«Reputacyi dziaržavy naniesienaja škoda», — prezident Litvy pra situacyju z tranzitam biełaruskaha kaliju
Prezident Litvy Hitanas Naŭsieda kaža, što paśla zajaŭ ministraŭ transpartu i zamiežnych spraŭ ab ich hatoŭnaści padać u adstaŭku nielha čakać, pakul hetyja rašeńni atrymajuć acenku premjera Inhrydy Šymanicie, piša Delfi.lt.
Pa słovach prezidenta, heta adkaznaść samich ministraŭ. «Kali kažuć, što ministry hatovyja padać u adstaŭku, u zachodniaj praktycy jany heta i robiać. Jany padajuć zajavu ab sychodzie, i tady inšyja instytucyi prymajuć adpaviednyja rašeńni. Nielha čakać, pakul rašeńniam chtości daść acenku. Heta pierš za ŭsio adkaznaść samoha palityka», — skazaŭ prezident žurnalistam u piatnicu.
Jon adznačyŭ, što reputacyi dziaržavy była naniesienaja vialikaja škoda, kali tranzit biełaruskich uhnajeńniaŭ praź Litvu nie spyniŭsia, niahledziačy na amierykanskija sankcyi dla «Biełaruśkalija», što nabyli moc 8 śniežnia.
«Dekłarujučy, što my prytrymlivajemsia kaštoŭnasnaj źniešniaj palityki, my nie možam vyklikać ni najmienšych sumnievaŭ u partnioraŭ, čaho my nasamreč prytrymlivajemsia. Dekłaracyi pavinny adpaviadać našym kankretnym dziejańniam», — skazaŭ Naŭsieda.
«Toje, što było zroblena da hetaj pary, na moj pohlad, nie całkam adpaviadaje pryncypu palityčnaj adkaznaści», — dadaŭ jon.
Naŭsieda skazaŭ, što kali mieć na ŭvazie, što pra sankcyi ZŠA dla «Biełaruśkalija» było abvieščana jašče ŭ žniŭni, u Litvy było dastatkova času padrychtavacca, uzvažyć usie akaličnaści, minimizavać straty i paraicca z sajuźnikami.
«Ale ŭsio heta robicca tolki ciapier. Pytańnie, čamu. Čamu było stračana stolki času i nie zroblenyja hetyja dziejańni, jakija ciapier davodzicca rabić paśpiešna», — skazaŭ prezident Litvy.
Jon padkreśliŭ, što Litva nie moža stvarać svaimi dziejańniami nijakaj dvuchsensoŭnaści i pavinna pastupać paśladoŭna. Naŭsieda taksama skazaŭ, što na nastupnym tydni płanuje sustrecca z Šymanicie.
Paśla ŭstupleńnia ŭ siłu ŭ sieradu sankcyj ZŠA dla «Biełaruśkalija» jaho tranzit praź Litvu nie spyniŭsia. Pakolki pradpryjemstva jašče ŭ listapadzie praviało avansavy płaciož Litoŭskaj čyhuncy za pasłuhi, hetych srodkaŭ moža chapić dla pieravozak u śniežni, studzieni i lutym.
Ministr transpartu Maryjus Skuodzis i ministr zamiežnych spraŭ Habryelus Łandśbierhis u čaćvier skazali, što prymajuć na siabie adkaznaść za situacyju i hatovyja padać u adstaŭku. Premjer paabiacała na pačatku nastupnaha tydnia abviaścić rašeńnie pa ministrach.
«Naniesienaja reputacyjnaja škoda»: kiraŭnik MZS Litvy zajaviŭ, što sydzie ŭ adstaŭku praź biełaruski kalij
«Heta hałaŭny bol dla ŭrada»: daradca prezidenta Litvy vykazałasia nakont situacyi vakoł «Biełaruśkalija»
ZŠA vydali Biełaruskaj kalijnaj kampanii licenziju da 1 krasavika 2022 hoda
Ciapier čytajuć
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary