«Infarmacyja, jakaja parušaje palityčnyja pierakanańni». Ideołahi znajšli palityčnuju rekłamu na tavarach u hrodzienskaj kramie «Admietnaść»
Hrodzienskaja krama suvieniraŭ i adzieńnia ŭ nacyjanalnym styli «Admietnaść» atrymała pradpisańnie z adździeła ideałohii Hrodzienskaha harvykankama. U im skazana, što na tavarach raźmieščana palityčnaja rekłama z parušeńniem Zakona ab rekłamie, piša hrodna.life
«Tak, na prapanavanych da prodažu pradmietach adzieńnia i suvienirnaj pradukcyi źmiaščajecca infarmacyja, jakaja parušaje palityčnyja i inšyja pierakanańni hramadzian», — skazana ŭ dakumiencie.
Parušeńnie vyjavili ŭ čas manitorynhu 21 krasavika na pradmiet vykanańnia zakanadaŭstva, udakładniajuć u pradpisańni. «Akazvajecca, u nas byŭ manitorynh!», — aburajecca supracoŭnica kramy Volha Vieramiejenka.
Adździeł ideałahičnaj raboty i pa spravach moładzi harvykankama adznačaje parušeńnie art. 26 p. 3 Zakona ab rekłamie (Nienaležnaja rekłama). Za parušeńnie dla indyvidualnaha pradprymalnika praduhledžany štraf ad 10 da 20 bazavych vieličyń (ad 290 da 580 rubloŭ). Upraŭleńnie handlu i pasłuh harvykankama zahadvaje likvidavać parušeńnie ŭ trochdzionny termin. Taksama ciaham siami dzion treba piśmova infarmavać adździeł ideałohii ab pryniatych mierach.
U kramie raspaviali, što pakul nie razumiejuć, što rabić. U dakumiencie nie tłumačać, pra jakuju mienavita infarmacyju i na jakich pradmietach idzie havorka. Ułaśnik kramy Siarhiej Vieramiejenka źbirajecca raicca ź jurystami.
Datelefanavacca ŭ adździeł ideałahičnaj pracy harvykankama i atrymać tam kamientar Hrodna.life nie ŭdałosia.
21 krasavika «Admietnaść» atrymała zapyt ad upraŭleńnia handlu harvykankama na pradastaŭleńnie infarmacyi ŭ suviazi z atrymanymi skarhami. Skarhi na prodaž bieł-čyrvona-biełaj simvoliki haradskija ŭłady atrymali ad Alaksandra Kavalova ź vioski Bihosava Vierchniedźvinskaha rajona (Viciebskaja vobłaść). Jon nazvaŭ bieła-čyrvona-bieły ściah «pranacyscka-pratestnym».
Kamientary