Vasil Markovič — adzin z najbolš daśviedčanych dypłamataŭ Biełarusi. U struktury MZS Biełarusi jon adpracavaŭ amal 30 hadoŭ. U vieraśni jon byŭ adpraŭleny ŭ adstaŭku z pasady pasła Biełarusi ŭ Łatvii, a taksama pazbaŭleny ranhu nadzvyčajnaha i paŭnamocnaha pasła.
Što ž stajała za hetym tajamničym zvalnieńniem?
«Razumnyja ŭsio zrazumiejuć, a durniam i nie patrebna viedać»,
— adkazvaje spadar Vasil, jaki ciapier znachodzicca ŭ Biełarusi, u svaim domie pad Łahojskam.
Markovič pryznaje, što sapraŭdy i na sustrečach z dyjasparaj, i ŭ razmovach z žurnalistami kazaŭ pra toje, što na ŭčastku dla hałasavańnia ŭ Ryzie pieramahła Śviatłana Cichanoŭskaja.
«U nas było kala 700 vybarcaŭ, u asnoŭnym moładź. Ja navat nie byŭ staršynioj vybarčaj kamisii, ale da mianie źviartalisia pa kamientar. My ničoha nie stali chavać, ahučyli, što majem takija ličby i što pavodle ich pieramahła Cichanoŭskaja».
Ci škaduje Vasil Markovič ab zroblenym: «Kaniečnie, nie škaduju. Usio da lepšaha». Zasmučany dypłamat tym, što z MZS byli zvolnienyja jašče dva supracoŭniki pasolstva ŭ Łatvii — heta savietnik-pasłańnik Alaksiej Maciuchievič i staršy savietnik Andrej Aŭramienka. «Razumnyja, tałkovyja chłopcy, viedajuć šmat moŭ. Škada, što ź imi tak».
Taksama «NN» pacikaviłasia, ci źviazvajuć Vasila Markoviča siabroŭskija adnosiny ź ministram zamiežnych spraŭ Uładzimiram Makiejem.
«Razumiejecie, nas takich, chto na słužbie ŭ MZS amal 30 hadoŭ, užo niamnoha zastałosia — ja, Makiej, Laščenia [były pasoł u Słavakii, jaki vykazaŭsia suprać hvałtu i byŭ zvolnieny — «NN»], Barysievič, Alejnik. My ŭsie adzin adnaho viedajem da končykaŭ paznohciaŭ».
«Viadoma, kryŭdna, što pazbavili ranhu. Lubomu čałavieku było b kryŭdna, a tym bolš, kali addaŭ stolki hadoŭ dypłamatyčnaj słužbie», — kaža były pasoł.
Vasil Markovič naradziŭsia ŭ 1955 hodzie ŭ Kažan-Haradku Bresckaj vobłaści. Vučyŭsia ŭ Maskvie, u MDIMA. Pracavaŭ jašče ŭ savieckim pasolstvie ŭ Bonie. Paśla razvału SSSR viarnuŭsia ŭ Biełaruś. Pracavaŭ konsułam pasolstva Biełarusi ŭ Hiermanii, pracavaŭ tam pad kiraŭnictvam Piatra Sadoŭskaha. Byŭ konsułam Biełarusi ŭ Daŭhapiłsie, pasłom u Čechii i Łatvii. Uznačalvaŭ kadravaje ŭpraŭleńnie MZS.
Zhodna z aficyjnymi vynikami hałasavańnia ŭ Łatvii, Cichanoŭskaja nabrała 59% hałasoŭ, Łukašenka — 34%.
Ciapier čytajuć
Brat biełaruskaj karalevy pryhažości trapiŭ u reanimacyju ŭ Azierbajdžanie6
Brat biełaruskaj karalevy pryhažości trapiŭ u reanimacyju ŭ Azierbajdžanie
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary