Kiraŭnica Jeŭrakamisii Ursuła fon der Lajen zajaviła, što Ukraina dałučycca da zony roŭminhu Jeŭrasajuza. «My ŭviadziem Ukrainu ŭ našu jeŭrapiejskuju svabodnuju zonu roŭminhu. Čas heta zrabić», — skazała jana ŭ svaim štohadovym zvarocie «Ab stanoviščy Sajuza» ŭ Jeŭraparłamiencie, piša Radyjo Svaboda.
Fon der Lajen padkreśliła, što adziny rynak ES — adna z najvialikšych historyj pośpiechu Jeŭropy. «Nastaŭ čas zrabić jaho paśpiachovym i dla našych ukrainskich siabroŭ», — padkreśliła jana.
Taksama staršynia Jeŭrakamisii adznačyła, što Ukraina ŭžo źjaŭlajecca technałahičnym centram i domam dla mnohich inavacyjnych maładych kampanij.
U lipieni premjer-ministr Ukrainy Dzianis Šmyhal zajaviŭ, što kraina płanuje ŭ chutkim časie dałučycca da roŭminhavaj prastory ES. Raniej apieratary mabilnaj suviazi ź Jeŭrasajuza i Ukrainy damovilisia zrabić suviaź pamiž krainami bolš dastupnaj, źnižajučy taryfy na roŭminh.
Biełaruś i Rasija z 1 krasavika taksama admianili płatu za ŭvachodnyja zvanki ŭ roŭminhu na terytoryi hetak zvanaj «Sajuznaj dziaržavy». Hetuju mieru Minsk i Maskva abmiarkoŭvali amal 10 hadoŭ, a terminy nieadnarazova pieranosilisia.
Kamientary