Fiermier u ZŠA ŭstanaviŭ novy rekord piakučaści piercu čyli. Jon fantastyčna vostry

Kniha rekordaŭ Hiniesa paćvierdziła, što amierykanski fiermier sa štata Paŭdniovaja Karalina Ed Kary zdoleŭ stvaryć novy hatunak piercu čyli, jaki staŭ samym piakučym u śviecie. Hatunak pad nazvaj Pepper X («Pierac Ch») prykładna na miljon adzinak vastrejšy, čym uładalnik papiaredniaha rekordu, piša Bi-bi-si.

Novy rekardsmien vałodaje piakučaściu ŭ 2,69 młn adzinak škały Skaviła, a vastrynia hatunku «Karalinski žniec» (Carolina Reaper), jaki ŭtrymlivaŭ papiaredni rekord na praciahu 10 hadoŭ, aceńvałasia ŭ 1,6 młn adzinak.

Kab zrazumieć, pra jakuju mienavita vastryniu idzie havorka, dastatkova skazać, što piakučaść piercu čyli hatunku chabaniera, jaki možna kupić u kramach, składaje kala 100 tys. adzinak škały Skaviła.

A pieravažnaja bolšaść vidaŭ piercu, jakija spažyvajucca ŭ ježu ŭ Biełarusi i krainach Jeŭropy, nie pieravyšaje piakučaściu 50 tysiač adzinak.

Pryčym Ed Kary vyraściŭ jak novaha rekardsmiena, Pepper X, tak i hatunak, jaki zavajavaŭ papiaredni rekord.

Jak heta było?

Ed — adzin z usiaho piaci čałaviek u śviecie, jakija zdoleli źjeści Pepper X całkam. Vyniki hetaha charčovaha ekśpierymienta akazalisia davoli sumnymi.

«U mianie piakło ŭnutry try z pałovaj hadziny. A potym pačalisia koliki, — raspavioŭ Kary ahienctvu Associated Press. — Koliki byli prosta žudasnyja. Ja prykładna hadzinu stajaŭ pad daždžom, raspłastaŭšysia pa marmurovaj ścianie, i ravieŭ ad bolu».

Choć mnohija ličać, što vostry smak u piercach čyli ŭtrymlivajecca ŭ nasieńni, nasamreč kapsaicyn — chimičnaje rečyva, jakoje vyklikaje mocnuju piakučaść, znachodzicca ŭ płacencie, heta značyć u vałaknie, da jakoha «čaplajecca» nasieńnie. Tamu adzin z sakretaŭ vastryni Pepper Ch — u jaho formie i vialikaj kolkaści składak, dzie moža raści płacenta.

Kary kaža, što Pepper X byŭ vyviedzieny pry dapamozie skryžavańnia hatunku «Karalinski žniec» ź inšym piercam, jaki dasłaŭ jamu pryjaciel sa štata Mičyhan i jaki fiermier apisvaje jak «źvierski vostry».

Aŭtar novaha hatunku kaža, što da apošniaha momantu trymaŭ svajo dasiahnieńnie ŭ sakrecie, kab abaranić aŭtarskija pravy. «My zrabili heta ŭsioj kamandaj. My razumieli, što damahlisia čahości asablivaha, tamu pra heta viedali tolki maje najbližejšyja svajaki i siabry», — raspaviadaje Kary.

A raz papiaredniuju raspracoŭku fiermiera, hatunak «Karalinski žniec», biez dazvołu vykarystoŭvali vytvorcy kala 10 tys. roznych praduktaŭ, to ni nasieńnie, ni raśliny novaha piercu pradavacca nie buduć.

Achvotnyja pakaštavać samy vostry pierac u śviecie zmohuć zrabić heta, tolki kupiŭšy firmovyja vostryja sousy.

• 8
• 0
• 1
• 2
• 9
• 0
• 0
• 0