Chto najbolš vyjhraje, a chto prajhraje ad pierachodu na pracu z chaty?

Šmatrazovaje pavieličeńnie kolkaści rabotnikaŭ, jakija pracujuć z chaty, upieršyniu było vyklikana pandemijaj i i istotna paŭpłyvała na roznyja haliny, takija jak nieruchomaść i dziełavyja pajezdki. Taksama heta pryviało da taho, što ludzi pačali bolš aktyŭna źjazdžać z haradoŭ u pryharad. U blizkim časie praca z domu nikudy nie dzieniecca, tamu pryhledzimsia da taho, jakija nastupstvy heta moža mieć u doŭhaterminovaj pierśpiektyvie.

Jakija haliny pacierpiać

Bolš za ŭsio, imavierna, prajhrajuć uładalniki ofisaŭ i handlovaj nieruchomaści ŭ centry horada. Masavy pierachod na pracu z domu stvaryŭ tak zvany efiekt pončyka ŭ bujnych haradach pa ŭsim śviecie — kali ludzi vybirajuć dla žyćcia ŭskrainy, a nie centr. Miljony supracoŭnikaŭ bolš nie jeździać na pracu štodzień, u vyniku čaho mnohija ofisy zapoŭnienyja tolki napałovu. Novaje budaŭnictva zapavoliłasia, mnohija pustyja budynki pastupova pieraŭładkoŭvajuć u žyłyja pamiaškańni, a niekatoryja niajakasnyja ofisy prosta źniasuć.

Prajhrali taksama sistemy hramadskaha transpartu, bo pasažyry pierajšli ad piacidzionnaha hrafika pajezdak na pracu da dvuch ci troch dzion na tydzień — i heta pryvodzić da pavieličeńnia biudžetnaha deficytu.

Centralnyja rajony bujnych haradoŭ — jašče adny siarod tych, chto prajhraŭ: ich žychary pierajazdžajuć u pryharady i pieranosiać z saboj i svaje padatkovyja ŭnioski. Paśla sychodu nasielnictva i, adpaviedna, padatkaŭ, u centralnych rajonaŭ mohuć uźniknuć finansavyja ciažkaści.

Ale jość pieramožcy

Pieramožcami, jak miarkuje Wall Street Journal, stali ŭłasna sami pracaŭniki. Prynamsi, u apytankach jany paviedamlajuć, što aceńvajuć mahčymaść pracavać z domu dva ci try dni na tydzień hetak ža vysoka, jak pavyšeńnie zarobku. Bo heta źniziła stres, a taksama dało bolšuju kolkaść asabistaha i siamiejnaha času.

Niadaŭniaje daśledavańnie pakazała, što typovy amierykaniec, jaki pracuje z chaty, tracić na dohlad za dziećmi na 40 chvilin u tydzień bolš, čym zvyčajna — bo ekanomić čas na tym, što jamu nie treba jeździć na pracu.

Heta moža mieć stanoŭčy ŭpłyŭ navat dla naradžalnaści, bo dahladać dziaciej stanie krychu zručniejšym.

Jašče adnym pieramožcam možna ličyć navakolnaje asiarodździe, bo skaračajucca patreby ŭ pajezdkach na pracu i elektraenierhii ŭ ofisie.

I, mabyć, bolš za ŭsio vyhady atrymlivajuć sami kampanii. Pavodle nazirańniaŭ, hibrydnaja praca try dni na tydzień u ofisie davoli niejtralna ŭpłyvaje na pradukcyjnaść supracoŭnikaŭ, ale adnačasova z hetym dazvalaje kampanijam ekanomić na vydatkach na padbor i ŭtrymańnie supracoŭnikaŭ. Firmam nie treba tracicca na ofisnyja vydatki, i jany mohuć najmać ludziej pa ŭsim śviecie.

Masavaje ŭkaranieńnie hibrydnaj pracy miljonami kampanij u ZŠA i Jeŭropie — mabyć, samy pierakanaŭčy dokaz jaje dadatkovaha ŭpłyvu na prybytkovaść.

U budučyni vialikija źmieny pavinny adbycca i z novymi technałohijami, jakija my vykarystoŭvajem dla addalenaj pracy. Kali na pieršych etapach jana praduhledžvała kanfierenc-suviaź i adpraŭku fajłaŭ pa elektronnaj pošcie, to siońnia mnohija dzielacca fajłami ŭ vobłačnych sietkach. Prafiesar ekanomiki Stenfardskaha ŭniviersiteta Nikałas Blum adznačaje, što ŭ hutarkach sa startapami i technałahičnymi firmami jon čuje pra sistemy dla hałahrafičnych sustreč, ekrany pamieram sa ścianu i novyja srodki dla hłabalnaj suviazi. Raspracoŭka hetych technałohij aznačaje, što praca z domu nie tolki tryvała ŭvajšła ŭ naša žyćcio, ale i budzie pašyracca.

• 8
• 0
• 0
• 0
• 0
• 1
• 1
• 0