Most 1000-hodździa Bresta: jak vyhladaje samaja vialikaja (i pryhožaja) raźviazka Biełarusi FOTY
Brest zrabiŭ sabie raskošny padarunak na 1000-hodździe: novyja masty. Madernizavany Kobrynski paskoryŭ ruch na hałoŭnaj mahistrali horada. A sapraŭdny šedeŭr — heta šmatuzroŭnievaja raźviazka na Zachodnim abychodzie.
Jana zamknuła trasu, jakaja złučyła paŭdniovuju i paŭnočnuju častki horada, ujezdy z boku Varšavy i Ukrainy z ujezdam z boku Vysokaha. Daroha prarezała zachad horada ad voziera Soja da Rečycy, miž krepaściu i centram.
Brest — toj redki biełaruski horad, dzie nie redkija zatory. Heta źviazana z hieahrafijaj. Z uschodu na zachad horad pierarazaje raka Muchaviec. I paralelna joj taksama — čyhunka. U vyniku transpart upirajecca ŭ niekalki harłavin-mastoŭ.
Novaja trasa dazvalaje dajechać z Dubroŭki da Puhačova za 15 chvilin. Raniej taki šlach zajmaŭ 30 chvilin — i heta kali nie ŭprešsia ŭ zakryty pierajezd. Składanaja, ažurnaja forma raźviazki i tłumačycca tym, što jana zbudavanaja nad piaćciu čyhunačnymi kalejami. Hetyja puci pralehli jašče ŭ carski čas, kali horad całkam źmiaščaŭsia miž čyhunkaj i Muchaŭcam. Luby pierahon ciahnika spyniaŭ ruch na dziasiatki chvilin. Ciapier z Dubroŭki, Adamkova, Rečycy, Kacinbora ludzi zmohuć dajazdžać da centra i poŭdnia horada našmat chutčej, rezka źmienšacca vykidy aŭtamabilnych hazaŭ u atmaśfieru.
Prajektavali raźviazku adrazu niekalki biełaruskich prajektnych instytutaŭ. Hienieralnym padradčykam byŭ budtrest numar 8 Bresta. Tak što naša kraina zdolnaja svaimi siłami realizoŭvać takija niaprostyja budaŭničyja prajekty.
Pry budaŭnictvie byli znojdzienyja ŭnikalnyja rašeńni, niekatoryja ź ich zapatentavali. Častku mosta zalivali manalitam: u Biełarusi dla takoha mosta prosta nie chapiła b mahutnaści najaŭnaha ŭ krainie zavoda bietonnych kanstrukcyj. Kab palehčyć estakady, unutr bietona kłali pustaciełyja płastykavyja truby. Dla pravierki mocy mosta na jaho zahaniali adnačasova 10 hružanych 36-tonnych samazvałaŭ i viešali čujniki.
Na adkryćcio raźviazki pryjazdžaŭ prezident Biełarusi Alaksandr Łukašenka, a realizacyju idei adznačyć 1000-hodździe horada pabudovaj vialikich infrastrukturnych abjektaŭ u Breście źviazvajuć sa staršynioj harvykankama Alaksandram Rahačukom. Horad atrymaŭ na jubilej patrebny padarunak.
Kamientary