Niezaležnyja sacyjołahi: 71% rasijan adčuvaje honar z-za vajny z Ukrainaj
Amal try čverci nasielnictva Rasii padtrymlivajuć vajnu z Ukrainaj, adčuvajučy takija pazityŭnyja emocyi, jak honar, radaść, pavaha, davier i nadzieja. Pra heta śviedčać danyja dvuch apytańniaŭ, praviedzienych hrupaj niezaležnych rasijskich sacyjołahaŭ ź intervałam u paŭtary tydni z kanca lutaha da siaredziny sakavika. Vyniki pastupili ŭ rasiejskuju redakcyju «Svabody».
Punkt hledžańnia adroźnivaŭsia ŭ zaležnaści ad uzrostu, adznačajuć aŭtary daśledavańnia. Rasijanie, starejšyja za 35 hadoŭ, čaściej vykazvali pačućcio honaru, pavahi i nadziei. Respandenty va ŭzroście da 18 hadoŭ byli bolš schilnyja da kryŭdaŭ i rasčaravańniaŭ. Dvoje ź piaci rasijan vykazvali turbotu z nahody vojny, i ab hetych pačućciach čaściej za ŭsio paviedamlali maładyja hramadzianie. Rasijanie ŭ siarednich uzrostavych hrupach (ad 25 da 44 hadoŭ) čaściej paviedamlali ab pačućci tryvohi i strachu nakont vajennaj apieracyi.
Bolš za pałovu apytanych, starejšych za 55 hadoŭ, padtrymlivajuć vajnu z Ukrainaj.
Adroźnieńni pamiž pieršym i druhim apytańniami pakazvajuć pavieličeńnie kolkaści ludziej, jakija padtrymlivajuć «vajennuju apieracyju» i niezaležnaść tak zvanych «DNR» i «ŁNR».
U toj ža čas raście piesimizm u dačynieńni da asabistaha finansavaha stanovišča ŭ suviazi z sankcyjami, uviedzienymi ŭ dačynieńni da Rasii krainami Zachadu.
Pry hetym, adznačajuć aŭtary, vyniki druhoha apytańnia, praviedzienaha 12—13 sakavika, u pieryjad uzmacnieńnia žorstkaści dziaržaŭnaha kantrolu za srodkami masavaj infarmacyi i svabodaj słova, treba interpretavać z ulikam mahčymaha ŭpłyvu strachu i sacyjalnaj praduziataści pry staŭleńni da infarmacyi.
Apytańni taksama pakazali, što try čverci nasielnictva Rasii daviedvajecca pra vajnu z televizara.
Ź ich 87 pracentaŭ (i 64 pracenty ŭsich žycharoŭ Rasii) — ź dziaržaŭnych telekanałaŭ. 22 pracenty rasijan karystajucca radyjopryjomnikam dla atrymańnia navin, i tolki adzin pracent respandentaŭ atrymlivaje dostup da infarmacyi na karotkich chvalach.
Vykarystoŭvajuć VPN dla atrymańnia navin pra «vajennuju apieracyju», pa danych daśledavańnia, piać z pałovaj pracentaŭ apytanych.
Z tych, chto naohuł vykarystoŭvaje internet, kab daviedvacca naviny pra vajnu, 37 pracentaŭ nie viedajuć, što takoje VPN.
Juciubam karystajucca 11 pracentaŭ respandentaŭ, Telehramam — siem.
Na dumku sacyjołahaŭ, maładyja rasijanie va ŭzroście da 35 hadoŭ z bolšaj vierahodnaściu buduć ź niekatorym ci poŭnym niedavieram stavicca da navin pra Ukrainu ŭ paraŭnańni sa starejšym pakaleńniem.
U toj ža čas aŭtary daśledavańnia adznačajuć, što maładyja rasijanie va ŭzrostavaj hrupie ad 18 da 24 hadoŭ čaściej vykazvali abyjakavaść da taho, što adbyvajecca va Ukrainie.
Adkazvajučy na pytańnie ab tym, jak na ich upłyvajuć dziejańni prezidenta Rasii, tracina respandentaŭ zajaviła, što ćviorda vierać, što Pucin pracuje ŭ ich intaresach, a jašče 26 pracentaŭ havorać, što jon u niejkaj stupieni pracuje ŭ ich intaresach.
U cełym bolšaść rasijan ličyć, što było b lepš, kali b Pucin zastavaŭsia prezidentam jak maha daŭžej.
Hetaje mierkavańnie najbolej raspaŭsiudžanaje siarod televizijnaj aŭdytoryi. Rasijanie, jakija atrymlivajuć infarmacyju praz asabistyja suviazi i ličbavyja płatformy, usprymajuć prezidenta inakš, havorycca ŭ daśledavańni niezaležnych rasijskich sacyjołahaŭ.
- Rasijskaje ŭzbrojenaje ŭvarvańnie na terytoryju Ukrainy pačałosia 24 lutaha pa zahadzie Uładzimira Pucina. Metami vajennaj apieracyi jon nazvaŭ «denacyfikacyju» i «demilitaryzacyju» Ukrainy, ale nie ŭdakładniŭ, što kankretna maje na ŭvazie.
- Z-za vajny ZŠA i krainy Zachadu ŭviali ŭ dačynieńni da Maskvy žorstkija sankcyi, jakija zakranuli nie tolki palitykaŭ i čynoŭnikaŭ, ale i zvyčajnych hramadzian.
«Šynvize — končany sadyst». Adzin z adyjoznych načalnikaŭ kałonii Babrujska pierabraŭsia ŭ Hiermaniju28
Kamientary