Novy kiraŭnik SK Viciebskaj vobłaści pryjšoŭ na fonie skandału: były prakuror horada patrapiŭ za kraty
Učora stała viadoma, što ŭ Viciebskaha abłasnoha SK novy načalnik — Alaksandr Hucko, jaki da taho byŭ namieśnikam načalnika ŭpraŭleńnia pa Homielskaj vobłaści.
Raniejšy načalnik SK pa Viciebskaj vobłaści, hienierał-major justycyi Pavieł Ihnataŭ zvolnieny sa słužby pa stanie zdaroŭja.
Heta taki svojeasablivy hienieralski «łajfchak», bo vychad na piensiju dla hienierał-majora ŭstanoŭleny ŭ 55 hadoŭ, da jakich Ihnatavu jašče bahata. Adnak paśla miedycynskaj kamisii možna atrymlivać hienieralskuju piensiju, nie dapracoŭvajučy pa ŭzroście.
Možna było b padumać, što heta prosta novy načalnik Dźmitryj Hora prybiraje vychadcaŭ ź milicejskaha śledstva i pryznačaje prakurorskich, blizkich sabie.
Ale ŭsie hetyja rakiroŭki, jak stała viadoma «Našaj Nivie», adbyvajucca na fonie hrandyjoznaha skandału.
Tak, za kratami ŭ Minsku pa abvinavačvańni ŭ karupcyi znachodzicca niadaŭni prakuror Viciebska Juryj Ramanoŭski. Razam ź im u 2021 hodzie zatrymany jašče adzin rabotnik viciebskaj prakuratury i adzin śledčy.
Jak viadoma z našych krynic, u 2020-m Juryj Ramanoŭski prajaviŭ siabie ŭ spravie premiravańnia padnačalenych za padtrymku palityčnych abvinavačvańniaŭ.
Karjera jaho skončyłasia imkliva. Siabry eks-prakurora nibyta zabili łasia, jakoha ŭ tych abstavinach zabivać było nielha. A Ramanoŭski nie toje što nie zavioŭ na ich kryminalnuju spravu, ale i nibyta jeŭ łasia razam ź imi, što ŭ vyniku stała viadoma vyšejšamu načalstvu ŭ Minsku.
Pa našaj infarmacyi, dasłanaja pravierka zaśpieła Ramanoŭskaha ŭ stanie, jaki nielha nazvać pracoŭnymi, paśla čaho jaho i zvolnili. A praź niekalki miesiacaŭ aryštavali.
Taksama našy krynicy dadajuć, što vykryłasia suviaź miž Ramanoŭskim i adnym z rabotnikaŭ abłasnoha śledstva. Detali hetaj suviazi nam nieviadomyja, ale ciapier abodva vyvučajuć svaje spravy ŭ minskim izalatary.
Razam z hetymi dvuma za kratami akazaŭsia načalnik adździeła viciebskaj abłasnoj prakuratury. Surazmoŭcy «NN» adznačajuć, načalnika adździeła vinavaciać ŭ tym, što jon nibyta braŭ chabary ad žonki viciebskaha čynoŭnika i śpievaka Illi Smunieva, jaki ciapier abvieščany ŭ vyšuk.
Cikava, što pa našaj infarmacyi, Smunieŭ padtrymlivaŭ ciopłyja adnosiny z eks-prakuroram Ramanoŭskim.
U pres-słužbie Hienieralnaj prakuratury zapyt «Našaj Nivy» adnosna sapraŭdnych detalaŭ hetaj historyi pračytali, ale praihnaravali. Jak tolki my atrymajem kamientar na hety kont, adrazu ž jaho apublikujem.
Što viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?18
Što viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu2222
Kamientary