ZŠA nanieśli novyja ŭdary pa Iranie, Iran u adkaz atakavaŭ amierykanskija bazy ŭ rehijonie
U noč na 11 červienia ZŠA praviali novuju bujnuju pavietranuju apieracyju ŭ Iranie, źniščajučy kamandnyja punkty i vajskovuju infrastrukturu. Tehieran adkazaŭ dźviuma chvalami rakietnych udaraŭ pa troch amierykanskich avijabazach u rehijonie, piša VVS.
Amierykanskija vajskoŭcy nanieśli sieryju novych udaraŭ pa celach na terytoryi Irana, paviedamiła Centralnaje kamandavańnie ZŠA (CENTCOM).
«Siły Centralnaha kamandavańnia ZŠA pačali nanosić dadatkovyja ŭdary ŭ metach samaabarony pa niekalkich celach u Iranie pa ŭkazańni hałoŭnakamandujučaha. Hetyja ŭdary źjaŭlajucca adkazam na nieapraŭdanuju i praciahłuju ahresiju Irana», — padkreśliła kamandavańnie.
ŚMI paviedamlali pra vybuchi prynamsi ŭ šaści rajonach Irana.
Pavodle źviestak partała Axios, jaki spasyłajecca na vajskovyja krynicy, usie atakavanyja celi znachodzilisia na poŭdni Irana i ŭklučali ŭ siabie sistemy supraćpavietranaj abarony, radary i padraździaleńni kamandavańnia i kiravańnia bieśpiłotnikami.
CENTCOM paźniej paviedamiŭ, što novyja ŭdary pa celach u Iranie zavieršany.
U adkaz Iran zajaviŭ, što atakavaŭ amierykanskija vajskovyja bazy ŭ Bachrejnie i Kuviejcie — tyja ž dźvie celi, jakija stali abjektam uzajemnych iranskich udaraŭ napiaredadni.
«VKS i VMS KVIR praviali dźvie chvali apieracyj, udaryŭšy i źniščyŭšy 18 klučavych amierykanskich vajennych celaŭ na avijabazach Al-Salem, Achmad-al-Džabier i Šejch-Isa», — paviedamiŭ telekanał Press TV.
Paviedamlajecca, što na bazie ZŠA ŭ Bachrejnie byli atakavanyja «anteny suviazi i radyjołakacyjnyja srodki sistem Patriot».
Taksama ŭ adkaz na novyja ataki ZŠA Iran papiaredziŭ, što ŭsie sudny, uklučajučy naftavyja tankiery i handlovyja sudy, jakija pasprabujuć prajści praz Armuzski praliŭ, buduć atakavanyja.
Nieŭzabavie paśla pačatku novaj chvali bambavańniaŭ dziaržaŭnyja ŚMI Irana paviedamili sa spasyłkaj na vajskoŭcaŭ, što Iran nanios udary pa dvuch kamiercyjnych sudach, jakija sprabavali prajści praz Armuzski praliŭ.
Iranskija dziaržaŭnyja ŚMI taksama paviedamili, što Iran atakavaŭ rakietami i bieśpiłotnikami karabli VMS ZŠA, jakija znachodzilisia pablizu Armuzskaha praliva.
Vybuchi byli čuvać na vostravie Kiešm u Piersidskim zalivie i ŭ šerahu haradoŭ.
Adnak Centralnaje kamandavańnie ZŠA abvierhła paviedamleńni pra ataki na amierykanskija vajennyja karabli ŭ Armuzskim pralivie.
«Nivodzin z karabloŭ nie padvierhsia ŭdaru», — adznačyli ŭ CENTCOM, nazvaŭšy śćviardžeńni iranskich ŚMI «iłžyvymi».
Amierykanskaje vajennaje kamandavańnie taksama abvierhła zajavu Korpusa vartavych isłamskaj revalucyi (KSIR) pra zakryćcio Armuzskaha praliva.
«Kamiercyjnyja sudny siońnia nočču praciahvajuć uvachodzić i vychodzić praz Armuzski praliŭ», — ukazali ŭ CENTCOM.
Raniej paśla abmienu ŭdarami pamiž amierykanskimi i iranskimi siłami ŭ rajonie Piersidskaha zaliva papiaredniaj nočču prezident ZŠA Donald Tramp paabiacaŭ znoŭ «mahutna ŭdaryć» pa Iranie.
U noč na sieradu ZŠA nanieśli pa Iranie ŭdary, jakija, jak zajaviŭ Tramp, stali adkazam na źbićcio irancami amierykanskaha viertalota nad Armuzskim pralivam. Korpus vartavych isłamskaj revalucyi ŭ adkaz zajaviŭ pra ŭdary pa celach na amierykanskich vajskovych bazach u rehijonie.
U sieradu Tramp napisaŭ u svajoj sacsietcy: «Jany zanadta zaciahnuli pieramovy pra ździełku, jakaja mahła b być cudoŭnaj dla ich, i ciapier im pryjdziecca zapłacić za heta!!!» Dalej Tramp čarhovy raz zajaviŭ, što ŭ vajennych adnosinach Iran całkam razhromleny.
Pres-sakratar MZS Irana Esmaił Bakai abvinavaciŭ ZŠA ŭ tym, što jany škodziać chodu pieramoŭ «svaimi supiarečlivymi zajavami, pastajannaj źmienaj pazicyj i patrabavańniaŭ i, što horš za ŭsio, pastajannymi parušeńniami pieramirja».
Pavodle słoŭ Bakai, Iran zaraz aceńvaje novuju situacyju i pry hetym ličyć, što dla pieramoŭ patrebna chacia b minimalnaja stabilnaść.
Adkaz Irana i ŭdar ZŠA pa tankiery
KVIR zajaviŭ, što papiaredniaj nočču zapuściŭ rakiety i drony pa 21 celi na amierykanskich bazach u rehijonie, u Bachrejnie i Iardanii. Armija Kuviejta paviedamiła, što joj taksama daviałosia adbivać iranski nalot.
Jak paźniej paviedamiła ahienctva Reuters sa spasyłkaj na ananimnuju aficyjnuju asobu z ZŠA, amal usie iranskija rakiety byli pierachoplenyja, i źviestak pra achviary iranskich udaraŭ niama.
Adnosna źbitaha viertalota Apache Tramp, pa paviedamleńni Fox News, skazaŭ, što jon byŭ źbity na vielmi małoj vyšyni dronam.
Dva piłoty Apache byli padabranyja ŭ vadzie amierykanskim marskim dronam i zatym evakujavanyja inšym viertalotam.
Tym časam ułady Indyi ŭ sieradu zajavili, što ŭ vyniku ŭdaru pa handlovym sudnie Settebello pad ściaham Pałau ŭ Armuzskim pralivie kala amanskaha bieraha dva členy indyjskaj kamandy sudna źnikli bieź viestak, a astatnija 21 byli vyratavanyja.
Amierykanskija vajskoŭcy raniej zajavili, što nanieśli ŭdar pa tankieru, pakolki jon sprabavaŭ prarvać błakadu i vyvieźci naftu ź Irana. Pavodle słoŭ vajskoŭcaŭ, Settebello admoviŭsia padparadkoŭvacca ich zahadam, i amierykanski samalot vystraliŭ «vysokadakładnymi bojeprypasami» pa mašynnym adździaleńni sudna.
ZŠA ŭviali błakadu iranskich partoŭ paśla taho, jak Iran u adkaz na bambavańni z boku ZŠA i Izraila faktyčna pierakryŭ Armuzski praliŭ.
Settebello staŭ užo vośmym sudnam, pa jakim adkryvali ahoń amierykanskija vajskoŭcy.
Kamientary