Karpienka paabiacaŭ raskazać pra vyniki zboru podpisaŭ na nastupnym tydni
Siońnia — apošni dzień zboru podpisaŭ.
Praces zboru podpisaŭ u padtrymku vyłučeńnia kandydataŭ u prezidenty prajšoŭ spakojna, u adpaviednaści z zakanadaŭstvam. Pra heta paviedamiŭ žurnalistam u Homieli staršynia CVK Ihar Karpienka, piša BiełTA.
«Siońnia (6 śniežnia) jašče idzie apošni dzień zboru podpisaŭ, i siońnia nieabchodna hetyja podpisy ŭžo padać u terytaryjalnyja kamisii dla taho, kab potym jany mahli prystupić da pravierki podpisaŭ.
Pakul nie mahu dać statystyčnyja danyja, dumaju, što ŭ paniadziełak-aŭtorak (9—10 śniežnia) my atrymajem pieršuju infarmacyju i raźmieścim tradycyjna na sajcie CVK pa kolkaści zdadzienych podpisaŭ», — adznačyŭ kiraŭnik CVK.
Pa jaho słovach, na etapie zboru podpisaŭ aficyjnych skarhaŭ, pretenzij nie było.
«Byli niekatoryja zvanki ŭ kamisiju, niešta ŭdakładniali, niešta pytalisia, niešta my tłumačyli, ale aficyjnych skarhaŭ, jakija nieabchodna było b razhladać kamisijna albo na ŭzroŭni aparata kamisii, pakul nie było. Tamu možna skazać, što praces zboru podpisaŭ prajšoŭ spakojna, u adpaviednaści ź dziejučym zakanadaŭstvam», — padkreśliŭ staršynia CVK.
Jon źviarnuŭ uvahu: praces pravierki padpisnych listoŭ zojmie niekatory čas.
«Paralelna pretendenty pavinny buduć padrychtavać tyja dakumienty, jakija nieabchodnyja dla rehistracyi ŭ jakaści kandydataŭ, i da 21 śniežnia pavinny padać u Centralnuju vybarčuju kamisiju hetyja dakumienty. Dumaju, da hetaha času my atrymajem užo pratakoły abłasnych i Minskaj haradskoj kamisij pa kolkaści podpisaŭ, sabranych za taho ci inšaha kandydata.
I płanujem pravieści ŭžo praceduru rehistracyi — pakul aryjentyrovačna viadziem razmovu ab, mahčyma, 23 śniežnia.
Znoŭ ža heta budzie zaležać ad taho, jak pretendenty padaduć svaje dakumienty. Kali chtości ŭprytyk budzie padavać, to spatrebicca niejki čas dla taho, kab pravieści adpaviednuju pravierku hetych dakumientaŭ. Va ŭsiakim vypadku, dumaju, da kanca śniežnia my vyznačymsia pa kolkaści kandydataŭ, jakija buduć zarehistravanyja», — rastłumačyŭ Ihar Karpienka.
Jon nahadaŭ, što z 1 studzienia pačniecca praces ahitacyi, jaki praciahniecca ŭklučna pa 25 studzienia.
Kamientary
dy što tam.. jak pryznačyli staršynioj cvk, tak i nie bačna jaho