U Minskim haradskim sudzie vyniesieny prysud viadomamu chirurhu, palitviaźniu Andreju Lubieckamu.
Sudździa Śviatłana Čarapanava asudziła doktara da piaci hadoŭ pazbaŭleńnia voli ŭ kałonii ahulnaha režymu. Mienavita takoje pakarańnie zaprasiła dla Lubieckaha prakurorka Žanna Baranava, paviedamlaje «Viasna»
Skivičnaha chirurha, jaki 18 hadoŭ adpracavaŭ u dziciačaj balnicy ŭ Minsku i byŭ vałancioram kala Akreścina, abvinavačvali pavodle čatyroch artykułaŭ Kryminalnaha kodeksa:
— č. 1 art. 342 (udzieł u dziejańniach, jakija hruba parušajuć hramadski paradak),
— č. 1 art. 130 (raspalvańnie sacyjalnaj varožaści),
— art. 369 (abraza pradstaŭnika ŭłady),
— č. 1, 2 art. 368 (abraza prezidenta).
Zhodna ź viersijaj śledstva, chirurh «publična vykazvaŭsia ab pryniatym rašeńni parušyć dadzienuju im miedycynskuju klatvu i ŭsialak pieraškadžaŭ akazańniu miedycynskaj dapamohi supracoŭnikam milicyi i čalcam ich siemjaŭ, zaklikaŭ svaich kaleh da padobnych supraćpraŭnych dziejańniaŭ».
Taksama jaho abvinavačvali va ŭdziele ŭ 8 pratesnych akcyjach i napisańni dopisaŭ u sacsietkach, jakija kvalifikavali jak abrazy i raspalvańnie varožaści.
U apošnim słovie palitviazień adznačyŭ, što śpiecyjalistaŭ jaho ŭzroŭniu ŭ Biełarusi praktyčna niama.
— Maje dośvied, viedy i ŭmieńni spatrebiacca mnohim ludziam, kali ja budu na voli i budu zajmacca tym, čym zajmaŭsia 23 hady. U mianie ekskluziŭnaja śpiecyjalizacyja, i ŭ Biełarusi śpiecyjalistaŭ majho ŭzroŭniu možna pieraličyć na palcach adnoj, maksimum dźviuch ruk.
Lubiecki zajaviŭ, što na svabodzie ad jaho budzie bolš karyści, čym u turmie. I nahadaŭ, što ŭ jaho jość siamja i dzieci, jakich jon pavinien utrymlivać, vychoŭvać i kłapacicca.
— Mienavita tamu, zychodziačy z vyšej skazanaha, da vysokaha suda ŭ mianie całkam łahičnaja i nie niečakanaja prośba — nie karać mianie i maju siamju, pazbaŭlajučy mianie voli. Kab usio abdumać i zrazumieć mnie chapiła času, praviedzienaha ŭ SIZA.
Čytajcie taksama:
«Jak prystojny čałaviek, ja nie mahu maŭčać». Jak sudziać chirurha Andreja Lubieckaha
«Ščaślivy, što žoncy ŭdałosia źjechać. A ja vytrymaju». Chirurh Andrej Lubiecki daŭ intervju ź SIZA
Ciapier čytajuć
U Biełarusi znajšli kopiju šviejcarskich Alpaŭ — ale turystaŭ tam nie čakajuć2
Kamientary