Były palitviazień Arciom Dubski raskazaŭ, jak dabiŭsia biełarusizacyi pašpartnaha napisańnia svajho imieni
Były palitviazień Arciom Dubski raskazaŭ, jak zmoh źmianić tranślitaracyju svajho proźvišča ŭ pašparcie na łacinku.
Apošnija hady chłopiec žyvie i pracuje ŭ Varšavie. Toje, što ŭ biełaruskich dakumientach jon byŭ zapisany jak Artem Dybski (a nie Arciom Dubski), prynosiła niazručnaści.
«Kali moj pašpart traplaje ŭ ruki palaku, to tranślitaracyja pieratvaraje mianie ŭ Artema Dybskiha — pahadziciesia, fanietyčna heta daloka ad taho, što zadumvałasia», — narakaje jon.
U sakaviku Dubski skłaŭ zajavu ŭ departamient pa hramadzianstvie i mihracyi MUS. Napisaŭ, što pakolki biełaruskaja mova dla jaho rodnaja, jon maje prava na karektnaje ŭkazańnie piersanalnych dadzienych u pašparcie. Arciom spasyłaŭsia na Pastanovu MUS Biełarusi ad 9 kastryčnika 2008 hoda №288 (instrukcyju pa tranślitaracyi proźviščaŭ i ŭłasnych imion hramadzian Biełarusi pry ŭklučeńni ich piersanalnych dadzienych u rehistr nasielnictva) i padrabiazna raskłaŭ, jak musić pravilna vyhladać tranślitaracyja jaho imia.
Mužčyna pryvioŭ arhumient, što taki varyjant zapisany va ŭsich dakumientach, vydadzienych jamu ŭ Polščy. A taksama prykłaŭ artykuł «Našaj Nivy» pra toje, jak minčanin paŭhoda zmahaŭsia, kab jaho proźvišča ŭ pašparcie zapisali łacinkaj.
«Chaču paprasić vas pryniać rašeńnie, jakoje budzie adpaviadać nie tolki narmatyŭna-pravavym aktam, ale i zdarovamu sensu», — apielavaŭ Arciom u svajoj zajavie.
Siarod dakumientaŭ, jakija prykłaŭ, — kopii apošnich staronak pašpartu i paśviedčańnia ab naradžeńni, polskija dakumienty, vypiska ź dziaržaŭnaj instrukcyi ab tranślitaracyi.
Praz dva miesiacy z MUS pryjšoŭ stanoŭčy adkaz.
U liście adznačałasia, što traślitaracyja mahčymaja i z ruskamoŭnaha varyjanta napisańnia imia i proźvišča. Mianiać jaje pa svaim žadańni možna, ale tolki adzin raz.
«Razam z tym ličym mahčymym, u paradku vyklučeńnia, zadavolić vašu prośbu z metaj pryviadzieńnia ŭ adpaviednaść najaŭnych dakumientaŭ zamiežnaj dziaržavy z pašpartam hramadzianina Biełarusi», — napisana ŭ adkazie.
Kamientary