Pačali vydavać bałharski turystyčny šenhien. Što treba, kab jaho atrymać?

Hrošy, bilety, hateli, maršrut

Pieršapačatkova paviedamlałasia, što padavać dakumienty na atrymańnie bałharskaha šenhienu možna budzie z 1 krasavika, ale paźniej datu pieranieśli na 15 krasavika dla Bałharyi i na 1 maja dla Rumynii.

Zapisacca na padaču samastojna možna praz sajt vizavaha centru vfsglobal. Dla hetaha abaviazkova stvaryć ulikovy zapis. 

Dla padačy na vizu spatrebicca nastupny pakiet dakumientaŭ:

Pašpart, z momantu vydačy jakoha prajšło nie bolš za 10 hadoŭ i minimum ź dźviuma čystymi staronkami z nadpisam «vizy». Dźvie kopii staronak pašpartu ź piersanalnymi źviestkami, kopii viz za apošnija try hady, ankieta, zapoŭnienaja łacinskimi litarami, strachoŭka na sumu kampiensacyi nie mienš čym na 30 tysiač jeŭra.

Taksama spatrebicca paćviardžeńnie pajezdki. Treba pradjavić broni biletaŭ da Bałharyi i nazad z paćviardžeńniem 100% apłaty.

Kali turyst źbirajecca jechać na ŭłasnym aŭto, to treba budzie pradjavić techpašpart, paśviedčańnie kiroŭcy, dziejny techahlad, raśpisany ŭ volnaj formie maršrut padarožža i broń hatelaŭ na šlachu da Bałharyi. Broń hatela na terytoryi Bałharyi musić być 100% apłačanaj.

Nie mienš za 500 jeŭra na rachunku

Taksama spatrebicca daviedka ab dachodach z pracy za apošnija try miesiacy i vypiska z bankaŭskaha rachunku za toj ža pieryjad. Minimalny astatak srodkaŭ na im pavinien składać nie mienš čym pa 50 jeŭra na kožny dzień pieršaj pajezdki, ale nie mienš za 500 jeŭra.

U ankiecie ŭkazvajecca data i praciahłaść pieršaj pajezdki. Možna zapytvać šmatrazovuju vizu terminam da 1 hoda.

Konsulski zbor składaje 35 jeŭra, servisny — 25 jeŭra. Płacić treba rublami pa kursie Nacbanka. Aproč hetaha, daviadziecca nabyć strachoŭku i zrabić fota.

Što prapanujuć pasiaredniki?

Kali zajmacca ŭsim samastojna žadańnia niama — možna źviarnucca da pasiarednikaŭ, jakija za svaje pasłuhi biaruć kala 400 rubloŭ. Za hetyja hrošy vas zapišuć na padaču, zapoŭniać ankietu i buduć supravadžać da momantu atrymańnia vizy.

Pry hetym šukać, braniravać i apłačvać bilety i pražyvańnie ŭ hateli ŭsio adno daviadziecca samastojna.

Pavialičyć

Vynik — nieviadomy

Pasiaredniki kažuć, što popyt z boku nasielnictva na atrymańnia bałharskich turystyčnych viz vialiki. Ale pakul nieviadoma, nakolki dobra Bałharyja budzie adkryvać vizy biełarusam, bo prymać dakumienty pačali tolki z 15 krasavika. Tamu navat tyja, chto padaŭsia ŭ pieršy dzień, jašče nie viedajuć, jakim budzie rašeńnie konsuła. 

A moža być usiakaje: ad admovy da šmatrazovaj vizy na hod. Kali pačać rehistravacca na padaču ŭžo ciapier, to vizu zmožacie atrymać ciaham maja. Pasiaredniki miarkujuć, što kali vyśvietlicca, što Bałharyja dobra adkryvaje šmatrazovyja vizy, to terminy čakańnia zapisu i ceny na pasiarednickija pasłuhi mocna pavialičacca.

Padavać dakumienty na bałharskuju vizu možna ŭ vizavych centrach u dzieviaci haradach: u Minsku i ŭsich abłasnych centrach, a taksama ŭ Baranavičach, Pinsku, Lidzie.

• 8
• 0
• 5
• 8
• 4
• 11
• 25
• 0