Aŭtamabili Geely stali samymi pradavanymi ŭ Biełarusi pa vynikach hoda. Chto jašče trapiŭ u top-3
Biełaruskaja aŭtamabilnaja asacyjacyja spravazdačyłasia ab vynikach 2022 hoda. Zhodna ź joj, upieršyniu za historyju isnavańnia zavoda «BiełDžy» aŭtamabili ajčynnaj zborki stali samymi pradavanymi ŭ krainie.
Pa vynikach minułaha hoda, biełaruskija dylery pradali 17 234 aŭtamabili, ź ich lehkavych — 14 843.
Lidaram siarod pradadzienych novych aŭto ŭpieršyniu stała marka Geely. Dylery za 12 miesiacaŭ pradali 4 355 aŭtamabilej biełaruska-kitajskaj vytvorčaści. Na druhim miescy akazałasia Lada — 3 782, na trecim — Kia z 1 462 realizavanymi aŭto.
Da hetaha Lada zastavałasia lidaram na biełaruskim rynku novych aŭto try hady zapar (z 2019 pa 2021 hod).
Zaŭvažana, što Geely zmahła zaniać pieršaje miesca navat pry ŭmovie taho, što ciaham hoda prapanoŭvała pakupnikam tolki try krasoviery. Samy tanny ź ich kaštuje 62 815 rubloŭ (kala 23 000$).
Naprykancy hoda «BiełDžy» prezientavaŭ siedan Emgrand New pa canie ad 45 200 rubloŭ (kala 16 600$), jaki staŭ samym tannym aŭtamabilem marki, dasiažnym na biełaruskim rynku. Tamu całkam vierahodna, što sioleta Geely zmoža zachavać svaju pazicyju ŭ rejtynhu.
Tym nie mienš, pośpiechi «BiełDžy» vielmi ŭmoŭnyja, bo ŭ 2021 hodzie było pradadziena 7 442 aŭto marki suprać 4 355 u 2022-m. Vychad na pieršaje miesca pa kolkaści realizavanych aŭto adbyŭsia ŭ pieršuju čarhu za košt taho, što ahułam situacyja na rynku novych mašyn vyhladaje davoli sumna. Sioleta biełaruskija dylery realizavali amal na 30 000 adzinak techniki mienš, čym letaś.
Paśla sychodu z rasijskaha rynku suśvietnych aŭtavytvorcaŭ dyleram u pramym sensie nie było čaho pradavać. Surjoznyja prablemy z vytvorčaściu nazirajucca ŭ tym liku ŭ rasijskaj Lada, bo ŭ ich davoli vysokaja dola impartnych kamplektujučych. U biełaruska-kitajskich Geely takich pierabojaŭ u pastaŭkach kamplektujučych nie było. Aproč taho, na karyść Geely pracuje lhotnaje kredytavańnie, jakoje niedasiažna dla kupli aŭto inšych marak.
Čytajcie taksama:
Chutka kuplać i pradavać aŭtamabili treba budzie pa novych praviłach. Što źmienicca?
Geely ŭ Biełarusi vypuściŭ novy biudžetny siedan. Kolki kaštuje «narodny» aŭtamabil?
U Cierciela prahučaŭ novy akcent: «razradka ŭ cełym toj napružanaści» ŭ adnosinach z Polščaj i Bałtyjaj21
Kamientary