Fiłosaf Mackievič z-za krataŭ: Mianie źbirajucca sudzić za dumki, jak pavodle Orueła

Prapanujem niekatoryja adkazy na pytańni.

— Uładzimir, jak vy siabie adčuvajecie? Jak vy pastavilisia da svajho aryštu, heta było čakana?

— Pačuvajusia narmalna. Pierapady nastroju rehuluju z dapamohaj miedytacyi, himnastyki i malitvy. Aryšt byŭ čakany, pryčym na praciahu ŭsiaho hoda, ale, jak heta časta byvaje, usio adbyłosia niečakana. Ja dumaŭ, što mianie mohuć uziać u aeraporcie ci ŭ čas vyletu/prylotu, ale kali hetaha nie zdaryłasia, ja trochi rassłabiŭsia. I voś tady za mnoj pryjšli. Maja razhublenaść doŭžyłasia niekalki chvilin.

— Vas abvinavačvajuć pa ŭžo «narodnym» artykule ab «arhanizacyi dziejańniaŭ, jakija hruba parušajuć hramadski paradak», pa joj prachodzić šmat palitviaźniaŭ Biełarusi. Jak vy možacie prakamientavać abvinavačvańnie suprać siabie?

— U abvinavačvańni, jakoje ja atrymaŭ, nie nazvana nivodnaje majo dziejańnie abo ŭčynak, niama nivodnaha epizodu. Ja razumieju, što padstavaj dla aryštu stali maje artykuły, vykazvańni, idei i dumki, h.zn. mianie źbirajucca sudzić za «dumkazłačynstva» pavodle Orueła.

— Kali ŭłady praz hod palityčnaha kryzisu dajšli da aryštu fiłosafa, što heta značyć? Jak charaktaryzuje situacyju ŭ krainie?

—Ja ŭžo amal adkazaŭ na hetaje pytańnie. Režym aryštavaŭ lidaraŭ, zdušyŭ i zapałochaŭ aktyvistaŭ, adčuŭ siabie biespakaranym, tamu biarecca za ŭsio, što źjaŭlajecca krynicaj lubych pieramienaŭ, prahresu, niasie pahrozu. Uziaŭsia i za svabodnuju dumku. Represii suprać fiłosafaŭ i intelektuałaŭ charakternyja dla tatalitarnych režymaŭ, jakija pretendujuć na poŭnuju pierabudovu śvietu, a dla aŭtarytarnych režymaŭ — heta, chutčej, kazus i promach…

 — U 2018-2019 hadach vy kazali, što hałoŭnaje pytańnie, jakoje budzie stajać u Biełarusi ŭ 2020 hodzie: «chto, kali nie jon?»(Alaksandr Łukašenka). A jakoje hałoŭnaje pytańnie dla krainy ciapier?

— Takaja situacyja, jak u 2020 hodzie, składvajecca niačasta, kali roznyja siły i tendencyi sychodziacca ŭ adzin punkt i ich možna sfarmulavać u adnym pytańni. Praŭda, na jaho nie isnuje prostaha adkazu. Ciapier situacyja zusim nie takaja. Niama prostych pytańniaŭ, niama prostych adkazaŭ…

— U apošni čas vy vielmi šmat pisali ab situacyi ŭ Biełarusi. Jak vy bačycie vynik padziej u krainie?

— Kančatkovy vynik možna apisać słovami Vitala Silickaha, jakimi jon nazvaŭ svoj artykuł «Dyktatura rujnujecca». Da hetaha ja mahu dadać tolki: «Amin». Voś tolki Silicki nie dažyŭ da hetaj niepaźbiežnaj padziei, a ja nie mahu skazać, kali mienavita heta adbudziecca.

• 0
• 0
• 0
• 0
• 0
• 0
• 0
• 0