Byłoha afhanca ź Viciebskaj vobłaści asudzili da troch hadoŭ za abrazu Łukašenki i nie tolki
Byłoha afhanca Uładzimira Lisicu sudziŭ sudździa Loźnienskaha rajona Alaksiej Łapušanski. Pavodle sudovaha vyraku, Lisica maje adbyć try hady ŭ papraŭčaj kałonii va ŭmovach ahulnaha režymu, a taksama spłacić 7 400 rubloŭ štrafu i kampiensacyju maralnaj škoły dvum pazoŭnikam — hienieralnamu prakuroru Respubliki Biełaruś A. Šviedu i deputatu Navapołackaha haradskoha Savieta deputataŭ I. Miadźviedskamu — pa 3 000 rubloŭ kožnamu, piša «Viciebskaja viasna».
Pavodle śledstva, Uładzimir Lisica nie paškadavaŭ mocnych vyrazaŭ i na adras jašče niekalki viadomych u Biełarusi asobaŭ: «publična nieprystojnyja kamientary prahučali na adras« vajennaha kamisara Homielskaj vobłaści A.U. Kryvanosava, deputata Pałaty pradstaŭnikoŭ Nacyjanalnaha schodu Respubliki Biełaruś A.S. Hajdukieviča, staršyni Hłybockaha rajvykankama A.M. Šubskaha, a taksama A. Łukašenki, paviedamlaje loźnienskaja rajonnaja hazieta «Ściah pieramohi».
«Rajonka» apisvaje asudžanaha jak chulihana, jaki «moh by i dalej spakojna pracavać u vioscy vartaŭnikom», ale pisaŭ kamientary «ŭ nieprystojnaj, hrubaj, źniavažlivaj, abraźlivaj formie ź nienarmatyŭnaj leksikaj». U sudzie hetych faktaŭ mužčyna nie asprečvaŭ, a voś z zajaŭlenaj kampiensacyjaj maralnaj škody nie pahadziŭsia, zajaviŭšy, što deputat Navapołackaha harsavieta Miadźviedski «nie panios nijakich pieražyvańniaŭ», a suma, jakuju pažadaŭ atrymać hienieralny prakuror Švied, «zavyšana».
Loźnienskaja «rajonka» padrabiazna apisvaje detali sudu, bo sprava dla miascovaści hučnaja: Uładzimir Lisica — były «afhaniec» i čałaviek z pryncypovaj hramadzianskaj pazicyjaj, a jaho žonka Aksana Lisica — dyrektarka Vysačanskaj bazavaj škoły i deputatka rajsavieta 28-ha sklikańnia.
Uładzimir Lisica naradziŭsia va Ukrainie, u Sumskaj vobłaści, i na avatarcy ŭ jahonaj staroncy ŭ «Adnakłaśnikach» — ukrainski ściah. Źmiest hetaj staronki, jaki ciapier amal uvieś vydaleny, vyvučała Loźnienskaja rajonnaja prakuratura, i jana vyrašyła, što staronku varta pryznać «estremisckimi materyjałami», što sud Loźnienskaha rajona i zrabiŭ.
Rytu Dakotu abvinavacili, što jana terminova raspradała nieruchomaść u Rasii amal na $2 miljony. Jana adkazała8
Kamientary