Spoŭniłasia 20 hadoŭ z času vypusku pieršaha biełaruskaha muzyčnaha rolika.
Spoŭniłasia 20 hadoŭ z času vypusku pieršaha biełaruskaha muzyčnaha rolika.
Hetaj hadavinie byŭ pryśviečany II biełaruski klip-marafon, jaki adbyŭsia 28 śniežnia na siadzibie partyi BNF. Akcyju praviali Michał Niadźviecki i Franak Viačorka z «Moładzi BNF»
Byŭ pakazany sama pieršy biełaruski videaklip. Heta muzyčny rolik «Ura» hurta «Bonda», źniaty režysioram Vitalom Šuvahinym. Ścipły pa siońniašnim mierkam klip, što hladzicca, jak cikavy histaryčny dakumient – u 1988 hodzie kaštavaŭ «Žyhuli». U kadry udzielniki «Hukańnia viasny» vitajuć muzykaŭ – i raźbivajuć pazałočanyja mulažy Stalina.
Jašče adzin rarytet – čorna‑bieły «Homielski vals» 1996 hodu – razynka klip‑marafonu. Ličyłasia, što hety rolik, prymierkavany da 10‑hodździa Čarnobylu, jaki tak nidzie i nie pakazvaŭsia, źnik nazaŭždy. Ale klip znajšoŭsia. U roliku rok‑muzyka Ihar Varaškievič śpiavaje razam ź dziaržaŭnym papsavikom Anatolem Jarmolenkam, a sam «Homielski vals» źniaty Jahoram Chrustalovym.
Sučasnyja klipy, jakija byli raźmierkavanyja pa naminacyjach «Najlepšaja animacyja», «Najlepšy pierformans» i «Najlepšaja alternatyva» – śviedčać, što mastactva biełaruskaha videaklipu dasiahnuła daskanałaj mastackaj stałaści.
Asabliva ŭražvaje animacyja.
Klip «Da ciabie» Taciany Biełanohaj – liryčny rolik z daścipnaj płastylinavaj animacyjaj. «Try rasiejskija litary» ZIGZAGa i «Eŭravizija» Lavona Volskaha – chulihanski ściob z «soŭsna‑kryvavymi» i «cenzuravanymi» kadrami. Pieśnia «Kramy» «Padaje doždž» vykarystoŭvaje miedytatyŭnuju techniku Tarkoŭskaha j japonskaj animacyi (pryz arhanizataraŭ festu).
A voś «Try janhały» «Trojcy» – sapraŭdny fiłasofski šedeŭr z brejhieleŭskimi matyvami, technafalkłornymi cudami – i siurrealistyčna‑piaščotnaj biełaruskaj hrafikaj (pryz za najlepšuju animacyju).
Pierfomansy z aptymistyčnymi nazvami: «Lublu ludziej» (Tarpach), «Žyćcio» (Niejradziubiel) i «Śmierci niama» (Partyzone) – nasyčanyja pravakacyjnaj depresiŭna‑andehraŭndnaj atmaśfieraj. Sama vynachodlivy rolik «Tanki» hurtu ZIGZAG – kavier‑viersija adnajmiennaj kampazicyi Alaksandra Kullinkoviča. Try mumifakavanyja damy z soniečna‑atrutnymi fryzurami, rezkija ruchi, śnieńni, trubki z žyćciovymi vadkaściami, paranoja – i televizar. Rolik staŭsia debiutam biełaruskaha režysiora Arcioma Łobača (pryz za najlepšy pierformans).
Klipy «Alternatyvy» «Adlehłaść» (J:Mopc), «Daždžami» (B.N), «Kałychanka» (MAUZER), «Kastryčnik‑2» (ZIGZAG), «Nieba» (Krama) i «Nieba šeraje» (DALI) – zbolšaha roŭnyja i adzin pierad adnym nie vyłučajucca (pa vynikach hladackaha hałasavańnia pieramoh hurt «B.N»). U lubym vypadku, za hetyja roliki na muzyčnych kanałach nie budzie soramna.
20‑hodździe biełaruskich klipaŭ padsumavanaje j DVD–składankaj, jakaja pakidaje dobraje ŭražańnie. Dysk «Klip‑Marafon: najlepšaje biełaruskaje muzyčnaje videa 1988‑2008 hh.», utrymlivaje 43 muzyčnyja roliki (siarod ich – bolšaść, pakazanych na feście i mnohija inšyja). Nieŭzabavie jon musić źjavicca ŭ kramach.
Ciapier možna z upeŭnienaściu skazać: jość dobryja biełaruskija klipy.
I siarod ich jość šedeŭry – vartyja sučasnych muziejaŭ.
Ciapier čytajuć
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju1212
Kamientary