Suprać Maryi Kaleśnikavaj u kałonii zładzili pravakacyju — pravaabaroncy
U Homielskaj kałonii suprać palitźniavolenaj Maryi Kaleśnikavaj zładzili pravakacyju, z-za jakoj Maryju nakiravali ŭ štrafny izalatar (ŠIZA). Pra heta paviedamlajuć pravaabaroncy z Mayday team.
Pavodle infarmacyi pravaabaroncaŭ, pravakacyja adbyłasia «niekatory čas tamu».
Kali Kaleśnikava viarnułasia ź miedsančastki, chtości padsypaŭ tabletki ŭ jomistaść z raspuščalnaj kavaj. Nieŭzabavie paśla hetaha kamiery abšukali, tabletki vyjavili, a Maryju adpravili ŭ ŠIZA.
Zhodna z praviłami ŭnutranaha rasparadku, źniavolenym nielha vynosić leki ź miedsančastki, usie miedykamienty prymajucca tolki ŭ prysutnaści miedrabotnika.
Miarkujecca, što pravakacyja — sprava ruk adnoj z sukamiernic.
Pry kancy listapada minułaha hoda stała viadoma, što Maryja trapiła ŭ špital z prabadnoj jazvaj, dzie jaje praapieravali. Paśla taho jaje tak-siak padlačyli i vypisali, ale całkam adnavicca, jak vyhladaje, nie dali. Učora pravaabaroncy paviedamili, što ŭ jaje zachoŭvajucca prablemy sa zdaroŭjem. Miesiac tamu Kaleśnikavu nibyta vyvodzili na pastrajeńnie pad ruki.
6 vieraśnia 2021 hoda Minski abłasny sud paličyŭ Maryju Kaleśnikavu vinavataj u ździajśnieńni złačynstvaŭ, praduhledžanych č. 1 art. 357, č. 3 art. 361, č. 1 art. 361-1 Kryminalnaha kodeksa, i asudziŭ da 11 hadoŭ pazbaŭleńnia voli za zmovu z metaj zachopu dziaržaŭnaj ułady niekanstytucyjnym šlacham, stvareńnie ekstremisckaha farmavańnia i kiravańnie takim farmavańniem, publičnyja zakliki da zachopu dziaržaŭnaj ułady.
Ciapier čytajuć
Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»9
Kamientary