Zołatavu, Łojka, Taŭkačovu i inšych supracoŭnikaŭ Tut.by pakidajuć pad vartaj — u SIZA

Siarod padazravanych supracoŭniki redakcyi — hałoŭny redaktar Maryna Zołatava, redaktar Volha Łojka, žurnalistka Alena Taŭkačova — jakija nie mieli dačynieńnia da finansava-haspadarčaj dziejnaści Tut.by.

Jak paviedamlajuć svajaki, Marynu Zołatavu, Volhu Łojka, Alenu Taŭkačovu, Ału Łapatko, a taksama namieśnika dyrektara Irynu Rybałka, namieśnika hałoŭnaha buchhałtara Maryju Novik pieraviaduć u SIZA №1 na Vaładarskaha. U ich status padazravanych.

Hałoŭnaha buchhałtara TAA «Tutbaj Miedyja» Anžełu Asad taksama ŭziali pad vartu. Dzie jana znachodzicca i budzie ŭtrymlivacca, svajakam dakładna nieviadoma.

Dyrektaru RocketData Darji Daniłavaj vystaŭlenaje abvinavačvańnie pavodle art. 243 KK (uchileńnie ad vypłaty padatkaŭ). Jana znachodzicca ŭ SIZA KDB.

Siońnia skončylisia 72 hadziny paśla zatrymańnia, čakali, što ich adpuściać.

Pieravod u SIZA aznačaje, što jany źjaŭlajucca padazravanymi. Na praciahu 10 sutak z momantu zatrymańnia im pavinny vystavić abvinavačvańnie.

Nahadajem, ranicaj 18 maja siłaviki ŭvarvalisia ŭ hałoŭny i rehijanalnyja ofisy Tut.by i ŭ kvatery niekalkich supracoŭnikaŭ.

U Kamitecie dziaržkantrolu zajavili, što ŭ dačynieńni da słužbovych asob TAA «Tut baj Miedyja» raspačataja kryminalnaja sprava pa prykmietach składu złačynstva, praduhledžanaha č. 2 art. 243 KK (Uchileńnie ad vypłaty sum padatkaŭ, zboraŭ u asabliva bujnym pamiery). Majučy status rezidenta PVT, kampanija nibyta atrymlivała vyručku, nie abumoŭlenuju dziejnaściu, dazvolenaj dla rezidentaŭ, paviedamlaje partał.

Supracoŭniki, jakija byli ŭ hałoŭnym ofisie, i žurnalisty, što pryjechali da ich, pierastali vychodzić na suviaź. Mnohich ź ich pratrymali ŭ budynku da poźniaj nočy.

Paralelna z hetym Mininfarm abmiežavaŭ dostup da sajta Tut.by, spasyłajučysia na toje, što Hienprakuratura ŭstanaviła fakty parušeńniaŭ zakona ab ŚMI ŭ častcy raźmiaščeńnia ŭ publikacyjach zabaronienaj infarmacyi. U pryvatnaści niezarehistravanaha fondu BYSOL. Abmiežavany dostup i da inšych internet-resursaŭ TUT.BY, uklučajučy poštu mail.tut.bu i prajekt pa zbory hrošaj na lačeńnie help.blog.tut.by.

Pieratrusy prajšli ŭ hałoŭnaha redaktara Maryny Zołatavaj, redaktaraŭ Hanny Rudenka, Volhi Saŭkiŭ, namieśnika hałoŭnaha redaktara Maksima Hajko, žurnalistki Aleny Taŭkačovaj.

Hanna Rudenka i Volha Saŭkiŭ paśla pieratrusaŭ zastalisia na voli. Marynu Zołatavu i Alenu Taŭkačovu zabrali na dopyt u DFR. Hałoŭny redaktar paśpieła paviedamić, što jana, dyrektar TAA «Tut baj miedyja» Ludmiła Čekina i hałoŭny buchhałtar kampanii Anžeła Asad mohuć prachodzić pa artykule 243 KK.

Maksim Hajko vyjšaŭ na volu ŭviečary paśla dopytu ŭ DFR, u toj čas jak niekatorych supracoŭnikaŭ pavieźli ŭ IČU na Akreścina.

U hety ž dzień siłaviki prychodzili taksama ŭ ofisy Hoster.by i av.by.

Čytajcie taksama:

Čym admietnyja žurnalistki Tut.by Volha Łojka i Alena Taŭkačova, jakich zatrymaŭ DFR

Piać faktaŭ pra zatrymanuju redaktarku Tut.by Marynu Zołatavu

• 0
• 0
• 0
• 0
• 0
• 0
• 0
• 0