Były pamočnik Kanapackaj nastojvaje: u jaje byŭ niamiecki dazvoł na žycharstva, tamu rehistravać jaje kandydatkaj nielha

Raniej «Naša Niva» paviedamlała, što ŭ svoj čas Hanna Kanapackaja mieła niamiecki dazvoł na žycharstva. U hetym niama ničoha ni kryminalnaha, ni kiepskaha, sotni miljonaŭ ludziej na śviecie časova žyvuć nie ŭ svaich rodnych krainach, ale zhodna ź ciapierašnimi Kanstytucyjaj i Vybarčym kodeksam, isnavańnie takoha dakumienta navat u minułym nie daje joj prava ciapier być kandydatkaj u prezidentki.

Hanna rašuča abvierhła hetuju infarmacyju ŭ svaich sacyjalnych sietkach: «Ja nikoli nie vałodała DNŽ nijakaj inšaj krainy, u tym liku i Hiermanii. Bolš za toje, u nazvany pieryjad u mianie nie było navat niamieckaj vizy. Nu a toje, što maje dzieci atrymlivali tady adukacyju ŭ Hiermanii, nie źjaŭlajecca pravaparušeńniem pa vyznačeńni. Nazvanaja akaličnaść była pradmietam bolš čym starannaha vyvučeńnia kampietentnych orhanaŭ jak u pieryjad minułaj vybarčaj kampanii, tak i paźniej», — śćviardžaje Kanapackaja.

Adnak były pamočnik Hanny ŭ časy jaje deputactva Dzianis Cichanienka źviartaje ŭvahu na toje, što dzieci Kanapackaj u siaredzinie 2010-ch byli niepaŭnaletnimi i nie mahli vučycca ŭ Hiermanii biez adnaho z baćkoŭ ci apiekuna:

«Niepaŭnaletnija dzieci, nie hramadzianie Hiermanii nie mohuć prosta tak uziać i pajści ŭ niamieckuju škołu. Dla hetaha ŭ ich pavinna być prapiska, a jana niemahčymaja biez najaŭnaści dazvołu na žycharstva. Samastojna dzieci nie mohuć atrymać hety dakumient (jak i žyć u Hiermanii), jon vydajecca na padstavie dazvołu na žycharstva adnaho z baćkoŭ, jaki i mieła Hanna Kanapackaja padčas navučańnia dziaciej u Hiermanii».

Pavialičyć

Pavialičyć

Alaksiej Kanapacki — toj samy małady čałaviek, jaki ŭ 2020 hodzie adznačyŭsia danosam na praciŭnikaŭ Alaksandra Łukašenki.

Čytajcie taksama: U 2020-m syn Hanny Kanapackaj zvaniŭ u milicyju z danosam na minčukoŭ, jakija raźviešvali stužki

Pa słovach Cichanienki, padčas ich sumiesnych pajezdak za miažu ŭ 2017—2019 hadach Hanna zaŭsiody davała pamiežnikam na kantroli mienavita svoj DNŽ, jaki ŭ jaje jašče tady dziejničaŭ.

Z byłym mužam, Dźmitryjem Kanapackim, Hanna raźviałasia ŭ 2008 hodzie. Dziećmi ŭvieś hety čas u asnoŭnym zajmałasia jana sama. Były muž siońnia ŭznačalvaje kampaniju «Biełsnab Kamplekt», dylera sielskahaspadarčaj techniki ŭ Kazachstanie i Rasii (u tym liku i biełaruskaj techniki).

Najaŭnaść DNŽ u Hanny ŭ minułym nam paćvierdziła i jašče adna krynica.

Zrešty, rašučaść, ź jakoj prałukašenkaŭskija kanały kinulisia abaraniać Kanapackuju, śviedčyć ab tym, što jaje ŭdzieł u pieradvybarčaj honcy byŭ uzhodnieny źvierchu. A značyć, chutčej za ŭsio, Centrvybarkam zapluščyć vočy na toje, što kaliści ŭ jaje byŭ «zabaronieny» dakumient. Zapasnych Kanapackich u Alaksandra Łukašenki niama.

• 5
• 0
• 22
• 8
• 0
• 0
• 5
• 0