«Fanierny maršał nie skaža, što abhadziŭsia, tamu zajaviŭ pra nibyta paśpiachovy pieršy etap śpiecapieracyi». Rasijskija «jastraby» sabačacca pamiž saboj
Były ministr abarony «DNR» Ihar Hirkin (Strałkoŭ) rezka vykazaŭsia pra ministra abarony Siarhieja Šajhu, nazvaŭšy jaho «faniernym maršałam» i patłumačyŭ, čamu rasijanie vymušanyja adstupić z-pad Kijeva. A Minabarony RF zavočna piarečyć Hirkinu i ŭsim skieptykam: maŭlaŭ, usie asnoŭnyja zadačy Uzbrojenych siłaŭ Rasii na Kijeŭskim i Čarnihaŭskim napramkach vykananyja.
Hirkin u śviežazapisanym videa kanstatuje, što rasijskaja armija paciarpieła na poŭnačy Ukrainy pravał:
«Naša hrupoŭka, jakaja dziejničaje na pravym bierazie Dniapra, u rajonie Hastomiel — Buča — Irpień, zahrazła ŭ haradskoj zabudovie, u lasista-bałocistaj miascovaści, i paśla taho jak hetaja lasista-bałocistaja miascovaść raspuścicca praź miesiac, jaje buduć bić z-za kožnaha kusta.
Kolkaści vojskaŭ — pry tym, što tudy zahnali vielmi šmat techniki — niedastatkova nie toje što dla bajoŭ za trochmiljonny horad, a navat dla zachavańnia taho pierymietra, jaki zaniali ŭ sakaviku», — skazaŭ jon.
«Ukrainskaje kamandavańnie dziejničaje na paradak adekvatniej z vajskovaha punktu hledžańnia, čym rasijskaje», — pryznaŭ Hirkin.
Minabarony Rasii nasupierak hetamu kaža, što ŭsio tak i było zadumana. Pieršapačatkova, maŭlaŭ, płanavałasia prymusić supiernika skancentravać siły dla ŭtrymańnia vialikich punktaŭ na kijeŭskim i čarnihaŭskim napramkach, u tym liku Kijeŭ. Ich płanavałasia skavać na poli boju i biez šturmu haradoŭ nanieści parazu, jakaja nie dazvoliła b im vykarystoŭvać siły na hałoŭnym napramku rasijskich dziejańniaŭ — na Danbasie.
Adnačasova rasijskaje vojska nibyta vyrašała inšuju zadaču — u adsutnaść prytoku śviežych sił supiernika z zachadu i z centra Ukrainy stvaryć umovy dla praviadzieńnia zaviaršalnaha etapu «apieracyi pa vyzvaleńni respublik Danbasa».
I voś ciapier hetyja mety nibyta vykananyja, zaraz adbyvajecca aktyvizacyja dziejańniaŭ na pryjarytetnych kirunkach, pierš za ŭsio — na Danbasie.
Ciapier čytajuć
«Adny vierać, što viernucca, inšyja — nie». Jak pracuje biełaruskaja škoła ŭ Polščy1
Kamientary