Byłaja lidarka Mjanmy Aun San Su Čžy pieraviedziena pad chatni aryšt, zajavili vajskoŭcy
Jaje aryštavali piać hadoŭ tamu ŭ vyniku vajennaha pieravarotu.
Były lidar Mjanmy i łaŭreat Nobieleŭskaj premii miru Aun San Su Čžy, jakaja znachodziłasia pad vartaj ź lutaha 2021 hoda, pieraviedziena z turmy pad chatni aryšt, paviedamili dziaržaŭnyja ŚMI krainy sa spasyłkaj na vajskoŭcaŭ, piša Bi-bi-si.
80‑hadovaja Aun San Su Čžy ŭtrymlivałasia pad vartaj — vierahodna, u vajennaj turmie ŭ stalicy Niejpjido — z momantu jaje adchileńnia ad pasady ŭ vyniku vajennaha pieravarotu, jaki adbyŭsia piać hadoŭ tamu.
U zajavie lidara vajennaj chunty Min Aun Chłainha, jaki ŭznačalvaŭ pieravarot, havorycca, što jon «zamianiŭ joj pakinuty termin źniavoleńnia na adbyvańnie pakarańnia ŭ pryznačanym miescy pražyvańnia».
Aun San Su Čžy pryjšła da ŭłady ŭ 2015 hodzie paśla taho, jak tahačasnyja kiraŭniki Mjanmy praviali demakratyčnyja reformy. Da hetaha jana nabyła suśvietnuju viadomaść jak aktyvistka i zmahar za demakratyju, pravioŭšy bolš za 15 hadoŭ pad chatnim aryštam.
Dziaržaŭnyja ŚMI Mjanmy pakazali fatahrafiju, na jakoj jana siadzić u asiarodździ dvuch vajskoŭcaŭ u formie. Kali zrobleny zdymak — niezrazumieła.
Advakaty Aun San Su Čžy vitali rašeńnie ab jaje pieravodzie pad chatni aryšt.
«Aun San Su Čžy bolš za piać hadoŭ pieražyvała piekła ŭ birmanskich turmach. My vitajem źmianieńnie jaje stanovišča, adnačasova padkreślivajučy, što jana pa-raniejšamu niespraviadliva pazbaŭlena voli», — havorycca ŭ zajavie Fransua Zimiereja i Kataliny de ła Soty, jakuju cytuje AFP.
Pry hetym syn Aun San Su Čžy Kim Arys zajaviŭ, što skieptyčna stavicca da zajavy vajskoŭcaŭ, i ŭ jaho niama dokazaŭ taho, što jana žyvaja. Pavodle jaho słoŭ, apublikavanaja fatahrafija jaho maci była zroblena ŭ 2022 hodzie.
«Ja spadziajusia, što heta praŭda. Ja da hetaha času nie bačyŭ nijakich realnych dokazaŭ taho, što jaje pieraviali [pad chatni aryšt], — skazaŭ jon Bi-bi-si. — Tamu, pakul mnie nie dazvolać pahutaryć ź joj abo chtości nie zmoža niezaležna paćvierdzić jaje stan i miescaznachodžańnie, ja ničomu nie pavieru».
Da apošniaha nie było viadoma ab stanie zdaroŭja Aun San Su Čžy abo ŭmovach jaje ŭtrymańnia, i Kim Arys kazaŭ u śniežni, što viestak ad maci nie było šmat hadoŭ.
Jaje advakaty nie bačyli jaje bolš za try hady; paviedamlałasia, što jaje siamja nie mieła ź joj kantaktaŭ bolš za dva hady.
Adzinaje jaje malunak, jakoje možna było ŭbačyć da čaćviarha, było zroblena padčas pasiedžańnia suda ŭ mai 2021 hoda, u pačatku sieryi pracesaŭ, inicyjavanych vajskoŭcami pa abvinavačvańniach, jakija Aun San Su Čžy adchilała.
Vajenny lidar Mjanmy Min Aun Chłainh imkniecca vyvieści svoj režym ź mižnarodnaj izalacyi, i raptoŭnaje źjaŭleńnie naviny pra Aun San Su Čžy ŭ dziaržaŭnych ŚMI dazvalaje vykazać zdahadku, što vajennyja ŭłady, mahčyma, rychtujucca da dalejšych źmien u jaje statusie, u tym liku da vyzvaleńnia.
Ciapier čytajuć
«Ja supracoŭnik KDB, u vas buduć prablemy». Minčanka chacieła napisać skarhu ŭ optycy, ale supracoŭnica pakazała koračku15
Kamientary