Mazhavy centr Kramla niezadavoleny, što Zachad pierastaŭ vieścisia na jadzierny šantaž. Patrabuje «viartańnia strachu»
Tak pišuć analityki Vyšejšaj škoły ekanomiki (VŠE) — centra radykalnych idej Kramla — u svaim zakrytym dakładzie, jaki byŭ razasłany ŭ MZS i inšyja ŭradavyja struktury Rasii. Dakumient prapanuje śpis mier, kab «iznoŭ viarnuć Zachad u stan strachu i padatnaści».
Rasijskim dypłamatam i ŭradavym strukturam «naležyć bolš detalova i mocna» pahražać Zachadu prymianieńniem jadziernaj zbroi, bo raniejšyja zajavy Maskvy pierastali ŭpłyvać na amierykanskija i jeŭrapiejskija elity. Takaja rekamiendacyja źmiaščajecca ŭ niepubličnym dakładzie Instytuta suśvietnaj vajennaj ekanomiki i stratehii Vyšejšaj škoły ekanomiki (VŠE), jaki byŭ pieradadzieny MZS RF, paviedamlaje rasijskaja dziaržaŭnaja hazieta «Viedomosti» sa spasyłkaj na sam dakumient.
U śpisie jaho aŭtaraŭ, jak udakładniajuć «Viedomosti», paznačany prafiesar VŠE Dźmitryj Trenin, eks-kamandujučy Cichaakijanskim fłotam Rasii Siarhiej Avakianc i palitołah Siarhiej Karahanaŭ, jaki ŭletku prapanoŭvaŭ Uładzimiru Pucinu «pryniać bolš rašučyja kroki pa šlachu eskałacyi padobna Usiavyšniamu, jaki za šałapuctva i raspustu źniščyŭ ahniavym daždžom Sadom i Hamoru».
«Hałoŭnaja prablema ŭ ciapierašnim stanie spraŭ — niaŭdačy Rasii ŭ halinie jadziernaha strymlivańnia, nieabchodnaść jakoha ŭ 1990-ja hady admaŭlałasia. Vidavočny vynik hetaha — pašyreńnie NATA, jakoje pryviało da kanfliktu va Ukrainie. U vyniku hetaha jadziernaje strymlivańnie padčas vajennaj apieracyi Rasii spracavała tolki častkova — ZŠA i ich sajuźniki nie ŭmiašalisia napramuju, ale praciahvajuć pastaŭlać Kijevu zbroju. Efiektyŭnaść rasijskich jadziernych pahroz padaje», — adznačyli kramloŭskija analityki.
Na ich dumku, jadziernyja harantyi biaśpieki ZŠA, jakija dajucca sajuźnikam u Jeŭropie, źjaŭlajucca blefam, a tamu Rasii varta nahadać Zachadu pra strach pierad pramym supraćstajańniem z Rasijaj i bolš detalova rastłumačyć, jakija kroki Kreml moža raspačać u adkaz na tyja ci inšyja eskałacyjnyja dziejańni Zachadu, pieradajuć «Viedomosti».
Tak, aŭtary dakłada VŠE prapanoŭvajuć zamianić u jadziernaj daktrynie Rasii tezis «pra prymianieńnie jadziernaj zbroi tolki ŭ vypadku pahrozy samamu isnavańniu dziaržavy» na farmuloŭku ab «prymianieńni zbroi pry pahrozie stratehična važnym intaresam dziaržavy i jaho nasielnictvu», dadaŭšy pad stratehičnyja intaresy niedatykalnaść Biełarusi (apošni punkt byŭ dadadzieny Pucinym u jadziernuju daktrynu zusim niadaŭna).
Aproč hetaha, kramloŭskija analityki prapanoŭvajuć nanieści demanstracyjnyja jadziernyja ŭdary pa biaźludnych terytoryjach, kab «vyklikać strach u Zachadu», — pišuć «Viedomosti».
Nahadajem, što jašče ŭ pačatku hoda ŭkrainskija chakiery ŭzłamali elektronnuju poštu ludziej ź blizkaha asiarodździa Dźmitryja Miadźviedzieva i na praciahu 6 miesiacaŭ nazirali za ich pierapiskami pamiž saboj.
Siarod pierachoplenych fajłaŭ akazaŭsia dakumient ab rekamiendacyjach pa dziaržaŭnaj palitycy Rasii ŭ Arktyčnym rehijonie, padrychtavany analitykami ŭsio toj ža Vyšejšaj škoły ekanomiki.
U rekamiendacyjach VŠE prapanavałasia «istotna pavialičyć» marskuju dziaržaŭnuju terytoryju RF u Arktycy šlacham «udakładnieńnia» linij najaŭnych miežaŭ, a taksama raźmiaścić u Arktycy jadziernuju zbroju «dla vajskovaha kantrolu niedružalubnych dziaržaŭ u rehijonie».
Charakterna, što ŭ toj ža čas Rasija publična vykazała namier «udakładnić» svaje miežy ŭ Bałtyjskim mory i tym samym jurydyčna dałučyć da siabie častku marskich terytoryj bałtyjskich krain.
Kamientary