Śviatłana Cichanoŭskaja, jakaja ciapier znachodzicca ź vizitam na Malcie, u Mižnarodny dzień svabody presy naviedała miesca zabojstva viadomaj maltyjskaj žurnalistki Dafny Karuany Halicyi. Heta žančyna zajmałasia rasśledavańniem karupcyi čynoŭnikaŭ i była zabitaja ŭ 2017 hodzie.
Na miescy zabojstva pra svaju maci i toje, što ź joj tady adbyłosia, raskazaŭ syn Dafny.
Śviatłana Cichanoŭskaja ŭ adkaz raskazała pra biełaruskich žurnalistaŭ, jakija padviarhajucca surovamu pieraśledu, ale, niahledziačy na heta, praciahvajuć svaju pracu, kab spynić prapahandu dy raspalvańnie varožaści i nianaviści.
Dafna Karuana Halicyja była samaj viadomaj žurnalistkaj Malty. Jana viała błoh na anhlijskaj movie Running Commentary, u asnoŭnym pryśviečany karupcyi. Aŭdytoryja niekatorych jaje pastoŭ pieravyšała 400-tysiačnaje nasielnictva Malty. Rasśledavańni Halicyi tyčylisia dziaržsłužboŭcaŭ — ad drobnych čynoŭnikaŭ da kiraŭnikoŭ dziaržavy.
16 kastryčnika 2017 hoda aŭtamabil, u jakim znachodziłasia 53-hadovaja Dafna Karuana Halicyja, byŭ uzarvany. U hety momant jana adjazdžała na svaim Peugeot 108 ad doma ŭ Moście, miastečku niepadalok ad staličnaj Valeta. Mašynu raźniesła vybucham na niekalki častak, žančyna zahinuła.
Niezadoŭha da hibieli Halicyja kiravała rasśledavańniem ab karupcyi na Malcie, vynikam jakoha stała publikacyja ŭ «Panamskich dakumientach» źviestak, jakija abvinavačvali premjera krainy ŭ karupcyi.
Zabojstva žurnalistki vyklikała vialiki rezanans na Malcie i za jaje miežami. Ušanavać jaje pamiać vyjšli tysiačy maltyjcaŭ.
Kamientary