U Kazachstanie bajcu, jaki vajavaŭ va Ukrainie na baku PVK «Vahnier», dali salidny termin
Jon paśpieŭ pavajavać tolki niekalki miesiacaŭ pad Bachmutam.
U Karahandzie vynieśli prysud mužčynu, jaki ŭdzielničaŭ u vajennych dziejańniach va Ukrainie. Mužčyna abvinavačvaŭsia pa artykule 170, častcy 3 Kryminalnaha kodeksa Kazachstana (udziele ŭ jakaści najmita va ŭzbrojenym kanflikcie, vajennych dziejańniach, nakiravanych na źviaržeńnie i padryŭ kanstytucyjnaha ładu albo parušeńnie terytaryjalnaj cełasnaści dziaržavy», piša tengrinews.kz.
Viadoma, što ŭ sakaviku hetaha hoda praz sacyjalnuju sietku «UKantakcie» jon daviedaŭsia i ŭ dalejšym pahadziŭsia za dobryja hrošy ŭstupić u PVK «Vahnier». Zatym prajšoŭ padrychtoŭku i ŭ kancy krasavika byŭ nakiravany ŭ Bachmut, «dzie ŭziaŭ udzieł u bajavych dziejańniach, nakiravanych na padryŭ kanstytucyjnaha ładu i parušeńnie terytaryjalnaj cełasnaści Ukrainy, u pracesie čaho byŭ paranieny i kamisavany», — paviedamlaje pres-słužba Kazybiekbijskaha rajonnaha suda Karahandy.
Prakuror prasiŭ sud pryznačyć 6 hadoŭ 8 miesiacaŭ pazbaŭleńnia voli z kanfiskacyjaj zaroblenych hrošaj. Abarona prasiła sud pryznačyć pakarańnie, nie źviazanaje z pazbaŭleńniem voli.
Sankcyja artykuła ŭvohule praduhledžvaje pakarańnie ŭ vyhladzie pazbaŭleńnia voli na termin da 10 hadoŭ.
Sud pryznaŭ źmiakčalnaj akaličnaściu čystasardečnaje raskajańnie. Abciažvajučych vinu akaličnaściaŭ u dziejańniach padsudnaha sud nie ŭstanaviŭ.
U vyniku najomnika asudzili na šeść hadoŭ i vosiem miesiacaŭ.
Kamientary