Z sadam, džakuzi i hołymi ścienami. Kolki kaštujuć samyja darahija kvatery ŭ abłasnych centrach
Pahladzieli, kolki kaštujuć i jak vyhladajuć samyja darahija kvatery ŭ abłasnych centrach.
Brest
Samaja darahaja kvatera ŭ Breście vystaŭlenaja na prodaž za 250 tysiač dalaraŭ. Hetak haspadary aceńvajuć piacipakajovuju kvateru ŭ centry horada ŭ domie 1954 hoda pabudovy. Abjekt čymści nahadvaje sučasnyja taŭnchausy, bo, aproč samoj kvatery, vy atrymlivajecie kavałak aharodžanaha ŭčastka z zonaj adpačynku i haražom. Z 228,2 m² ahulnaj płoščy žyłoj tolki 70,7 m².
Kvatera trochuzroŭnievaja. Na cokalnym paviersie mieścicca saŭna, sanvuzieł, pakoj dla adpačynku, pralny i haspadarčyja pakoi. Na pieršym paviersie — try pakoi z častkovym ramontam, na mansardzie — kuchnia-haścioŭnia i dźvie spalni.
Vysokaja cana ŭ pieršuju čarhu abumoŭlenaja hieahrafičnym raźmiaščeńniem kvatery i pryjemnymi bonusami ŭ vyhladzie raskošnaha sadu i haraža.
Hetaja kvatera pradajecca jak minimum z kanca viasny 2022-ha. Tady jana taksama była samaj darahoj z vystaŭlenych na prodaž u Breście. Prasili za jaje 360 tysiač dalaraŭ. Takim čynam, za 14 miesiacaŭ jana patańnieła na $110 000.
Druhaja pa darahoŭli kvatera ŭ hetym abłasnym centry pradajecca na tysiaču dalaraŭ tańniej. Za piacipakajoŭku pa vulicy Enhielsa haspadary prosiać 249 tysiač dalaraŭ.
Ahulnaja płošča kvatery składaje 177 m². Mieścicca jana na pieršym paviersie vaśmipaviarchovaha doma 2002 hoda pabudovy.
Na žal, acanić interjer kvatery za čverć miljona dalaraŭ niemahčyma, bo da apisańnia dadadzienyja tolki videa z drona i płan kvatery.
Viciebsk
U Viciebsku samaja darahaja kvatera ŭ prodažy acenienaja ŭ 310 tysiač dalaraŭ.
«Adzinaja ŭ svaim rodzie prapanova — šykoŭnaja VIP-kvatera ŭ Viciebsku», — tak pačynajecca apisańnie dvuchuzroŭnievaj piacipakajoŭki.
Ahulnaja płošča kvatery — 245 m². Jana mieścicca na čaćviortym i piatym pavierchach piacipaviarchovaha doma na vulicy Haharyna. U kvatery dva sanvuzły, try zašklonyja łodžyi, asobnaje haspadarčaje pamiaškańnie.
Taksama majecca džakuzi dla dvuch čałaviek na 450 litraŭ. U abjavie paznačana, što na pieralik usich pieravah hetaj kvatery prosta nie chopić času.
Druhaja pa darahoŭli kvatera Viciebska kaštuje amal u dva razy tańniej. Za dvuchuzroŭnievuju čatyrochpakajoŭku prosiać $160 000.
Žytło na 154 «kvadraty» nazyvajuć vydatnaj alternatyvaj pryvatnamu domu. Jak i ŭ papiarednim varyjancie, kvatera zajmaje dva apošnija pavierchi ŭ piacipaviarchovym domie.
Pakoi na druhim uzroŭni kvatery majuć mansardny dach.
U kvatery dva vannyja pakoi — pa adnym na kožnym paviersie. Z kuchni-stałovaj možna vyjści na łodžyju.
Aproč zdymkaŭ, u apisańni da abjekta jość videa, na jakim ryełtar raspaviadaje pra kvateru.
Homiel
U Homieli samaja darahaja kvatera acenienaja ŭ 180 tysiač dalaraŭ. Stolki prosiać za trochpakajovuju kvateru ŭ centry.
«Pradajecca vialikaja dvuchjarusnaja kvatera, raźmieščanaja ŭ pomniku savieckaj architektury «Dom-kamuna» ŭ histaryčnym centry horada», — havorycca ŭ apisańni.
Ahulnaja płošča šykoŭnaj nie tolki pa savieckich mierkach trochpakajoŭki — 160 m², žyłaja — 100 m². Ramont va ŭsich pamiaškańniach vykanany ŭ kłasičnym styli. U kožnym pakoi jość kandycyjanier.
Vyšynia stolaŭ 3,2 mietra. Kvatera składajecca z troch pakojaŭ, kuchni, dźviuch harderobnych, dvuch vannych pakojaŭ i pralnaha pakoja.
Druhaja pa darahoŭli kvatera ŭ Homieli pradajecca na 10 tysiač tańniej — za $170 000. Šaścipakajoŭka, u adroźnieńnie ad papiarednich varyjantaŭ, adnaŭzroŭnievaja, znachodzicca na druhim paviersie piacipaviarchovaha doma 1957 hoda pabudovy.
Ahulnaja płošča žytła — 165 «mietraŭ», žyłaja — 105. U kvatery dva sanvuzły, u haścioŭni jość kamin. Kandycyjanier majecca tolki ŭ dvuch z šaści pakojaŭ.
Interjer u kvatery nie samy sučasny, tamu, chutčej, vysokaja cana žytła tłumačycca miescaznachodžańniem kvatery i jaje pamieram.
«Dom jość pomnikam architektury (stalinka). Niekalki hadoŭ tamu praviedzieny kapitalny ramont budynka z zamienaj kamunikacyj, dachu, ramontam padjezda. Kvatera raźmieščanaja ŭ tarcy doma z voknami ŭ dvor, što zabiaśpiečvaje kamfortnaje pražyvańnie ŭ histaryčnym centry horada», — havorycca ŭ apisańni.
Hrodna
U Hrodnie samaja darahaja kvatera acenienaja ŭ 450 tysiač dalaraŭ. Stolki prosiać za pientchaus biez unutranaha azdableńnia ahulnaj płoščaj 324,1 m², žyłaja płošča składaje 211 «kvadrataŭ».
Jak paznačana ŭ apisańni da abjekta, dom pabudavany jašče ŭ 2008 hodzie, ale ŭ kvatery ŭvieś hety čas nichto nie žyŭ.
«Ekskluziŭny pientchaus z dvuma parkovačnymi miescami dla aŭtamabilaŭ u padziemnym haražy. Praz panaramnyja vokny adkryvajecca šykoŭny vid na ŭvieś horad», — havorycca ŭ apisańni da abjekta.
U kvatery zrobleny ciopłyja padłohi, nabyty kieramahranit na padłohu ŭ kuchni i na terasie. Taksama praviedziena sistema kandycyjanavańnia, ale kandycyjanier, jak paznačana, nie padklučany.
Nastupnaja pa darahoŭli kvatera ŭ Hrodnie taksama znachodzicca ŭ centralnaj častcy horada. Za vaśmipakajoŭku ahulnaj płoščaj 218 m² prosiać 330 tysiač dalaraŭ.
Jana zajmaje druhi i mansardny pavierchi doma 1995 hoda pabudovy. Žyllo pradajecca całkam hatovaje da pražyvańnia, razam z usioj meblaj i technikaj.
Mahiloŭ
U Mahilovie samuju darahuju kvateru acanili ŭ 300 tysiač dalaraŭ. Stolki kaštuje piacipakajoŭka ŭ centry horada z sučasnym dyzajnierskim ramontam.
Dvuchuzroŭnievaja kvatera płoščaj 176 m² abstalavanaja ŭsioj nieabchodnaj bytavoj technikaj «pad kluč». Vyšynia stoli ŭ chole — šeść mietraŭ. Dach na druhim paviersie mansardavaha typu.
Kvatera znachodzicca na trecim i čaćviortym pavierchach doma 2007 hoda pabudovy. Pad domam jość padziemny parkinh.
Druhaja pa darahoŭli kvatera ŭ Mahilovie pradajecca za $193 000. Stolki prosiać za pamiaškańnie biez unutranaha azdableńnia ŭ novabudoŭli pa adrasie praśpiekt Miru, 25. Ahulnaja płošča piacipakajoŭki — 175 «mietraŭ».
«Vidavaja kvatera ŭ samym centry horada, novy dom z padziemnym parkinham», — havorycca ŭ apisańni.
Nazvali canu samaj darahoj kvatery ŭ Minsku, pradadzienaj z pačatku hoda
U Minsku i Hrodnie popyt na kvatery bje rekordy. Čamu tak adbyvajecca?
Kamientary