Minski zavod biezałkaholnych napojaŭ sprabuje zaniać miesca Coca-Cola na rasijskim rynku
Za apošnija dva miesiacy Minski zavod biezałkaholnych napojaŭ naraściŭ ekspart haziroŭki ŭ Rasiju na 50%, piša «Hazieta.Ru».
Suśvietny lidar u vytvorčaści haziroŭki — Coca-Cola — nie vyklučyŭ kančatkovaha sychodu z rasijskaha rynku. Ale jaho miesca hatovy zaniać ceły šerah kankurentaŭ, jakija robiać vielmi padobnuju haziroŭku.
Adzin ź ich — Minski zavod biezałkaholnych napojaŭ (MZBN), jaki ekspartuje brendy «Rasinka», «Fan-Fan» i inšyja anałahi amierykanskaj haziroŭki.
«Z kanca lutaha rost prodažaŭ skłaŭ 50%. Našy pradukty značna bolš jakasnyja za rasijskija kłony «Koka-Koły» abo «Fanty», ale tut užo pytańnie hustaŭ», — kaža načalnik adździeła ekspartu MZBN Michaił Siničenkaŭ.
Jon dadaŭ, što zavod užo daŭno pastaŭlaje svaju pradukcyju na rasijski rynak, za apošnija hady jamu ŭdałosia pašyryć hieahrafiju pastavak — ciapier jana achoplivaje amal usiu Rasiju.
«Tut bolš pytańnie łahistyki — daloka vazić napoi nie vielmi vyhadna. Dla nas aptymalnym transpartnym plačom zaŭsiody byli centr i paŭnočny zachad Rasii. Adnak ź niadaŭniaha času my pašyryli hieahrafiju až da Dalokaha Uschodu. Tam asablivym popytam u našych klijentaŭ karystajucca naturalnyja pradukty — morsy, biarozavy sok», — skazaŭ Siničenkaŭ.
U MZBN adznačyli, što vykarystoŭvajuć dla pryhatavańnia svaich hazirovak naturalny cukar i čystuju pitnuju biełaruskuju vadu z ułasnych artezijanskich śvidravin, a taksama dadajuć vysakajakasnyja jeŭrapiejskija aramatyčnyja inhredyjenty.
«Abodva suśvietnyja brendy — i «Pepsi», i «Koka-Koła» — pačynali svaju vytvorčaść u Biełarusi mienavita na našym pradpryjemstvie. U ramkach kaapieracyi MZBN byŭ amal całkam madernizavany. My atrymali dośvied, vyvučyli technałohii i kantrol jakaści pieradavych vytvorčaściaŭ napojaŭ, — raspaviali na zavodzie. — Usio heta stała bazaj dla dalejšaj raspracoŭki i vypusku ŭłasnaj liniejki napojaŭ: «Bieła-Koła», «Rasinka», «Fan-Fan».
Kamientary