Chto hetyja ludzi, jakija masava raschvalvajuć Łukašenku ŭ kamientarach? Na hetym tydni jany masava pavalili ŭ Threads
U Rasii daśledčyki znachodziać cełyja «botafiermy» — sietki padrobnych abo skradzienych akaŭntaŭ, jakija pišuć toje, što treba ŭładam. Adnak u Biełarusi časta składana zrazumieć, chto staić za praŭładnymi kamientaryjami. «Lusterka» zaŭvažyła, što na hetym tydni prychilniki Łukašenki pačali aktyŭna vykazvacca ŭ Threads. Žurnalisty vyvučyli ich akaŭnty, kab daviedacca pra toje, chto ŭvachodzić u hetuju «supolnaść».
Što pišuć «praŭładnyja» kamientatary?
28 krasavika na biełaruska-polskaj miažy adbyŭsia abmien źniavolenymi ŭ farmacie «piać na piać». Biełaruś pieradała Polščy palitźniavolenaha Andreja Pačobuta, dvuch hramadzian Polščy i dvaich hramadzian Małdovy. Z Polščy vyjechali dva «biełaruskija raźviedčyki», dvoje hramadzian Rasii, asoba jašče adnaho, jaki prybyŭ, nie viadomaja.
Paśla hetaj naviny ŭ Threads źjaviłasia mnostva padobnych miž saboj kamientaroŭ, jakija roznymi sposabami chvalili Łukašenku i zhadvali humanizm.
Asablivaść Threads u tym, što płatforma dazvalaje ŭbačyć usie kamientaryi kankretnaha karystalnika. Akazałasia, što niekatoryja ŭdzielniki abmierkavańnia nastolki ŭražanyja abmienam z Polščaj, što vyrašyli vykazacca adrazu ŭ mnohich miescach.
Naprykład, karystalnik ź Biełarusi pad nikam qwerty_tatty zarehistravaŭsia ŭ krasaviku 2026 hoda. Jon nie zrabiŭ nivodnaj publikacyi i ni na kaho nie padpisaŭsia. Ale paśla naviny pra abmien źniavolenymi prakamientavaŭ jaje cełych dziesiać razoŭ u roznych abmierkavańniach. Jaho repliki nie paŭtarajucca dasłoŭna, ale ŭ cełym padobnyja miž saboj.
Karystalnica ź Biełarusi pad nikam ta_tya_na1975 zarehistravałasia jašče ŭ 2024 hodzie. Sama ničoha nie publikavała, nikomu nie adkazvała. Ale kali staŭsia abmien z Polščaj — adznačyłasia adrazu ŭ čatyroch «halinkach» Threads.
Chto staić za akaŭntami, jakija chvalać Łukašenku?
Adnak, kali vy dumajecie, što ŭsie pachvały Łukašenku pakinuli boty — heta značyć aŭtamatyzavanyja akaŭnty-pustyški, — heta daloka nie tak. Byli ananimy, ale byli i asabistyja profili z proźviščami i fotazdymkami. Akazałasia, što pad navinoj pra abmien adbyłasia masavaja pierapiska administrataraŭ i biudžetnikaŭ — pryčym hałoŭnym čynam z Mahiloŭskaj vobłaści.
«Biełaruś zaŭsiody za kanstruktyŭny dyjałoh», — napisała Taćciana Jelisiejenka. Jana pracuje ŭ Horackim piedahahičnym kaledžy namieśnikam dyrektara pa vychavaŭčaj pracy.
Pad hetym ža postam my naličyli jak minimum dvuch načalnic adździełaŭ ideałahičnaj pracy i pa spravach moładzi: «praščalnaha baćku» chvaliła Aksana Darahońka z Škłoŭskaha rajvykankama, a jaho palityčnuju mudraść acaniła Alena Kulašova z vykankama ŭ Bychavie. Adznačylisia i štatnyja ideołahi — Iryna Kozieł z Mazyra i Alena Ślesarenka z Karmy.
Jak dumajecie, chto vystupiŭ z krytykaj u bok «ašalełych», jakija vyjšli na svabodu? Heta była hałoŭnaja redaktarka kryčaŭskaj rajonnaj haziety Hanna Šynkarova. Padobnym mierkavańniem adznačyłasia i Natalla Kozik, hałoŭnaja redaktarka rajonnaj haziety «Čyrvony ściah. Krasnapolle».
U kamientarach znajšlisia i inšyja biudžetniki — supracoŭniki MNS i «Žyłkamhasa» z Kiraŭska, a taksama namieśnik hiendyrektara pradpryjemstva z Kryčava.
Što jašče kamientavaŭ hety «atrad biudžetnikaŭ»?
Praŭładnyja kamientatary aktyŭna ŭdzielničali i ŭ inšych abmierkavańniach. Naprykład, jany aktyŭna chvalili radzilny dom i škołu, jakija naviedvaŭ Łukašenka.
Jašče jany pakinuli niekalki dziasiatkaŭ kamientaroŭ pad publikacyjaj z pazicyjaj Minzdrava ŭ adnosinach da situacyi Ksiušy Maisiejenki, jakoj biełarusy sabrali 1,8 miljona dalaraŭ na ŭkoł «Zołhiensma», a Minzdaroŭje paviedamiła, što vieźci dzicia za miažu na lačeńnie «niama nijakaj nieabchodnaści». Choć sama situacyja vyzvała vostryja dyskusii, u hetym abmierkavańni nastupiŭ poŭny kansensus.
Jašče jany družna pryjšli ŭ zavirusavany post pra «dabraachvotna-prymusovyja» padpiski na haziety. Alena z Karmianskaha vykankama dzialiłasia tym, što ŭ cełym lubić haziety, a sto rubloŭ raz na paŭhoda — nie tak mnoha. Iryna z vykankama Mazyra dzialiłasia, što jaje babula i dziadula praciahvajuć čytać haziety. Ananim Uładzimir ŭkazvaŭ, što haziety patrebnyja, kab «prosta zrazumieć, dzie praŭda».
Akaŭnty z hetaj ža «supolnaści» adznačylisia i ŭ abmierkavańni bieśpiłotnika, palot jakoha čuli žychary Homiela. Karystalniki adpraŭlali spasyłku na aficyjnuju pazicyju Minabarony, zhadvali vučeńni i navat pasiaŭnuju.
«U hetym i jość vaš patryjatyčny talent»
Cikava, što litaralna niekalki dzion tamu — 25 krasavika — pieršy namieśnik kiraŭnika Administracyi Łukašenki Uładzimir Piarcoŭ na pazačarhovym źjeździe partyi «Biełaja Ruś» u Minsku zaklikaŭ «partyjnuju moładź» bolš aktyŭna kamientavać u sacsietkach.
Pa słovach Piercava, asnoŭnaje supraćdziejańnie ŭmiašańniu va ŭnutrypalityčnuju paviestku krainy «realizujecca ŭ infarmacyjnym asiarodździ».
«I ja by chacieŭ rekamiendavać vam usim aktyŭniej udzielničać u hramadskaj dyskusii, ustupać u palemiku ŭ kamientarach da pastoŭ, dzie našy niadobrazyčliŭcy razhaniajuć sacyjalnuju, kamunalnuju ci inšuju prablemu. U hetym i jość vaš patryjatyčny talent, hramadzianskaja, žurnalisckaja pazicyja. Nie saromiejciesia ŭ ŚMI, u sacyjalnych sietkach bolš pakazvać svaich rehijanalnych lidaraŭ, aktyŭnych partyjcaŭ — jany ŭ vas jość», — skazaŭ čynoŭnik.
Ci varta kuplać zakinutuju chatu za adnu bazavuju i kolki heta kaštuje nasamreč? Voś što raskazvajuć ludzi4
Ci varta kuplać zakinutuju chatu za adnu bazavuju i kolki heta kaštuje nasamreč? Voś što raskazvajuć ludzi
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie7777
Kamientary