jaki nasupierak usiamu zmoh dakazać svaju žyćciazdolnaść:
«Vielmi šmat čaho było suprać biełarusaŭ i suprać Biełarusi. U 1930-ja hady ŭ nas šmat hienafondu było prosta vykašana. I ŭ 1940-ja taksama. I pry staliniźmie, i ŭ Druhuju suśvietnuju vajnu. A potym šmat chto z tych, chto vyžyŭ, źjechali. I potym 1990-ja prosta prybili ŭsio nacyjanalnaje adradžeńnie.
I ŭsio stała pa-inšamu. I znoŭku była novaja chvala adjezdu tych, chto zrazumieŭ, što ŭ Biełarusi biznes nie pabudavać».
«Budziem hladzieć, što budzie dalej, i, moža, budziem niejak dapamahać u pieršuju čarhu ludziam z dyjaspary. (…) I ja maru sa svajho boku, kab biełaruski junikorn praciahvaŭ być i biełaruskim, i junikornam».
Pradprymalnik ličyć, što nielha havaryć, što los Biełarusi zaležyć ad palityčnaha kiraŭnictva:
«Jakoje tam kiraŭnictva… Toje, što adbyvałasia dobraje i pazityŭnaje, adbyvałasia nasupierak. Kali my razmaŭlajem zaraz, ja kažu pra Biełaruś zvonku, pra biełarusaŭ, jakija za miažoj. U biełarusaŭ za miažoj niama nijakaha kiraŭnictva. Tamu ŭsio treba brać u svaje ruki».
Ciapier čytajuć
«Ty jašče nie stamiłasia?» Apublikavali pierapisku Mielnikavaj, dzie joj pahražali7
Kamientary