Ci pryciahvaje smartfon małanku? Ratavalniki raskazali, ci treba vyklučać telefon u navalnicu
Padčas mocnaj niepahadzi mnohija vyklučajuć svaje hadžety, bajučysia stać mišeńniu dla elektryčnaha razradu. U Ministerstvie pa nadzvyčajnych situacyjach patłumačyli, jak mabilnyja telefony ŭpłyvajuć na biaśpieku padčas navalnicy.
Jak adznačajuć ratavalniki, całkam adklučać mabilny telefon padčas navalnicy nie patrabujecca. Sučasnyja smartfony biaśpiečnyja dla vykarystańnia: jany nie pryciahvajuć małanku i nie stvarajuć umoŭ dla jaje ŭdaru.
Realnaja niebiaśpieka ŭźnikaje tolki tady, kali čałaviek trymaje telefon u rukach i pry hetym znachodzicca na adkrytaj prastory — naprykład, u čystym poli ci na ŭzvyššy. U takim vypadku čałaviečaje cieła stanovicca samym vysokim abjektam na miascovaści. Ryzyka paražeńnia pavyšajecca nie z-za samoha telefona, a mienavita z-za nieabaronienaha stanu čałavieka. Vypramieńvańnie smartfona tut ni pry čym.
Mienavita tamu hałoŭnaje praviła — nie karystacca telefonam na vulicy, kali pablizu niama nadziejnaha ŭkryćcia.
Što tyčycca pamiaškańniaŭ, to tut mabilnaj suviaźziu možna karystacca biez abmiežavańniaŭ. Hałoŭnaje — paźbiahać pravadnych pryład i nie stajać kala voknaŭ.
Kab pieračakać navalnicu biez nastupstvaŭ, ratavalniki rekamiendujuć vykonvać bazavyja praviły biaśpieki.
Kali vy znachodziciesia doma
Začynicie vokny, trymajciesia dalej ad ich i adkrytych prastor.
Nie karystajciesia pravadnymi telefonami i nie dakranajciesia da bytavoj techniki, uklučanaj u razietku.
Paźbiahajcie blizkaści da mietaličnych kanstrukcyj.
Kali navalnica zaśpieła na vulicy
Terminova ŭkryjciesia ŭ najbližejšym budynku abo aŭtamabili.
Kali vy znachodziciesia ŭ lesie, to lepš schavacca siarod nizkarosłaj raślinnaści. Zaŭsiody trymajciesia padalej ad linij elektrapieradač i adzinočnych vysokich dreŭ.
Kateharyčna zabaraniajecca biehać, kupacca ŭ vadajomach i padychodzić da vady.
Viełasipiedystam i matacyklistam treba nieadkładna spynić ruch, adyści ad svajho dvuchkołavaha transpartu prykładna na 30 mietraŭ i pieračakać niepahadź tam.
Kali schovišča niama zusim, znajdzicie suchuju jamu ci tranšeju, prysiadźcie tudy (abo lažcie na ziamlu), schiliŭšy hałavu.
Kali vy znachodziciesia ŭ kampanii, to lepš prysieści na kukiški paasobku i nie dakranacca da inšych ludziej.
Dzieviać čałaviek pamierli ŭ Breście i Minsku — usim im uvodzili adnyja i tyja ž leki. U preparacie znajšli bakteryi5
Kamientary
Hadoŭ 10 - 15 tamu ŭ adnym rajcentry małanka zabiła dziaŭčynu jakaja ŭ poli pa telefonu razmaŭlała z matulej pad čas navalnicy.
Na vulicy karystacca mabilnikam ŭ navalnicu vielmi niebiaśpiečna.
Tamu i kupacca nielha: na voziery ty samy vysoki pravadnik toku nad vialikaj płoščaj. Praboj izalatara(pavietra) budzie jakraz praź ciabie.
Pavietra nie pravadnik toku, pavietra izalatar, a prabivaje pa šlachu najmienšaha supraciŭleńnia - tam dzie bližej, dzie mienšaje supraciŭleńnie.
Tamu nie tyrčać, jak słup, nie chavacca pad samym vysokim drevam, nie jechać na vysokim mietaličnym rovary, a lehčy, sieści, idealna ŭ jamku, nižej za pavierchniu ziamli.