Aryštavanuju samuju bujnuju soniečnuju elektrastancyju Biełarusi nie zmahli pradać, bo nikomu nie treba

Startavaja cana na aŭkcyjonie była paznačanaja ŭ pamiery 79,751 młn rubloŭ. Stancyju vystavili na tarhi z-za daŭhoŭ kampanii-ŭładalnicy «Sołar Łend», zarehistravanaj u 2015 hodzie dla budaŭnictva i ekspłuatacyi stancyi. 100% doli ŭ joj naležyć brytanskaj firmie Cameliaside, jakuju, u svaju čarhu, pad prajekt u zialonaj enierhietyki Biełarusi stvaryli brytanskija inviestycyjnyja kampanii United Green Group i Altostarta.

Inviestycyjnaja damova ź biełaruskimi ŭładami na ŭźviadzieńnie stancyi ŭ Čerykaŭskim rajonie z ustanoŭlenaj mahutnaściu ŭ 109 MVt była padpisanaja ŭ 2014 hodzie. Budaŭnictva pačałosia ŭ 2018 hodzie. Uviali ŭ dziejańnie stancyju ŭ vieraśni 2021 hoda, a pieršym miesiacam kamiercyjnaj ekspłuatacyi staŭ luty 2023 hoda. Ahulnaja suma inviestycyjnych vydatkaŭ na prajekt aceńvałasia ŭ 170 młn dalaraŭ.

Z 2022 hoda hetaja pryvatnaja soniečnaja elektrastancyja pradavała dziaržavie elektraenierhiju. Pa zakonie elektryčnaść, vyrablenaja za košt adnaŭlalnych krynic enierhii, apłačvałasia firmie, jakaja jaje vyrablaje, pa pavyšanym taryfie. Tak kampanija atrymała ad dziaržavy za svaje pasłuhi amal 15,8 młn rubloŭ.

Ale paśla taho, jak zakanadaŭstva źmianili i admianili pavyšanyja taryfy dla takoj elektryčnaści, ułady zapatrabavali ŭ pryvatnika viarnuć hetyja hrošy. Z hetaha pačalisia praciahłyja sudovyja razborki, jakija stali adnoj z pryčyn bankructva firmy.

Prakuratura ŭrešcie paviedamiła, što nacyjanalizavała soniečnuju elektrastancyju, adznačyŭšy, što pryvatnik nie chacieŭ addavać jaje dziaržavie dobraachvotna. Raniej kampanija trapiła pad kontrsankcyjny śpis zabaronienych da prodažu pradpryjemstvaŭ ź inviestarami z «niedružalubnych» krain.

U 2023 hodzie hramadzianin Vialikabrytanii Kiabod Tutanian Mašad, jaki inviestavaŭ u «Sołar Łend», zapatrabavaŭ ad uładaŭ Biełarusi kampiensavać jamu sotni miljonaŭ dalaraŭ. Jon padaŭ adpaviednaje apaviaščeńnie ab sprečcy 26 lipienia 2023 hoda.

15 studzienia 2024 hoda ŭ Ekanamičnym sudzie Mahiloŭskaj vobłaści razhledzieli spravu suprać pryvatnaj kampanii, u jakoj na karyść dziaržavy adabrali linii elektrapieradačy, a taksama apory vysakavoltnych linij elektrapieradačy. Nazva firmy nie ŭdakładniajecca, adnak havorka ź vialikaj vierahodnaściu idzie pra kampaniju «Sołar Łend». Pazoŭ u sud padavała Ministerstva enierhietyki, jon tyčyŭsia pryznańnia prava ŭłasnaści.

Soniečnaja elektrastancyja składajecca z dvuch parkaŭ — Paŭnočnaha i Paŭdniovaha — i zajmaje płošču kala 220 hiektaraŭ.

• 33
• 0
• 18
• 46
• 15
• 29
• 49
• 0