Nam prapanujuć ekanom-kłas. Na rasijskim borcie

Małočnaja vajna, jakuju biełaruskija čynoŭniki admaŭlajuć, moža kaštavać nam, pavodle «Kommiersanta», miljard dołaraŭ. Udvaja bolej, čym taja niaščasnaja tranša, praź jakuju nibyta razhareŭsia syr-bor.

Nasamreč pryčyny kanfliktu hłybiejšyja. Łukašenka byŭ ščyry, kali kazaŭ, što rasijcy chočuć nas «biaspłatna ŭ kišeń pakłaści». U intervju maskoŭskim redaktaram jon vydaŭ pierypietyi zakulisnaha boju za biełaruskuju małočnuju halinu.

«Dajšło da taho, što małako nie budziem u vas kuplać, pakul nie addaście małakapierapracoŭčyja zavody. I heta na uzroŭni ŭradu!.. Ja kažu: “Da pabačeńnia. Tak razmaŭlać my nie dazvolim. Budziem, kažu, zdychać, vylivać heta małako, ale vy tak pytańnie stavić nie budziecie”». Voś tak emacyjna pierakazaŭ Łukašenka svoj dyjałoh ź nieviadomym rasijskim uradoŭcam (Pucinym?).

U ichnych ža kiroŭnych dziejačaŭ bahaty admysłovy dośvied. Jany nie łajucca, a ładziać śpiecapieracyi.

Na scenu vyjšaŭ hałoŭny sanitarny doktar Rasii Aniščanka. Toj samy, što ŭžo abviaščaŭ vajnu łatvijskim šprotam i hruzinskamu baržomi. Ciapier jon apuściŭ šłahbaŭm pierad biełaruskaj małočnaj pradukcyjaj blizu 500 najmieńniaŭ.

Farmalna ŭ Rasii jość začepki, kab tarmazić naš małočny ekspart. Pa-pieršaje, niekatorym našym vytvorcam u łom było pieraaformić niejkija techničnyja papiery. Pa-druhoje, datacyi na vytvorčaść małaka ŭ Biełarusi značna bolšyja.

Niezaležny ekanamist Leanid Złotnikaŭ ŭvohule kaža, što my pradajem małočnyja pradukty za miažu va ŭron sabie. Pryvodzić prykład: u śniežni — studzieni masła išło ŭ Rasiju pa 2,8 dołara za kiło, a ŭ našych kramach kaštavała 4,6.

Vyjście, pavodle ekanamista, — u refarmavańni APK, kab možna było nie zamykacca na Rasiju, a pradavać u Jeŭropie.

Ale heta doŭhaja pieśnia. A rasijski kapitał užo natačyŭ zuby. I małočnaj halinoj jaho apietyt nie abmiažoŭvajecca.

Tym časam ministr Kudryn vydaŭ čarhovuju porcyju zajaŭ. Tak, ź jaho słoŭ, Łukašenka ŭzvaliŭ na siabie nadta vialiki ciažar, kali admoviŭsia ad adzinaj valuty. Heta, maŭlaŭ, była stratehičnaja pamyłka (čytaj: za jakuju zaraz i raspłočvajeciesia).

Sa słoŭ Kudryna vynikaje, što Biełaruś uvohule musić tryvać dadatkovyja zatraty praz svoj suvierenitet. Paličycie, maŭlaŭ: bankaŭskaja sistema, vojska, mytnia, hruvastki aparat kiravańnia... Treba razumieć, što Paŭnočna-Zachodni kraj byŭ by kudy bolej ekanamičnym varyjantam.

Razvahi Kudryna simptamatyčnyja. Peŭna, tak sama razvažajuć u Kramli. I takija arhumienty davodziać biełaruskamu kiraŭniku. Jaki sam pastajanna ćvierdzić, što biełarusy i ruskija — adzin narod. Voś i dziviacca kramloŭcy: našto ž tady roham upiracca?

• 0
• 0
• 0
• 0
• 0
• 0
• 0
• 0