Stała viadoma, pa jakim artykule sudziać historyka Ihara Mielnikava i što jamu pahražaje
Ihara Mielnikava zatrymali ŭ toj ža čas, kali adbyłasia abłava na salidarnych z palitviaźniami. Maksimalna mahčymaje pakarańnie — šeść hadoŭ kałonii, ale tearetyčna moža abyścisia i chimijaj.
Iharu Mielnikavu 44 hady. Rodam jon z Babrujska. Skončyŭ histaryčny fakultet Biełaruskaha dziaržaŭnaha piedahahičnaha ŭniviersiteta imia Maksima Tanka (2002) i Varšaŭski ŭniviersitet (2005). U 2011 hodzie atrymaŭ stupień kandydata histaryčnych navuk.
Jak raniej pisała «Naša Niva», Ihar śpiecyjalizavaŭsia na historyi Zachodniaj Biełarusi ŭ składzie Polščy dy vajennaj historyi, vydaŭ paŭtara dziasiatka knih pa temie.
U historyka była nieadnaznačnaja reputacyja ŭ prafiesijnych kołach. Jon pačynaŭ z zachodnierusizmu, adtul pieraskočyŭ u pałanafilstva, ale ŭrešcie pryjšoŭ u padkreślenuju biełaruskaść.
Mielnikaŭ krytykavaŭ kaleh, a jany zakidali jamu kanjunkturnaść. Kali ŭ Biełarusi naładžvalisia adnosiny z Polščaj, jon pisaŭ pra biełaruskich žaŭnieraŭ Vojska Polskaha. A paśla 2020-ha pieraklučyŭsia na inšaje.
Pierad zatrymańniem jon kazaŭ, što rychtuje knihu pad nazvaj «Prystupić da likvidacyi». Pa słovach historyka, jana musiła raspaviadać pra «historyju baraćby savieckich milicyjanieraŭ i čekistaŭ suprać byłych nacysckich pamahatych i kałabaracyjanistaŭ… [i ŭtrymlivać] unikalnyja fakty pra zdradnikaŭ z bataljona «Dalvic», palicyjaŭ i inšych pamahatych nacystaŭ, jakija nie davali viarnuć mirnaje žyćcio ŭ BSSR».
Kniha tak i nie vyjšła, choć płanavałasia da 4 sakavika 2024 hoda, da dnia biełaruskaj milicyi. Apošniaja aktyŭnaść Ihara Mielnikava ŭ instahramie datujecca 21 studzienia 2024 hoda, akurat napiaredadni rejdu na salidarnych z palitviaźniami, jaki adbyŭsia z 23 pa 24 studzienia — praŭda, nieviadoma, ci patrapiŭ jon u rejd abo tak supała. Sutnaść abvinavačańnia nieviadomaja.
Sud nad Iharam pačniecca 10 vieraśnia 2024 hoda ŭ Minskim haradskim sudzie. Jaho abvinavačvajuć u «sadziejničańni ekstremisckaj dziejnaści» (č. 1 art. 361-4 KK). Maksimalnaje pakarańnie pa hetym artykule składaje šeść hadoŭ kałonii, minimalnaje — chimija, ale vypadki chimii pa hetym artykule pakul nieviadomyja. Sudzić Mielnikava budzie sudździa Michaił Makarevič.
«Naša Niva» — bastyjon biełaruščyny
PADTRYMAĆCiapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary