U 2021-m siłaviki zaviali kala 5500 kryminalnych spraŭ za pratesty
Letaś u Biełarusi zarehistravana 87,7 tysiač złačynstvaŭ. Siłaviki adznačajuć, što heta na 7,8 tysiačy mienš, čym u 2020-m, paviedamlaje hazieta «Na stražie». Pry hetym spravaŭ za «pratesnuju dziejnaść» było kala 5500. I jašče cikavaje nazirańnie: z času atrymańnia niezaležnaści ŭ vyšuku znachodzicca 2,5 tysiačy čałaviek. Dyk voś, amal pałovu ź ich u vyšuk abviaścili ŭ 2021-m.
Raniej abjadnańnie chakieraŭ publikavała zapis z hołasam, padobnym da hołasu tahačasnaha namieśnika ministra ŭnutranych spravaŭ Alaksandra Barsukova, jaki davaŭ kamandu mienš źviartać uvahu na złačynstvy na pobytavaj hlebie (asnoŭny hałaŭny bol dla sistemy).
Paśla vybaraŭ asnoŭnyja vysiłki byli nakiravanyja na złačynstvy, źviazanyja z masavymi pratestami, u 2021-m dadałasia ŭzmocnienaja baraćba z ekstremizmam i teraryzmam. Tak adbyłosia pieraraźmierkavańnie śpiecyjalistaŭ i premij za vykananuju rabotu.
Što tyčycca astatnich vidaŭ złačynstvaŭ, to źmienšyłasia ich kolkaść pa linii kryminalnaha vyšuku — zabojstvy, ciažkija cialesnyja paškodžańni, vykradańnie aŭto, machlarstva, vymahalnictva, kradziažy.
Upieršyniu za piać hod skaraciłasia kolkaść zarehistravanych kibierzłačynstvaŭ. Tym časam było zarehistravana kala 5,5 tysiačy złačynstvaŭ «pratesnaj skiravanaści».
Źmienšyłasia kolkaść DTZ — 3 333 vypadkaŭ zarehistravana letaś, u 2020 — 3 599, 2019 — 3 567, 2018 — 3 399, 2017 — 3418. Apošnija piać hod prykładna 10% zdareńniaŭ adbyvajucca pa vinie pjanych kiroŭcaŭ, heta bolš za 300 čałaviek, letaś takich faktaŭ było krychu mienš — 282 (8,5% ad usich DTZ). Pa-raniejšamu kolkaść paciarpiełych ŭ darožna-transpartnych zdareńniach pieravyšaje ličbu ŭ 4 tysiačy čałaviek, hinuć kožny hod bolš za 500.
Adnak bolš čym na čverć pavialičyłasia kolkaść ciažkich i asabliva ciažkich złačynstvaŭ, asabliva ŭ śfierach narkakantrolu i supraćdziejańnia handlu ludźmi.
Taksama na rost paŭpłyvali źmieny ŭ Kryminalnym kodeksie, kali pavialičyli terminy adkaznaści pa «pratesnych» artykułach — za supraciŭleńnie siłavikam, hvałt ci pahrozu hvałtu ŭ dačynieńni da siłavikoŭ i inšych słužbovych asob.
Pryčyny złačynnaści ŭ Biełarusi nie mianiajucca dziesiacihodździami — ałkahalizacyja nasielnictva, siamiejna-bytavyja prablemy, vysoki ŭzrovień recedyvaŭ złačynnaści i niehatyŭny ŭpłyŭ raniej sudzimych ludziej.
Byli pytańni da dziejańniaŭ mihrantaŭ na terytoryi krainy. Ale siłaviki prablemy nie bačać.
MUS adznačaje, što niahledziačy na značny rost kolkaści zamiežnikaŭ, abstanoŭka ŭ śfiery mihracyjnaha kantrolu była biaśpiečnaj, stabilnaj i kirujemaj, a kolkaść złačynstvaŭ, jakija ździejśnili zamiežniki, letaś navat źmienšyłasia.
Nahadajem, što ŭłady praihnaravali zvaroty hramadzian z prośbami pryciahnuć da adkaznaści mihrantaŭ za niezakonnuju vyrubku lesu ŭ pryhraničnaj zonie. Šturm miažy ź biełaruskaha boku i paškodžańnie infrastruktury pamiežnaha punkta taksama zastalisia biez pravavoj acenki.
Kamientary