Ajciec Sierhij Lepin: Matrunčyk reahuje na pravierku Bractva impulsiŭna i nieadekvatna

Pietrapaŭłaŭski sabor u Minsku. Fota: Wikipedia Commons.

U žniŭni śpiecyjalnaja kamisija Biełaruskaj pravasłaŭnaj carkvy pačała pravierku dziejnaści Bractva śviatych vilenskich pakutnikaŭ, jakoje ŭznačalvaje Mikoła Matrunčyk. Bractva paŭstała ŭ pačatku 1990-ch hadoŭ i abjadnała pad svaim kryłom tych ludziej u pravasłaŭnaj carkvie, jakim darahija biełaruskaja mova i kultura. Z hetaj nahody «Naša Niva» zadała niekalki pytańniaŭ pres-sakrataru Biełaruskaj pravasłaŭnaj carkvy ajcu Sierhiju Lepinu.

— Biełaruskamoŭny siehmient Facebook uzbudaražany paviedamleńniami Mikoły Matrunčyka ab praviercy, jakaja ciapier pravodzicca ŭ Bractvie sviatych vilenskich pakutnikaŭ.

— Idzie pravierka bractva nakont adpaviednaści jaho dziejnaści jaho ž Statutu, Statutu BPC, pracoŭnamu zakanadaŭstvu, normam dakumientazvarotu i tak dalej. Ale zaŭvažu, što kamisija nie zajmajecca vyvučeńniem finansavaj dziejnaści bractva.

— Sam Matrunčyk niepakoicca, što pravierka zadumanaja dla taho, kab spynić dziejnaść bractva i što kiraŭnictvu RPC nie padabajecca jaho finansavaja niezaležnaść i apieratyŭnaja samastojnaść.

Pavialičyć

— Važnaja zaŭvaha: bractva źjaŭlajecca aficyjnaj strukturaj BPC, a nie pryvatnaj hramadzianskaj inicyjatyvaj! Finansavaja i inšyja vidy dziejnaści hetaj struktury rehłamientujucca jaje Statutam. Kiraŭnictva bractva padspravazdačnaje ijerarchii BPC i znachodzicca ŭ pramym padparadkavańni joj. Hałaŭnyja arhanizacyi zaŭsiody praviarajuć padnačalenyja — tut u nas jak paŭsiul: na lubym pradpryjemstvie byvajuć pravierki, ci nie tak?

U BPC isnuje Revizijnaja kamisija, jakaja ŭ adpaviednaści z Pałažeńniem ździajśniaje pravierku dziejnaści ŭsich biez vyklučeńnia prychodaŭ i manastyroŭ, sinadalnych arhanizacyj i navat jeparchijalnych upraŭleńniaŭ. Ja tak miarkuju, Vilenskaje bractva nikoli dahetul nie praviarałasia i, mahčyma, niekatoryja pačali dumać, što jaho naohuł nichto praviarać nie pavinien i nie maje prava.

— Ci nie źjaŭlajecca hetaja pravierka banalnaj sprobaj zadušyć farpost biełaruskaści ŭ BPC i skavać svabodnuju inicyjatyvu miran?

— Mitrapalit i členy Revizijnaj kamisii ź vialikaj pašanaj staviacca da ŭsiaho, što źviazana z patryjatyzmam. Nakolki ja pamiataju, dziejnaść bractva nieadnarazova adznačałasia ijerarchijaj, a jaho lidar navat byŭ uznaharodžany premijaj imia kniazia Kanstancina Astrožskaha. Ale ni biełaruskaść, ni ŭznaharody nie nadajuć nikomu nijakaha dadatkovaha imunitetu ad pravierak i nie robiać svaich uładalnikaŭ niedatykalnymi.

Revizijnaja kamisija nie źjaŭlajecca karajučym orhanam. Ale, kaniečnie, jana taksama i nie źjaŭlajecca arhanizacyjaj, jakaja ŭznaharodžvaje. U lik jaje zadač na samoj spravie ŭvachodzić, jak ja ŭžo adznačaŭ, pravierka dziejnaści ŭsich biez vyklučeńnia prychodaŭ i manastyroŭ, sinadalnych arhanizacyj i navat jeparchijalnych upraŭleńniaŭ. Kamisija vyjaŭlaje parušeńni ci niedachopy ŭ pracy jeparchijalnych struktur i pradstaŭlaje ich Ekzarchu, kab jon źviarnuŭ uvahu kiraŭnikoŭ na likvidacyju vyjaŭlenych parušeńniaŭ.

Kali ŭ kiraŭnictva bractva jość pretenzii da pracy Revizijnaj kamisii, kali jaje siabry zapytali infarmacyju, jakuju nie mieli prava zapytvać ci jašče štości zrabili nie tak, to nie treba navodzić cień na placień svaimi pastami ŭ FB, a treba prosta ahučyć svaje pretenzii — i pažadana nie ŭ FB, a ŭ piśmovaj formie na imia Ekzarcha.

Lubaja pravierka źjaŭlajecca padstavaj dla pieražyvańniaŭ i niepakoju z boku taho, kaho praviarajuć — heta zrazumieła kožnamu, asabliva tym, chto pavodle słužbovaha abaviazku maje spravu z pravierkami. Ale, na maju dumku, Matrunčyk reahuje niejak impulsiŭna i… nieadekvatna: sami jaho pavodziny ŭ Siecivie mohuć stać temaj asobnaha razboru, navat kali siońniašniaja kamisija i nie znajšła b nijakich chibaŭ.

— Ci pahražaje bractvu zakryćcio? Ci znojdzienyja niejkija niedachopy ŭ jaho pracy? Ci budzie pra heta viadoma hramadskaści?

— Ja nie ŭ kursie ŭsich materyjałaŭ pravierki. Ale mahu skazać nastupnaje. Nakolki mnie viadoma, nichto skasoŭvać bractva nie choča i nie źbirajecca. Niedachopy jość, i ich nasamreč niamała. Tym nie mienš, usie jany ŭ svajoj sukupnaści nie źjaŭlajucca padstavaj dla inicyjavańnia pracedury likvidacyi hetaj arhanizacyi. Tym bolš, što siońnia Śviaciejšy Patryjarch Kirył i jaho Ekzarch u Biełarusi asablivuju ŭvahu imknucca nadavać pracy z moładździu.

Ale ja miarkuju, što i peŭnaja reakcyja na pastanovy kamisii z boku kiraŭnictva bractva ŭsio ž budzie. Zvyčajna vyniki pracy Revizijnaj kamisii nie afišujucca — u tym liku i ŭ intaresach tych, kaho praviarajuć, bo vydavańnie vynikaŭ nie lepšym čynam moža paŭpłyvać na ich reputacyju nie tolki jak chryścijanskich lidaraŭ, ale i jak dziełavych partnioraŭ. 

Zvažajučy na publičnaść zajaŭ Matrunčyka, nie vyklučaju taho, što paśla zakančeńnia pracy kamisii mitrapalit Pavieł błahasłavić apublikavać usie vyjaŭlenyja zaŭvahi, kab kožny, chto taho žadaje, zmoh acanić situacyju sam.

• 0
• 0
• 0
• 0
• 0
• 0
• 0
• 0