Vahnieraŭcy na rasijskim «cieniavym fłocie» — nie tolki dla achovy hruzaŭ. Vyniki novaha rasśledavańnia

Supolnaje rasśledavańnie Süddeutsche Zeitung, teleradyjokampanii Norddeutscher Rundfunk (NDR), centra «Daśje» i płatformy Follow the Money vykryła maštabnuju schiemu vykarystańnia rasijskich najmitaŭ na sudach tak zvanaha «cieniavoha fłotu».

Padčas pracy nad materyjałam žurnalisty vydavali siabie za patencyjnych supracoŭnikaŭ rasijskaj naftavaj kampanii i pad vyhladam intervju pry pryjomie na pracu zmahli pahavaryć z čatyrma achoŭnikami.

Usiaho ŭ chodzie rasśledavańnia byli identyfikavanyja 83 čałavieki — supracoŭniki achovy, jakija znachodzilisia na borcie tankieraŭ u pieryjad ź lipienia 2023 pa krasavik 2026 hoda. 

Jak vyśvietlili žurnalisty, prynamsi 18 ź ich raniej vajavali ŭ składzie hrupy «Vahnier» u Siryi ci va Ukrainie. Piać čałaviek mieli dośvied pracy ŭ HRU abo FSB. Jašče 14 byli źviazanyja z kampanijami Moran Security Group abo «Redut». Apošniuju abvinavačvajuć u vajennych złačynstvach va Ukrainie. Moran śpiecyjalizujecca na marskoj achovie i maje ščylnyja suviazi ź Ministerstvam abarony RF, za što trapiła pad sankcyi ES.

Danyja pakazvajuć, što Rasija stała čaściej raźmiaščać achoŭnikaŭ na maršrutach praź Jeŭropu ź viasny 2025 hoda. Heta adbyłosia paśla šerahu incydentaŭ u Bałtyjskim mory, kali krainy rehijona pačali zatrymlivać padazronyja tankiery. Naprykład, na Kalady 2024 hoda Finlandyja aryštavała Eagle S paśla paškodžańnia padvodnaha kabiela. U krasaviku 2025 hoda Estonija z dapamohaj viertalotaŭ spyniła tankier Kiwala, jaki išoŭ bieź ściaha.

Pavialičyć

Praź miesiac estoncy sprabavali zatrymać tankier Jaguar, ale kapitan admoviŭsia spyniacca. Tady Rasija padniała ŭ pavietra źniščalnik dla supravadžeńnia sudna. Samalot navat parušyŭ pavietranuju prastoru Estonii.

Vahnieraŭcy kantralujuć i kapitana sudna, i ekipaž

Aficyjna hetyja ludzi ličacca na sudach technikami ci dapamožnym piersanałam, bo nie majuć nieabchodnych marskich kvalifikacyjnych paśviedčańniaŭ. Adnak ich realnaja funkcyja na borcie zaklučałasia ŭ kantroli nad kapitanam i ekipažam.

Adzin z achoŭnikaŭ u razmovie z žurnalistami paviedamiŭ, što ich pasadzili na karabli mienavita dla taho, kab kapitany «nie paddavalisia na pravakacyi» i nie dazvalali sudam adchilacca ad kursu. Akramia taho, jon dvojčy na dzień składaŭ spravazdačy, u jakich paviedamlaŭ pra miesca znachodžańnia sudna, jaho chutkaść, kirunak ruchu i situacyju na borcie.

Inšy supracoŭnik biaśpieki paćvierdziŭ, što jaho niepasrednyja abaviazki ŭklučali «nazirańnie za kamandaj, kapitanam i pieršym pamočnikam». Pavodle jaho słoŭ, da pracy na tankierach cieniavoha fłotu jon niekalki hadoŭ uznačalvaŭ hrupu asabistaj achovy ŭ adnoj z pryvatnych vajskovych kampanij u Siryi. Na sudnach jon zajmaŭsia vyjaŭleńniem ludziej, jakija pieradavali infarmacyju na bierah, vyśviatlaŭ, u čyich intaresach jany dziejničali i jakija mienavita źviestki pakidali pra karabiel.

Jak śćviardžaje surazmoŭca, nivodzin achoŭnik padčas svajoj źmieny nie pakidaŭ kapitanskaha mastka. Asabliva ŭ Ła-Manšy, dzie sustrakałasia nieźličonaja kolkaść patrulnych sudnaŭ i pastajanna pastupali zapyty ad prybiarežnych dziaržaŭ.

«Za ŭsim hetym treba vielmi ŭvažliva sačyć, bo niechta z aficeraŭ moža vypadkova vybałbatać niešta lišniaje», — cytuje vydańnie słovy adnaho z achoŭnikaŭ.

Inšy rasijski achoŭnik paćvierdziŭ hetyja słovy. Pavodle jaho słoŭ, kali zachodnija ŭłady źviartalisia da kapitanaŭ pa radyjosuviazi z patrabavańniem paviedamić infarmacyju pra hruz abo pra samo sudna, to «my patrabavali ad dziažurnaha aficera kateharyčna admaŭlacca nadavać takuju infarmacyju».

Analiz śpisaŭ ekipažaŭ tankieraŭ rasijskaha cieniavoha fłotu, praviedzieny žurnalistami, pakazvaje, što jany vielmi internacyjanalnyja. Kala 60 pracentaŭ marakoŭ — nie rasijanie. Jany pachodziać ź Indyi, Filipin, Kitaja i Mjanmy. Na tych rejsach, dzie prysutničali rasijskija achoŭniki, 66 pracentaŭ kapitanaŭ byli hramadzianami inšych krain, a nie Rasii.

Mienavita z-za takoj struktury piersanału rasijskija ŭłady paličyli nieabchodnaj prysutnaść «nahladčykaŭ», kab sistema abychodu sankcyj nie razburyłasia praź niełajalnaść kamandy.

Ad Sueca da Uść-Łuhi z kłapami

Pavodle vysnoŭ rasśledavańnia, schiema dziejańniaŭ zaŭsiody zastavałasia adnolkavaj. Supracoŭniki biaśpieki padymalisia na bort paśla prachodžańnia sudnam Sueckaha kanała ŭ Jehipcie i zastavalisia tam padčas rejsa praź Mižziemnaje mora, Atłantyčny akijan, Paŭnočnaje i Bałtyjskaje mory da rasijskich naftavych partoŭ Uść-Łuha abo Prymorsk.

Tam tankiery zahružali naftaj i adpraŭlali ŭ zvarotny šlach tym ža maršrutam. Kala Sueckaha kanała achoŭniki pakidali sudna i čakali nastupny tankier cieniavoha fłotu, jaki viartaŭsia pustym paśla dastaŭki nafty na naftapierapracoŭčyja zavody ŭ Indyi.

Pavodle atrymanaj infarmacyi, na borcie zvyčajna znachodzilisia dva achoŭniki, jakija pracavali paźmienna pa vosiem hadzin. Adzin z azijackich marakoŭ, jaki pracavaŭ ź imi, raskazaŭ, što achoŭniki pavodzili siabie jak «haspadary karabla» i navat jeli asobna ad kamandy.

Adzin z achoŭnikaŭ, u svaju čarhu, śćviardžaŭ, što azijackich členaŭ ekipaža davodziłasia pastajanna «padhaniać», kab jany vykonvali vachtu zamiest taho, kab spać. Akramia taho, jamu nie padabalisia zanadta vostryja stravy, jakija rychtavaŭ sudnavy kok. Ale samym horšym na borcie, pavodle jaho słoŭ, byli paścielnyja kłapy.

U apošni čas stratehija Rasii pačała źmianiacca. Z pačatku 2026 hoda kolkaść pryvatnych achoŭnikaŭ na borcie skaračajecca, ale adnačasova adbyvajecca imklivaja «rusifikacyja» fłotu. Kali raniej tolki pałova kapitanaŭ była rasijanami, to ciapier hety pakazčyk dasiahnuŭ 90%, a sudny ŭsio čaściej pierachodziać pad rasijski ściah i supravadžajucca vajskovym fłotam RF. Bolšaść hetych karabloŭ pieravoziać naftu kampanii «Rasnafta», jakaja, adnak, admaŭlaje lubuju suviaź z najmam achoŭnikaŭ.

• 1
• 0
• 0
• 0
• 0
• 0
• 4
• 0