«Tuju vajnu pieražyła, i hetuju pieražyvaju». 98-hadovaja ŭkrainka prajšła 10 km, kab paźbiehnuć akupacyi
Lidzija Ściapanaŭna z Ačarecina, što ŭ Danieckaj vobłaści, prajšła kala 10 km pad abstrełami, kab vyjści z akupacyi. Pra heta raskazała palicyja Danieckaj vobłaści, paviedamlaje «BBC Ukraina».
Babula išła praź liniju frontu ŭvieś dzień bieź ježy i vady, niekalki razoŭ padała, padymałasia i znoŭ išła.
«Jak pachisnuła mianie i kinuła ŭ travu. Zasnuła. A tady znoŭ pajšła. Znoŭ upała, a tady ŭstała. Dumała, budu iści pavoli», — uspaminaje žančyna svaju doŭhuju darohu ŭ intervju, videa jakoha apublikavała palicyja.
Iści joj dapamahali dva kii.
Pad viečar stomlenuju žančynu na darozie ŭbačyli vajskoŭcy i pieradali hrupie palicyi «Bieły anioł», jakaja pravodzić evakuacyju cyvilnych asob z pryfrantavych terytoryj. Palicyja nie paviedamlaje, dzie mienavita heta adbyłosia, ale žančynie ŭdałosia dabracca da kantralavanaj Ukrainaj terytoryi.
Palicyjanty advieźli babulu ŭ prytułak, dzie jaje pakarmili. Tam jana zmoža pieradychnuć i prabyć niekatory čas.
Palicyjanty znajšli svajakoŭ žančyny. Niezrazumieła, što adbyłosia i jak jany zhubilisia. Pa jaje słovach, byli abstreły, i niaviestka z synam vyrašyli biehčy. Ale, padobna, što jany ź Lidzijaj Ściapanaŭnaj pajšli roznymi darohami.
Dom Lidzii Ściapanaŭny, jaki jana pabudavała sama, razburyli rasijskija abstreły.
«Tam usio dahary nahami. Tam strašna, što robicca… Pračnułasia, a jany stralajuć. Strašna», — kaža babula pra svoj dom u Ačarecinie.
Paśla takoha padarožža Lidzija Ściapanaŭna, jak vyhladaje, vielmi doŭha nie mahła pryjści da śviadomaści. Jana z žacham raskazvaje pra ŭsio pieražytaje.
«Ja tuju vajnu pieražyła, i hetuju vajnu pieražyvaju. Zastałasia bieź ničoha. Damy harać, drevy pavyryvała z karaniami», — kaža jana.
Pa žančynu abiacała pryjechać unučka.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam3030
Kamientary