Abjechali Biełaruś za čatyry hady: siamja naviedała ŭsie 118 rajonaŭ
Na skretč-karcie siamji Zacharevičaŭ adkryty ŭsie 118 rajonaŭ Biełarusi. Apošniuju ptušačku pastavili ŭ Dobrušy vosieńniu minułaha hoda, raskazvaje «Točka».
Ciapier padarožničajuć užo pa druhim kruzie — ścierli amal pałovu novieńkaj skretč-karty Biełarusi. I spyniacca nie źbirajucca. Upeŭnieny, u krainie jašče jość što pahladzieć i kudy źjeździć u vychadnyja.
Alaksandr kaliści byŭ upeŭnieny: padarožžy — heta tolki pra zamiežža. Jak i niekatoryja biełarusy, jon doŭhi čas ličyŭ, što ŭ svajoj krainie mała cikavaha. Pakul adnojčy žonka nie pakazała jamu zdymak pryhožaha kaścioła ŭ Hierviatach Hrodzienskaj vobłaści.
«Ja nie moh pavieryć, što heta ŭ Biełarusi. My pajechali, pahladzieli — ja byŭ u šoku. Raniej ža naohuł nie dumaŭ, što možna padarožničać pa Biełarusi», — uspaminaje Alaksandr.
Z hetaj pajezdki pačałosia vialikaje padarožža pa svajoj krainie, jakoje raściahnułasia na čatyry hady. Za hety čas — bolš za 130 vyjezdaŭ ź Minska.
«Byvała, što ŭ niejkija budnyja dni paśla pracy možam uviečary kudyści vyjechać pa Minskaj vobłaści. Zachaciełasia pahulać pa Niaśvižy — zajechali pa šlachu ŭ Hancavicki i Lachavicki rajony. U vychadnyja starajemsia rehularna kudyści vyjazdžać», — kažuć muž i žonka.
Nie prosta ptušačka na karcie
Padarožžy płanujuć razam. Pieršapačatkova aryjentavalisia na ściortyja rajony svajoj skretč-karty: vybirali, dzie jašče nie byli, časam zachoplivali niekalki rajonaŭ adrazu. Potym vyvučali, što možna pahladzieć, składali maršruty.
«U niekatoryja rajony viartalisia dvojčy. Asabliva spadabałasia Hrodzienskaja vobłaść — bahataja na słavutaści. My nie prosta stavim ptušačku na karcie, my starajecca vyvučyć usio samaje asnoŭnaje», — raspaviadaje Alaksandr.
Siamja ładzić svaje maršruty tak, kab pahladzieć jak maha bolš pomnikaŭ architektury: staradaŭnija siadziby, pałacy, zamki. I adrestaŭravanyja, i tyja, jakija amal razburanyja. Časam, viadoma, achoplivajuć i pryrodnyja pryhažości — spadabalisia bałota ŭ Jelni, «biełaruskija Maldyvy».
«Ruiny my taksama lubim — chočacca paśpieć pahladzieć jašče choć niešta, što pakul nie razburyłasia pad upłyvam času biez rekanstrukcyi», — kažuć Saša i Ania.
U błohu — padzieł abaviazkaŭ. Usie pasty robić žonka. Fotazdymki — taksama Hanna. Raniej atmaśfiernyja fota Alaksandr zdymaŭ z koptera — pryjšłosia ź im raźvitacca z-za novaŭviadzieńniaŭ u zakonach. Ale kadry ad hetaha horš nie stali. Ciapier Saša viadzie storys u Instagram ź miescaŭ naviedvańnia.
Što spadabałasia
Začapili muža i žonku bolš za ŭsio pajezdki pa Hrodzienskaj vobłaści — tam zachavałasia šmat pryhožych pomnikaŭ. Mienavita hety rehijon čaściej za ŭsio naviedvajuć Ania i Saša.
Što bolš za ŭsio zapomniłasia? Siadziba francuzskich dvaran de Viryjon u vioscy Liški. Pabudavanaja ŭ 1883 hodzie, jana pastupova rujnujecca. Ale adnosna dobra zachavałasia, i tam jość na što pahladzieć.
Siadziba Śviatapołk-Čaćviarcinskich u vioscy Žałudok — jašče adzin punkt na karcie, jakuju rekamiendujuć da naviedvańnia surazmoŭcy. Pabudavana jana ŭ pačatku XX stahodździa, ale radavoje hniazdo isnavała niadoŭha — jaho nacyjanalizavali. Padčas Druhoj suśvietnaj Žałudok razburyli, adnak siadziba acaleła — u joj raźmiaścili balnicu. Paśla vajny była razhromlena, a potym kančatkova zakinuta.
U vioscy Hrudzinaŭka Bychaŭskaha rajona znachodzicca jašče adna siadziba, kudy časta lubić pryjazdžać siamiejstva, — hrafski dom Tałstych XIX stahodździa. Heta nievialiki dvuchpaviarchovy pałac z kupałam, kałonami, paradnaj leśvicaj i adkrytaj terasaj z vyhladam na park. Nažal, taksama pastupova rujnujecca.
Pałac Vałovičaŭ u vioscy Śviack pad Hrodnam — taksama miesca, jakoje rekamiendujuć naviedać zaŭziatyja vandroŭniki. Pomnik architektury XVIII stahodździa adnoŭleny. Pa svajoj architektury jon nahadvaje francuzski Viersal z pryhožym parkam. Na terytoryi jość haścinica, brovar, a taksama zabavy.
Kamientary