Takajeŭ: Pałažeńnie ab adnarazovym prezidenckim terminie ŭ Kanstytucyi niaźmienna

«U sacsietkach «chodzić» navina, byccam vy płanujecie pravieści refierendum pa Kanstytucyi i ŭ 2026 hodzie majuć namier znoŭ uziać udzieł u prezidenckich vybarach. Heta praŭda?» — zadali pytańnie žurnalisty.

— Heta dezynfarmacyja. Pierakanany, advolnaje ŭniasieńnie źmianieńniaŭ u Kanstytucyju, tym bolš u takim fundamientalnym pytańni, užo niemahčyma. Kanstytucyjnaja reforma była ažyćcioŭlena nie dla taho, kab unosić advolnyja źmieny ŭ asnoŭny zakon.

Pałažeńnie ab adnarazovym prezidenckim terminie ŭ Kanstytucyi niaźmienna. Hetaja norma źjaŭlajecca takoj ža nieparušnaj, jak i normy ab niezaležnaści, unitarnaści, terytaryjalnaj cełasnaści i formie praŭleńnia našaj dziaržavy.

Raz my zakranuli hetuju temu, skarystajusia vypadkam i raskryju niekatoryja padrabiaznaści. Ideju adnarazovaha siamihadovaha terminu ja vykazvaŭ u zakrytych dyskusijach jašče 15 hadoŭ tamu. Tady hetuju prapanovu nie padtrymali. Paśla abrańnia prezidentam uzvažvaŭ usie «za» i «suprać», šmat razvažaŭ, jak možna ŭvasobić hetuju ideju na praktycy.

U 2022 hodzie było realizavana niekalki važnych kanstytucyjnych źmianieńniaŭ, nakiravanych na likvidacyju supierprezidenckich paŭnamoctvaŭ. I tady ž mnoju była prapanavanaja ideja adnarazovaha siamihadovaha terminu. Hetaja inicyjatyva atrymała ŭsienarodnuju padtrymku. Hetym usio skazana», — skazaŭ Kasym-Žamart Takajeŭ.

Takajeva paprasili prakamientavać pieryjad dvojeŭładździa paśla jaho abrańnia prezidentam.

Jon adkazaŭ, što sproby naviazać madel dvojeŭładździa sapraŭdy byli.

«U palityčnaj situacyi «tranzitu ŭłady», jakaja skłałasia, palityčnyja manipulatary sfarmiravali niejki paralelny centr ułady. U našaj krainie dziejničali prezident i Viarchoŭny hałoŭnakamandujučy, a taksama staršynia Rady Biaśpieki ŭ asobie eks-prezidenta. Heta, u kančatkovym vyniku, nie mahło nie pryvieści da ŭładnaj kalizii», — skazaŭ Takajeŭ.

Pavodle jaho, hetaja situacyja stała adnoj ź pieradumoŭ studzieńskaha kryzisu.

«Zmoŭščyki sprabavali vykarystoŭvać u svaich intaresach vynajdzienuju madel dvojeŭładździa ci «tandemu». Pamiatajcie, napeŭna, zajavy šerahu słužbovych asob, u tym liku byłoha ministra justycyi, što pa svaim statusie Jełbasy staić vyšej za prezidenta. Niekatoryja čynoŭniki biehali pa čarzie pa kabinietach. Jany hulali na hetym i ŭ rešcie rešt zahulalisia. Paźniej ja prama skazaŭ Nursułtanu Abiševiču Nazarbajevu, što palityčnyja ihryščy, pierš za ŭsio, jaho bližejšych paplečnikaŭ ledź nie razarvali krainu.

Liču, što ŭvohule nie pavinna być «starejšaha i małodšaha prezidentaŭ». «Jak idzieš, to idzi». Heta surjozny ŭrok dla budučaha pakaleńnia kiraŭnikoŭ, jakoje pavinna ścierahčysia takich rečaŭ i zaŭsiody dumać tolki ab intaresach dziaržavy i dabrabycie hramadstva», — skazaŭ jon.

Takajeŭ zajmaje pasadu prezidenta Kazachstana z sakavika 2019 hoda. Nursułtan Nazarbajeŭ byŭ prezidentam 27 hadoŭ: sa śniežnia 1991 pa sakavik 2019 hoda. 

• 42
• 0
• 4
• 0
• 0
• 2
• 2
• 0